10 حاجات بيحبها الرجل و بتبين قد ايه انتى بتحبيه .. اعرفيهم
العلاقة بين الست و الرجل طول عمرها من الحاجات الغامضة اللى لا يمكن نلاقى حد فاهمها 100 % ، علشان كده كتير بنبقى مش عارفين ازاى نقدر نعبر عن حبنا بالطريقة الصحيحة او الطريقة اللى يقدر يفهمها او يقدرها الطرف التانى ، فى المقال ده ” بنات حوا ” هتقولك على 10 اسرار عن حاجات بيحبها الرجل لو عملتيها هتوصليله حبك و يعرف قد ايه انتى بتحبيه و بتقدريه ..
10 حاجات بيحبها الرجل و بتبين قد ايه انتى بتحبيه .. اعرفيهم
1- انك تديله انتباهك الكامل :
لما تبقوا قاعدين سوا على العشا او حتى قدام التليفزيون و تمسكى موبايلك جوزك بيفهم ده على انك مش مهتمة او انه الوقت اللى بتقضوه سوا مش مهم بالنسبه لك ، و ده لانه مخ الراجل بيشتغل بأنه بيعالج كل حاجه لوحدها بعد ما بينحى باقى الحاجات اللى ممكن يعتبرها مش مهمة فى وقت محدد ، على عكس الستات اللى بيعتبروا multi tasking بمعنى انه مخ الست بيقدر يوفق بين اكتر من حاجه و يعملها فى نفس الوقت ، علشان كده لما تبقول قاعدين سوا حاولى تسيبى اى حاجه فى ايدك و تديله انتباهك الكامل حتى لو بيتكلم عن موضوع انتى مش مهتمة بيه اوى .
2- اطبخيله الاكله اللى بيحبها :
كلنا عارفين انه اقصر طريق لقلب الرجل معدته ، علشان كده من الحاجات اللى بيحبها الراجل و اللى بتبين حبك و اهتماماك هى انك تطبخيله اكله بيحبها ، وكمان انك عمليهاله مفاجأة لانه من الحاجات اللى بيكرهها الرجاله هى انك تسأليه اطبخ ايه او هناكل ايه بكرة مثلا ، حالوى انتى تفكرى فى وصفات او اكلات يكون بيحبها . ده هيبين اهتمامك و حبك بشكل كبير .
3- البسي فستان بيحبه عليكى :
انك تهتمى بشكلك و هدومك بيبن قد ايه انتى لسه مهتمة بانك تظهرى قدامه بشكل كويس ، علشان كده حاجه مهمة من حاجات بيحبها الراجل هى انك تلبسي فستان بيحبه عليكى لانه ده بيبن انه الحاجات اللى هو بيحبها بتهمك ، اللون الاحمر بيعتبر من الالوان الملفتة لنظر الرجالة بشكل كبير .
4- اهتمى برشاقتك :
انك تبعدى عن التوتر و تاكلى اكل صحى و كمان تعملى رياضة و تمارين مهم جدا بالنسبه لصحتك و رشاقتك ، لكن كمان مهمة بالنسبة لجوزك و بتعتبر طرق للتعبير عن حبك ليه ، لانه الحاجت دى بتوصله رسالة بتقول انك عايزةة علاقة طويلة و صحية معاه علشان كده انتى بتههتمى بصحتك و رضاقتك ، فى النهاية اهتمامك بنفسك مينفعش يكون كله فى اللبس و الشكل بس لكن كمان لازم تهتمى بصحتك و رشاقة جسمك .
5- جامليه :
من ضمن الحاجات اللى بيحبها الراجل ه انك تجامليه ، بمعنى انك لما تلاحظى حاجه جديدة عليه او يعمل حاجه حلوة لازم تقوليله انه عمل ده و تشكريه و تبينى انك لاحظتى ، لانه الرجاله كمان بتبذل مجهود كبير علشان تلفت نظر الستات و بيبنوا انهم بيحسنوا من نفسهم علشان الست اللى بيحبوها ، و لكن بطريقتهم زى انهم يطوروا نفسهم ف الشغل او يحسنوا من شكلهم بانهم يتمرنوا فى الجيم مثلا ، علشان يقدر يحسسك بالامان و انه قادر يحميكى و يحافظ على نفسه علشانك ، علشان كده حاولى دايما لما يشتغل على نفسه انك تلاحظى ده و تقوليله كلام حلو عن شكله ، لبسه و قولى قدامه انك سعيدة بانه قوى مثلا ، التفاصيل دى بتبين انك مهتمة و مقدرة .
6- شجعيه انه يقضى وقت لنفسه :
احنا كستات او بنات مبنترددش ابدا فى انه نطلب من الرجاله انهم يفضوا نفسهم و يبطلوا يخرجوا مع اصحابهم و يقضوا وقت معانا ، لكن فى الحقيقة لازم انتى كمان تفهمى انه ممكن يحتاج يقضى وقت لنفسه و مش كل الوقت يبقى معاكى علشان متزهقوش من بعض و كمان علشان يحس بحريته و ميبقاش زهقان معاكى او حاسس بملل ، اقترحى عليه انه ياخد يوم اجازة من الشغل و البيت و يروح يرتاح و يقضى وقت مع اصحابه ، يلعب بلاي سايشن او حتى يفضل نايم علشان يرتاح من تعب طول الاسبوع . حاجه زى كده هتبين اهتمامك و انك حريصة انه يحس انه حر فى الطريقة اللى يقضى بيها وقته .
7- اطلبى منه النصيحة :
جوزك او خطيبك بيحب دايما يحس انه جزء مهم من العالم بتاعك ، و كمان بيحب يحس انك تقدى تعتمدى عليه فى حل مشاكلك علشان كده من حاجات بيحبها الراجل هى انك تطلبى منه النصيحة فى اى موقف او مشكلة تقابلك ، و انك تبينى انك بتهتمى برأيى و انه مهم بالنسبه لك و بتهتمى بيه و انه له مكان مهم فى حياتك .
8- اشكريه على الحاجات الصغيرة اللى بيعملها :
المرة الجاية اللى جوزك يوصل فيها الاولاد للمدرسة ، يرمى كيس الزبالة او يغسل الاطباق بدالك ، بينيله شكرك و تقدريك للى عمله و دايما حاولى تشكريه على الحاجات الصغيرة اللى بيعملها علشانك . لانه الرجاله كمان عندهم مشعر و بيتضايقوا لما بيعملوا حاجه حلوة و ننسى نشكرهم عليها او منلاحظهاش علشان كده قوليه ” شكرا انك عملت كذا ” او حاولى تكافئيه بانك تعمليله كيك او حاجه بيحبها مثلا .
9- احضنيه :
بدل ما تسلمى عليه بسرعه قبل ما ينزل لشغله الصبح خدىثوانى و احضنى جوزك فيها ، لانه الرجاله بيقدروا اللفتات اللطيفة زى دى و بيحسوها جدا ، و كمان الحضن بيزود السعادة و مفيد للصحة ، احضنيه لحوالى 7 ثوانى .
10- ساعديه يتخلص من همومه :
خناقات البيت و مشاكل الشغل بتشكل حمل و هم تقيل اوى على قلب الراجل ، علشان كده اقعدى معاه و اسمعى منه همومه و الحاجات اللى قالقاه من غير ما تحاولى تحليهاله لو مش هتقدرى ، كفاية انك تسنعيله بس لانه ده هيبينله انك مش شايفاه ضعيف او اه مش قادر يحل مشاكله و هيبين انك مهتمة تسمعيله و تخففى عنه ، فلو مثلا جه من الشغل لبيت و المود بتاعه مش كويس وحسيتى انه متضايق اساليه لو حابب يتكلم ، لو قالك ايوة سيبي كل حاجه و اقعدى اسمعيله ، لو قالك لا يبقى اديله مساحة يهدأ و حاولى تعملى اى حاجه تخفف عنه بانكم تخرجوا مثلا .
بكده تكونى عرفتى معانا 10 حاجات بيحبها الراجل و بيبنوا حبك و اهتمامك ، قوليلنا ايه رايك :)
