افضل خمس اماكن في الجسم للابر الصينية هتساعدك على خسارة الوزن

ريهام محمود

في

14017

العلاج بالابر الصينية من العلاجات المعروفة جدا في الطب الصيني من زمان جدا وتقنية العلاج بالابر الصينية ممكن تستخدم لكل اماكن الجسم لعلاج مشاكل صحية كتير جدا في الجسم, والابر دي بتشتغل على نقط الضغط المرتبطة مع بعض الاجهزة الرئيسية في الجسم وبيتم الضغط على الاماكن دي بالابر بطريقة معينة, ومن ضمن الحاجات اللي ممكن نستخدم لها الابر الصينية اننا نستخدمها لخسارة الوزن ومن خلال مقالنا النهاردة هنقولكم على افضل الاماكن في الجسم للابر الصينية اللي هتساعدك على خسارة الوزن لانها بتحفز نقط معينة في الجسم اللي بتساعد في السيطرة على الشهية والاحساس بالجوع, وكمان بتحسن عمل الجهاز الهضمي وبتخليه اقوى .

والعلاج بيبدأ بتدليك خفيف للمنطقة اللي هنحط فيها الابرة وبعدين نحط الابرة, وبعد ما نشيلها نعمل تدليك خفيف تاني للمنطقة

طيب لو انتي معندكيش الابر او مش هتعملي في مكان متخصص في العلاج بالابر الصينية هل كده مينفعش نعمل الطريقة دي ؟ لا اكيد ينفع هنعملها في البيت من غير ابرة بالضغط بالصوابع بس على المناطق اللي احنا هنحددها.

افضل خمس اماكن في الجسم للابر الصينية هتساعدك على خسارة الوزن:

1- نقطة الاذن:

الاذن تعتبر واحدة من النقط الرئيسية في السيطرة على الشهية, وعشان نحط الابرة في النقطة الصح هنخلي الابهام في منطقة نص الاذن وباقي الصوابع ورا الاذن ونفتح الفك ونقفله كذا مره واكتر مكان هيكون في اقصى حركة اثناء الفتح والقفل هتبقى هي دي النقطة اللي هنحط فيها الابرة او هنضغط عليها بصباعنا زي ما قولنا, هنضغط من 1 – 3 دقايق مرتين في اليوم, ومنطقة الاذن, والايدين, والقدمين, هي اكتر الاماكن اللي ليها انعكاس على طاقة على باقي اجزاء الجسم, وبالتالي تحفيز النقط في الاماكن دي من اكتر الطرق الفعالة لخسارة الوزن.

2- نقطة فوق الشفايف:

النقطة اللي بين الشفة اللي فوق والانف, اضغطي عليها من 1 – 5 دقايق مرتين في اليوم, او كل ما تحسي بالجوع عشان تسيطري على الشهية وتمنعي نفسك من الاكل.

3- نقطة الركبة:

الضغط على المنطقة دي مش بس بيحسن الهضم وبيساعد على خسارة الوزن, كمان مفيد جدا في تخفيف تقلصات المعدة والم الدورة الشهرية, والمنطقة بالظبط بتكون تحت الركبة بـ 5 سم, اضغطي على النقطة دي بالسبابة لمدة دقيقتين كل يوم, الطريقة دي هتخلي المعدة تشتغل بشكل سليم وهتحسن وظايفه, واثناء الضغط ممكن تحسي بألم خفيف او عدم راحة وده طبيعي وتبقى انتي كده ضاغطة على المكان الصح.

4- نقطة الكوع:

وعشان تحددي النقطة دي اتحركي مسافة بعرض صوباع الابهام من مفصل الكوع لحد المنطقة الداخلية في الكوع زي ما هو باين في الصورة كده اضغطي على المكان ده لمدة دقيقة بالصوباع الابهام, والضغط على المنطقة دي بيساعد في علاج حرارة الجسم, والرطوبة الزايدة في الجسم, وبيحسن من وظيفة الامعاء, وبيمنع احتباس السوايل في الجسم.

5- نقطة الكاحل:

النقطة دي موجودة فوق كاحل الساق بـ 5 سم, اضغطي عليها لمدة دقيقة كل يوم, وبعدين شيلي الضغط عنها ببطء, لكن في حاجة مهمة جدا متستخدميش الضغط على النقطة دي لو كنتي حامل.

لو مشيتوا على الضغط على النقط دي يوميا زي ما شرحنا, هتحسي بتغيير ملحوظ في الجسم وعلى الصحة بشكل عام هتحسي صحتك احسن بكتير, وهتلاحظي انك بتقدري تسيطري على شهيتك واحساس الجوع بسهولة وبشكل فعال جدا.