اكتشفي معانا ازاي تعرفي شخصيتك من طريقة نومك !
اثبتت كتير من الدراسات والابحاث ان طريقة نوم كل شخص ممكن تقول حاجات كتير عن شخصيته, سواء الافكار او الرغبات او المشاعر اللي بيحس بيها الشخص كل ده بيبان من طريقة النوم, وعلماء النفس اثبتوا ان في علاقة قوية جدا ما بين طريقة النوم والطريقة اللي احنا بنبص بيها للعالم او المجتمع حوالينا وبتعكس كل اللي حاسين بيه وبيقولوا ان لغة جسد الشخص وهو نايم مش بتكذب ابدا لانها بتكون حركات لاارادية واحنا نايمين ومش بنكون متحكمين فيها لان العقل الباطن هو اللي بيدي اوامر للغة الجسد, بعكس العقل اللي ممكن نسيطر عليه ونختار الكلمات او طريقة التواصل مع الناس لكن لغة الجسد وتعبيرات الوش بيكون صعب الكذب او التحكم فيها لانها بتطلع بصورة عفوية ولو حتى قدرنا نتحكم فيها بيكون بشكل جزئي بس مش بشكل كامل, عشان كده العلماء والباحثين بيقولوا ان المعلومات الاكتر مصداقية اللي تقدروا تعرفوها عن اي الشخص بتكون وهو نايم من خلال لغة جسدوا.
واي شخص مش بيفضل اكيد على وضعية نوم واحدة خلال فترة النوم كلها الطبيعي ان الشخص بتتغير وضعية نومه حوالي 40 مرة في الليلة وممكن اكتر كمان لكن بيكون في وضعية او طريقة نوم واحدة بس هي اللي بتكون مفضلة عند كل شخص وبينام بيها معظم الوقت وفي الغالب بتكون هي الطريقة اللي بتصحي بتلاقي نفسك نايمة بيها, بس في نقطة مهمة ان الصحيان على منبه مش بتكون دي هي الطريقة الصح او المفضلة ليكي لانه المنبه ممكن يصحيكي في اي وضعية نوم لانه بيصحيكي في اي مرحلة من النوم, لكن طريقة نومك في الصحيان الطبيعي هو ده اللي بيكون الوضع المفضل ليكي في النوم.
تعالوا نعرف مع بعض طريقة نومك بتقول ايه عن شخصيتك !
1- النوم على الضهر:
النوم على الضهر ده معناه انك بتحسي براحة تامة, وعلامة على الثقة في النفس والقوة النفسية, اللي بيناموا بالطريقة دي بيكونوا واثقين في نفسهم في اي حالة وفي اي موقف, وبيكونوا منفتحين جدا ومستعدين يكتسبوا خبرات ومعلومات جديدة دايما, بس الاشخاص اللي بيناموا كده يخلوا بالهم من ان الثقة الزيادة دي متتحولش غرور, ولو الثقة دي اتحولت غرور عند اي شخص يبقى هيزيد على النوم على الضهر فرد الذراعين والساقين على السرير كله يعني بياخدوا مساحة كبيرة من السرير.
2- وضع الجنين:
الوضع ده اللي زي وضع الجنين بتنامي على جنبك والركبتين ضاغطين على منطقة البطن والذراعين ملفوفين حوالين الجسم او ببطانية, وبيحبوا كمان يناموا في جنب واحد من السرير ويكونوا جنب الحيطة, والاشخاص اللي بيناموا بالطريقة دي بيكون عندهم خوف من الحياة ومش بيحبوا يندمجوا في مواقف الحياة او مع الناس اللي حواليهم, دايما بيحتاجوا شخص يكون جنبهم هو يتولى المسئولية ويحميهم من مواجهة تحديات الحياة.
3- النوم على البطن:
بتكوني نايمة على بطنك وفاردة الذراعين حاضنة بيها السرير وفي اشخاص بيناموا ايديهم على المخدة او ايديهم جنبهم ورجلهم مفرودة, والاشخاص اللي بيناموا بالطريقة دي بيحبوا يتولوا مسئولية نفسهم وياخدوا كل القرارات الخاصة بحياتهم بنفسهم, وفي الغالب مش بيحبوا انهم يتوجه لهم اي نقد لانهم دايما شايفين ان قرارتهم هي اللي صح وان دي تصرفات خاصة بيهم وهما حرين فيها ومش من حق اي شخص يعدل عليهم, وكمان الاشخاص دول عندهم عند بدرجة عالية جدا, واصرار على تحقيق اهدافهم والوصول ليها, وكمان بيهتموا بالتفاصيل اوي.
4- النوم على الجنب:
النوم على الجنب اليمين او الشمال والوضعية دي بتكون شبة وضع الجنين شوية لكن الجسم بيكون فيها مسترخي اكتر ومش واخد شكل الكورة او داخل جوه بعضه اوي زي وضع الجنين, الاشخاص اللي بيناموا بالطريقة دي بيتميزوا بعقل تحليلي جدا يعني بيحللوا ويفسروا اي حاجة او اي موقف بيمر عليهم في حياتهم, شخصياتهم مستقرة نفسيا وتقدري تثقي فيهم, سهل جدا انهم يتكيفوا مع اي موقف في الحياة, وبيقدروا يتغلبوا على الصعوبات اللي بتقابلهم في حياتهم بسهولة جدا ومن غير مجهود كبير.
5- النوم على الضهر وضم الذراعين:
النوم على الضهر مع ضم الرجلين والذراعين بيكونوا على الجسم, الاشخاص اللي بتنام بالطريقة دي بيكونوا خجولين شوية ومتحفظين, وهاديين جدا, بيحبوا النظام اوي وان كل حاجة تكون مظبوطة ومعمولة صح وبيحبوا اللي حواليهم كمان يكونوا زيه.
6- النوم على الجنب والذراعين لتحت:
النوم على الجنب اليمين او الشمال والذراعين لتحت, الاشخاص اللي بيناموا بالطريقة دي بيكونوا هاديين وودوين جدا, وبيتعاملوا مع مواقف الحياة بهدوء, لكن مش بيثقوا في الناس اوي لكن بالرغم من ده بيتعاملوا مع اللي حواليهم بسهولة وسلاسة.
ياللا كل واحدة تشوف طريقة نومها اي واحدة فيهم وتقولنا ماشية مع شخصيتها ولا لا :) .
