اعملي مكياجك بنفسك في البيت بمكونات طبيعية

ريهام محمود
ريهام محمود
في
مكياج
18649

دلوقتي تقريبا بقت كل حاجة بنقدر نعملها في البيت من أول وصفات البشرة زي السكرب والكريم المرطب وحتي غسول للبشرة, لمزيل المكياج وحتي المكياج نفسه كمان واوقات بنقدر نتطلع بنتيجه زي المنتجات اللي بتتباع في السوق والميزة في المنتجات اللي بنعملها بأدينا إننا بنقدر نتحكم فيها ونظبطها علي حسب احتياجنا وطبيعة أو لون بشرتنا بظبط..  ده غير طبعا ميزة إنها بتبقى من مكونات طبيعية مفيدة للبشرة.

عشان كده احنا النهاردة جايبين لكل بنات حوا طريقة عمل كريم الاساس والبلاشر والايلاينر والماسكارا بمكونات طبيعية تقدري تعمليهم بنفسك في البيت بسهولة جدا.

اعملي مكياجك بنفسك في البيت بمكونات طبيعية:

1- طريقة عمل كريم الاساس البودر “البودرة المعدنية”:

المكونات:

– كوباية نشا.

– قرفة – كاكاو ” الكميات حسب درجة اللون”.

الطريقة:

دي طريقة كريم الاساس البودر او البودرة المعدنية, هنحط النشا ونضيف عليه القرفة والكاكاو شوية شوية لحد ما توصلي لدرجة اللون اللي تمشي مع لون بشرتك, احتفظي بيها في اي علبة عندك وكده تبقى البودرة المعدنية جاهزة عندك بكل سهولة وبمكونات مش مكلفة خالص لما تيجي تستخدميها حطيها بالفرشة عادي زي البودر.

طريقة عمل كريم الاساس او البودرة المعدنية
طريقة عمل كريم الاساس او البودرة المعدنية

2- طريقة عمل الماسكارا:

المكونات:

– 2 معلقة صغيرة زيت جوز الهند.

– 4 معلقة صغيرة جل صبار الالوفيرا.

– ½ معلقة صغيرة شمع العسل.

– كام نقطة فيتامين E.

– ½ معلقة صغيرة فحم مطحون.

الطريقة:

هنخلط زيت جوز الهند مع جل الصبار وشمع العسل وفيتامين E في طبق ونسيحهم مع بعض في حمام مية سخنة, يعني هنحط مية على النار ونحط فيها الطبق اللي فيه كل المكونات ونقلبهم مع بعض لحد ما يدوبوا خالص هنرفعها من على النار ونضيف عليها الفحم المطحون “هنجيب اقراص الفحم من الصيدلية ونطحنها”, هنقلب المكونات كلها مع بعض كويس, وممكن نحطها في ماسكارا فاضية قديمة عندنا وطبعا عشان العبوة بتبقى ضيقة ممكن نحط المكونات في كيس ونخرمه خرم صغير وننزلها من الفتحة جوة عبوة الماسكارا او نحطها في علبة فاضية وناخد منها بفرشة الماسكارا.

طريقة عمل الماسكارا
طريقة عمل الماسكارا

3- طريقة عمل البلاشر:

المكونات:

– 2 معلقة كبيرة بودرة البنجر.

– 1 معلقة كبيرة نشا.

– جوزة الطيب مطحونة.

– جنزبيل مطحون.

– 5 نقط من اي زيت عطري مفضل عندك.

الطريقة:

هنحضر الاول بودرة البنجر هنجيب البنجر نقطعه شرايح رفيعه اوي ونحطه في الفرن لمدة نص ساعة او لحد ما ينشف خالص وبعدين نطحنه في الخلاط كويس لحد ما يبقى بودر وننخله في مصفى ضيقة كويس عشان نطلع منه الناعم بس, وكده تبقى بودرة البنجر جاهزة هنضيف عليها النشا ونضيف رشة  او تنين من جوزة الطيب والجنزبيل عشان ندي بس ضي لون للخليط وبعدين نضيف الزيت العطري ونقلب كل المكونات مع بعضها كويس, وكده البلاشر جاهز نقدر نستخدمه ونحط منه بالفرشة بالطريقة العادية.

طريقة عمل البلاشر
طريقة عمل البلاشر

4- طريقة عمل الايلاينر:

المكونات:

– 2 معلقة صغيرة زيت جوز الهند.

– من 1 -2 قرص فحم مطحون “للون الاسود”.

– ½ معلقة صغيرة كاكاو ” للون البني”.

– 4 معالق صغيرة جل صبار الالوفيرا ” اختياري”.

الطريقة:

هنخلط زيت جوز الهند مع الفحم للون الاسود او الكاكاو للون البني وممكن نزود او نقلل في الكميات حسب درجة اللون اللي احنا عايزنها لو عايزينه اسود كثيف او تقيل اوي نزود الفحم, وبالنسبة للبني بردو لو عايزينه غامق نزود كمية الكاكاو وفاتح نقلل الكمية يعني نقدر نتحكم في اللون زي ما احنا عايزين, ونحطه في علبة ونستخدمة نرسم بيه باي ريشة ايلاينر قديمة عندك او بفرشة الايلاينر.

طريقة عمل الايلاينر
طريقة عمل الايلاينر

شوفي كمان طريقة الروج بمكونات طبيعية

اعملي الروج بمكونات طبيعية بنفسك في البيت
اعملي الروج بمكونات طبيعية بنفسك في البيت

مقالات متعلقه

التخلص من كريم الاساس الزيادة في 3 خطوات بسيطة

التخلص من كريم الاساس الزيادة في 3 خطوات بسيطة

6 تقنيات مختلفة لوضع البلاشر على الطريقة الكورية

6 تقنيات مختلفة لوضع البلاشر على الطريقة الكورية

تكنيك “I’m Cold Makeup” احدث تريند مكياج على التيك توك للشتا

تكنيك “I’m Cold Makeup” احدث تريند مكياج على التيك توك للشتا