شوفي معانا افضل 9 افكار لعمل مكياج طبيعي مثالي

ريهام محمود

في

10374

المكياج التقيل اكيد مش مناسب لكل الاوقات يعني مكياج الصبح غير بالليل ومكياج الجامعة غير الشغل غير خروجاتنا مع اصحابنا, واوقات كتير بنبقى محتاجين نحط مكياج خفيف وطبيعي لكن مش بنعرف نعمله ازاي وايه اللي المفروض يتحط في المكياج وايه اللي ميتحطش عشان اللوك يطلع طبيعي وفي نفس الوقت حلو, عشان كده احنا النهاردة جايبين لكل بنات حوا افضل الافكار اللي تقدروا تنفذوا بيها مكياج طبيعي وبشكل مثالي جدا.

افضل 9 افكار لعمل مكياج طبيعي مثالي:

1- لون بشرة مثالي:

اول لوك معانا هو التركيز على لون البشرة واختيار درجات المكياج المناسبة للون البشرة بالظبط عشان اللوك يطلع طبيعي, هنستخدم في اللوك ده كريم اساس, وكونسيلر, وبودرة, هنستخدم كريم الاساس وبودرة نفس لون البشرة بالظبط مش افتح عشان متطلعش البشرة شكلها مش طبيعي ومش اغمق عشان البشرة متطلعش كأنها واخدة تان لازم يكونوا نفس درجة البشرة, وبالنسبة للكونسيلر اختاريه افتح درجة واحدة بس من لون الفونديشن بتاعك.

2- حواجب كثيفة:

في اللوك ده هنركز على الحواجب وهنظهرها هي اكتر حاجة في الوش وهنخليها متحددة هنملى الفراغات ممكن نستخدم ايشادو نفس لون الحواجب عشان نملاها او نستخدم ايلاينر, او قلم الحواجب, او الماسكارا, ولون الحاجب لازم يكون ماشي مع لون الشعر يعني الشعر الاشقر والبشرة الفاتحة تبقى الحواجب لونها بني فاتح, والبشرة السمرا تستخدم الالوان الغامقة.

3- التركيز على العيون:

في اللوك ده هيكون التركيز على العيون, ممكن تحطي ايلاينر بني فاتح عشان تظهري العيون, او ممكن تكتفي انك ترسميه على جذور الرموش بس وبعدين تدمجي اللون بالفرشة, ونحط ايشادو فاتح على الجفون, ونستخدم ماسكارا بني او اسود عشان ندي طول وكثافة للرموش.

4- التركيز على البلاشر:

اللوك ده هنركز على الخدود بلون بلاشر وردي فاتح على تقاحتين الخد عشان نبرزهم, وممكن لون الرقبة هتبقى باينة ممكن تحطي على الرقبة من الجنبين شوية من البلاشر.

5- التركيز على الشفايف:

هنا هنركز اننا نظهر الشفايف اكتر حاجة في الوش, اختاري بردو لون دافي طبيعي او ممكن تكتفي بس بالليب جلوس او ملمع الشفايف, وحطي الروج بصوابعك عشان يطلع بلوك طبيعي اكتر.

6- مكياج طبيعي مثالي للبشرة السمرا:

بالنسبة للبشرة السمرا والشعر الغامق احسن لوك ليها استخدام الكحل الاسود في المكياج عشان اللوك يطلع طبيعي اكتر, والروج يكون بلون الكرز.

7- مكياج طبيعي مثالي للشقراوات:

بالنسبة للبشرة الفاتحة والشعر الفاتح او الاشقر, انسب حاجة ليهم لون روج خوخي او وردي ناعم, وممكن يزودوا للروج لمعة باللون الوردي.

8- مكياج طبيعي مثالي لصاحبات الشعر الاحمر:

البنات اللي شعرهم احمر يركزوا اكتر في الوان المكياج على الالوان الباستيل والدهبي بدرجاته هتطلع حلوة جدا عليهم, ويبعدوا عن البنفسجي والازرق, ويستخدموا روج بألوان دافية وبلاشر قريب من درجة لون الروج.

9- افضل مكياج نيود:

اللوك النيود هو اللي بنستخدم فيه الوان ناعمة قريبة من لون البشرة بيطلع طبيعي جدا وفي نفس الوقت بيدي شكل حلو للوش.

ولازم نعرف ان القاعدة الذهبية او الاساسية في المكياج اننا نركز على حاجة واحدة في الوش ياما الشفايف او العيون لو مكياج العيون تقيل يبقى الشفايف بألوان طبيعية وخفيفة والعكس.