10 تمارين تعمليهم فى البيت هيساعدوكى تحرقى calories اكتر طول اليوم
اوقات كتير وسط مشاغل الحياة الكتيرة بيبقى مفيش وقت تروحى الجيم تلعبى رياضة او تجري علشان تحافظى على رشاقة جسمك و صحته ، بس متقلقيش ” بنات حوا 0″ جابتلك الحل . فى المقال ده هتعرفى معانا ازاى تعملى 10 تمارين تعمليهم فى البيت هيساعدوكى تحرقى calories اكتر طول اليوم و انتى بتعملى شغل البيت فى نفس الوقت !
10 تمارين تعمليهم فى البيت هيساعدوكى تحرقى calories اكتر طول اليوم
1- وانتى بتشيلى الغسيل اعملى step workouts :
لو البيت عندك بسلالم يبقى حاولى و انتى بتشيلى الغسيل او اى حاجه من الدور اللى تحت للدور اللى فوق انك تعملى تمرين الـ step workouts ، قسمى الحاجات اللى انتى عايزة تشيليها على 5 اجزاء واعملى 5 رحلات من الدور اللى تحت للدور اللى فوق، و فى اخر كل مرة ارفعى سبت الغسيل او الحاجه اللى انتى شايلاها لمستوى كتفك و نزليها ، كررى الحركة دى 5 مرات .
الهدف من التمرين : تقوية القلب و الاوعية الدموية – تقوية عضلات الذراع .
2- على ما القهوة بتاعتك تبرد : تمرين الـ wall sit :
لحد ما القهوة بتاعتك تبرد ممكن تعملى تمرين بسيط لكن مفيد ، اسندى ضهرك و رقبتك و راسك على الحيطة بحيث يكونى رجليكى على مسافة حوالى 30 سم بعيد عن جسمك ، و بعدين اتنى ركبك و انزلى بجسمك ناحية الارض لحد ما تحسى انه عضلات الفخذين بدأت تشد و اثبتى على الوضعبة دى 15 ثانية ، و كررى التمرين لحوالى دقيقة .
الهدف من التمرين : تقوية و شد عضلات الفخذين .
3- وانتى بتنضفى الاطباق : تمرين الـsquats :
كل مرة و انتى بتطلعى طبق او كوباية من غسالة الاطباق بدل ما توطى اعملى حركة الـsquat زى ما تكونى هتقعدى على كرسي بالضبط ، انزلى كأنك هتقعدى و خدى الطبق من غسالة الاطباق و بعدين ارفعى نفسك وانتى على نفس وضعية الجلوس و خدى بالك انه ركبك تبقى على نفس مستوى اصابع الرجلين مش مايلة عنها .
الهدف من التمرين : تقوية الجزء السفلى من الجسم .
4- وانتى فى العربية او راكبة مواصلات : تمرين شفط البطن :
وانتى سايقة عبيتك او راكبة اى مواصلة لاى مشوار استغلى الوقت ده فى انك تعملى تمرين مهم لبطنك و هو انك تشفطى بطنك لجوه و تفضلى على الوضع ده ق ما تقدرى و بعدين تاخدى نفس و تكررى تانى .
الهدف من التمرين : تقوية عضلات البطن و تخسيس الكرش .
5- وانتى بتغسلى ايدك : تمرين الـ standing push-ups :
وانتى بتغسلى ايدك اقفى بعيد عن الحوض بحوالى 50 سم و افردى ايدك بارتفاع كتفك و امسكى فى الحوض و افردى جسمك بحيث يكون فى خط مستقيم مايل على الحوض ، و اعملى 20 ضغط على الواقف.
الهدف من التمرين : تقوية عضلات الصدر و الذراعين.
6- وانتى قاعدة على المكتب : تمرين الـ desk pushes :
اقعدى على الكرسي و قربيه اوى من المكتب و افتحى ايديكى و امسكى بيهم طرف المكتب من تحت ، و زقى نفسك قريب من المكتب على قد ما تقدرى و كأنك هتشيلى المكتب من على الارض واثبتى لمدة 30ثانية ،و بعدين ارتاحى 10 ثوانى و كرى نفس الحركة مرة تانية .
الهدف من التمرين : تقوية الجزء العلوى من الجسم .
7-و انتى بتكلمى فى التليفون : تمرين رفع الرجلين :
تمرين سهل من تمارين تعمليهم فى البيت وانتى بتتكلمى فى التليفون اقعدى بشكل مستقيم على طرف المكتب او الكرسي و اتنى رجلك الشمال تنية خفيفة، و افردى رجلك اليمين و ارفعيها عن الارض، افضلى على الوضع ده من 15لـ30 ثانية ، بعد مرور الوقت بدلى الرجلين ، او حركى رجليكى زى ما تكونى بتجري فى مكانك .
الهدف من التمرين : تقوية القلب و عضلات المعدة.
8-وانتى بتطبخى : تمرين الـ back claps :
اقفى فى نص المطبخ و خلى الدراعين مستقيمين و لفيهم وراء ضهرك و صقفى ، هما ايديكى مش هتصقف فعلا لكن هتقرب من بعضها و يمكن يتلامسوا ، و بعدين رجعى ايديكى قدامك و صقفى ، اعملى 50 تصقيفة من دول و بعدين ارتاحى 10 ثوانى و اعملى دورتين كمان .
الهدف من التمرين: تقوية عضلات الـ triceps وعضلات الصدر .
9- و انتى نايمة فى السرير : تمرين الـ half bridges :
نامى على ضهرك من غير مخدة اتنى ركبك و ارفعيهم و خلى القدمين flat على السرير، شدى عضلات بطنك و اضغطى عضلات الفخذين و ارفعيهم بحيث يكون جسمك فى خط مستقيم من الفخذين للكتفين ، اثبتى 15 ثانية و بعدين لرجعى لنفس الوضعية و اثبتى عليها مرة تانية لمدة 30 ثانية ، و بعدين ارتاحى لمدة 10 ثوانى . كررىيها 3 مرات .
الهدف من التمرين : تقوية عضلات البطن و الضهر .
10- انتى بتلعبى مع اولادك : تمرين الـplank :
نامى على الارض بحيث يكون وشك للارض و ارفعى جسمك على الكوعين بحيث تكون صوابع رجلك لامسة الارض ” زى وضعية تمرين الضغط ” لو صعبة عليكى ممكن تتنى ركبك و تخليها تلمس الارض ، بكده هيكون التمرين اسهل . و لو اولادك صغيرين ممكن تخليهم يركبوا على ضهرك بحيث يشكلوا مقاومة اكبر .
الهدف من التمرين : تقوية عضلة القلب .
بكده تكونى عرفتى معانا 10 تمارين تعمليهم فى البيت بسهولة و فى وقت قليل ، جربيهم و شاركينا النتيجة :)
