تمارين لجسم مثالي تعمليهم في 4 دقايق في البيت هتغنيكي عن ساعة في الجيم

التمارين من الحاجات المهمة جدا عشان نحافظ على وزننا وجسمنا بشكل مثالي وكمان الرياضة مفيدة على الصحة بشكل عام, لكن المشكلة بتكون انه مش كلنا بنقدر نروح الجيم ممكن يكون معندناش وقت ومشغولين او ساعات بنكسل نروح , عشان كده احنا جيبنالكم النهاردة 5 تمارين فعالة جدا تحافظي بيهم على جسم مثالي وعلى الصحة بشكل عام وتقدري تعمليهم في البيت بسهولة في 4 دقايق بس.

تعالوا نشوف مع بعض تمارين لجسم مثالي هتعمليهم في 4 دقايق في البيت:

1- التمرين الاول:

اقفي مفرودة وافتحي الساقين خليهم في مستوى الكتفين وابدأي انزلي لتحت ببطء مع دفع المؤخرة لورا كأنك هتقعدي على كرسي وخلي الضهر مستقيم, وبعدين ترجعي تقفي تاني وتكرري الحركة لمدة 60 ثانية, والتمرين ده بيقوي عضلات المؤخرة والساق في نفس الوقت.

2- التمرين التاني:

انزلي على الارض اسندي بايدك وبأطراف صوابع الرجل وتكون الايدين في مستوى الكتفين, ويكون الكتفين والركبتين والقدمين في خط مستقيم, تبدأي ببطء تنزلي بجسمك ناحية الارض مع تني الذراعين جنبك وبعدين ارجعي للوضع الاولاني وكرري الحركة تاني لمدة 30 ثانية, التمرين ده بيقوي عضلات الصدر والذراعين.

3- التمرين التالت:

التمرين ده مفيد جدا في تقوية عضلات البطن وشدها وكمان بيحرق سعرات حرارية, اسندي على الارض بايدك والرجل تكوني ساندة بيهم بأطراف الصوابع, ابدأي بدفع الركبة اليمين ببطء ناحية الصدر, وحافظي على الضهر والوركين بشكل مستقيم, وبعدين ارجعي للوضع الاول واعملي نفس الحركة للرجل الشمال, كرري التمرين لمدة 30 ثانية.

4- التمرين الرابع:

اقفي بشكل مستقيم وافتحي الرجل بمستوى الكتفين وحطي ايدك على وسطك وبعدين هتاخدي خطوة واسعة لقدام بالرجل الشمال وانزلي بجسمك لتحت بحيث انك تنتي الركبة اللي قدام بزاوية 90 درجة والركبة اللي ورا تبقى قريبة من لمس الارض وبعدين ارجعي للوضع الاول واعملي نفس الحركة للرجل اليمين, كرري التمرين لمدة 60 ثانية, ومهم جدا تخلي ضهرك مفرود ومستقيم اثناء الحركة, التمرين ده بيقوي عضلات الساقين والفخدين.

5- التمرين الخامس:

التمرين ده بيساعد جدا على تقوية عضلات الجسم بشكل عام وبيحسن اللياقة البدنية للجسم, وبيحسن عمل القلب والاوعية الدموية, اقفي بشكل مستقيم وخلي ايديكي جنبك مفردوة, وبعدين نطي لفوق مع فتح الساقين ورفع الذراعين فوق الراس في نفس الوقت وبعدين ارجعي للوضع الاول ونطي تاني وكرري التمرين لمدة 45 ثانية.

شوفي كمان تمارين الكارديو لحرق الدهون بشكل سريع جدا