6 طرق لعمل غسول البشرة بمكونات طبيعية .. اعرفيها معانا

ريهام محمود
ريهام محمود
في
بشرة
17110

كلنا عارفين طبعا اهمية غسول البشرة لتنضيفها من اي شوائب او ثارا مكياج ده غير انه بيساعد على ترطيبها وبيمنعها من الجفاف لان الصابون العادي ممكن جدا يؤثر علي بشرتنا تأثير سلبي ويتسبب في جفافها وعدم ترطيبها كفاية, وطبعا في السوق أنواع غسول كتير ومناسبة لكل أنواع البشرة بس احنا عارفين إن فيه بنات كتير بتحب قوي المنتجات الطبيعية وإنها تتفنن إزاي ممكن تعمل حاجتها بنفسها من المكونات أو المواد اللي هي بتحبها حتي لو كانت بتحبها في الاكل وبتحب ريحتها زي جوز الهند, اللافندر , زيت الجوجوبا أو عسل النحل, عشان كده احنا النهاردة جايبين لكل بنات حوا اكتر من طريقة تعملي بيهم غسول البشرة بنفسك في البيت بمكونات طبيعية وبسيطة جدا.

ياللا نشوف ازاي نعمل غسول البشرة بمكونات طبيعية:

1- الوصفة الاولى:

المكونات:

– ½ كوباية شوفان.

– 2 معلقة كبيرة عسل نحل.

– 1 معلقة صغيرة جوزة الطيب.

– 10 نقط من زيت اللافندر.

– 10 نقط من زيت شجرة الشاي.

الطريقة:

هنحط الشوفان في الخلاط ونطحنة كويس لحد ما يبقى ناعم خالص وبعدين هنضيف عليه باقي المكونات ونخلطهم كويس مع بعض ونحط الخليط في اي علبة نضيفة عندنا ونستخدمها نفرك بيها البشرة لمدة في حركات دائرية لمدة دقيقة وبعدين نغسله بالمية, والوصفة دي تعتبر غسول ومقشر للبشرة في نفس الوقت, وممكن يقعد معاكي لمدة اسبوعين, والغسول مناسب لكل انواع البشرة.

غسول البشرة بمكونات طبيعية 1
غسول البشرة بمكونات طبيعية 1

2- الوصفة التانية:

المكونات:

– 1 كوب زيت جوز الهند.

– من 1 – 2 معلقة كبيرة فحم “حوالي 5 كبسولات فحم”.

– 1 معلقة كبيرة صودا الخبز ” الكربوناتو”.

– 5 نقط من زيت اللافندر.

الطريقة:

هنطحن كبسولات الفحم “هنجيبها من الصيدلية” ونضيف عليها زيت جوز الهند والكربوناتو وزيت اللافندر ونخلط المكونات كلها مع بعض كويس, ونحتفظ بيها في علبة, ولما نيجي نستخدمة هناخد مقدار معلقة كده ونفرك بيه البشرة لمدة دقيقة وبعدين نغسلها بمية دافية, والغسول ده ممتاز جدا للبشرة زي ما احنا عارفين زيت جوز الهند مفيد جدا للبشرة وبيرطبها والفحم بيساعد على تفتيح البشرة وبينضفها بعمق, والغسول ده مناسب لكل انواع البشرة وبشكل خاص البشرة الدهنية.

غسول البشرة بمكونات طبيعية 2
غسول البشرة بمكونات طبيعية 2

3- الوصفة التالتة:

المكونات:

– ¼ كوباية زيت خروع.

– ½ كوباية زيت بذور العنب.

– ¼ زيت الجوجوبا.

– 15 نقطة من زيت شجرة الشاي.

الطريقة:

هنخلط الزيوت كلها مع بعض ونقلبها كويس وبعدين نحطها في برطمان او اي ازازة فاضية عندك, ولما نيجي نستخدمه ناخد على اطرف صوابعنا من الخليط ده واعملي مساج لمدة دقيقة بحركات دائرية للوش والرقبة وبعدين هنجيب فوطة نبلها مية سخنة لحد ما بشرتك تتحملها واضغطي بيها على البشرة كلها لحد ما تحسي انها بردت تبليها تاني بمية سخنة وتعملي نفس الطريقة لحد ما تبرد وبعدين  اغسلي الفوطة بالمية وامسحي بيها الخليط من على بشرتك ونشفي وشك بفوطة جافة, واستخدمي الغسول ده مره واحدة في اليوم بالليل قبل ما تنامي والصبح ممكن تغسلي وشك بمية بس من غير اي حاجة, الغسول ده هايل جدا للبشرة الجافة بشكل خاص لانه بيرطبها جدا وكمان للبشرة الحساسة بينضف البشرة وكمان مزيل للمكياج.

غسول البشرة بمكونات طبيعية 3
غسول البشرة بمكونات طبيعية 3

4- الوصفة الرابعة:

المكونات:

– عسل ابيض كمية تملى ¾ البرطمان او العلبة اللي هتحطي فيها.

– 2 معلقة كبيرة طين البحر الميت “من عند العطار”.

– 5 نقط من زيت شجرة الشاي.

– نقطتين من زيت اللافندر.

الطريقة:

اخلطي العسل مع الطين وقلبيهم كويس مع بعض وبعدين حطي زيت شجرة الشاي وزيت اللافندر وقلبيهم, لما نيجي نستخدمه هناخد معلقة من الخليط ده ونبل بشرتنا بمية دافية عشان نفتح المسام ونحط الخليط على البشرة وندلكها في حركات دائرية لمدة دقيقة وبعدين نغسل البشرة بمية دافية, وممكن تستخدمي الغسول ده كماسك وتسيبيه 20 دقيقة وبعدين تغسليه, استخدمي الغسول يوميا بينضف البشرة بعمق, ومناسب لكل انواع البشرة وخصوصا البشرة الحساسة.

غسول البشرة بمكونات طبيعية 4
غسول البشرة بمكونات طبيعية 4

5- الوصفة الخامسة:

المكونات:

– 3 معالق كبيرة زيت جوز الهند.

– معلقة كبيرة عسل نحل.

– معلقة كبيرة صودا الخبز “الكربوناتو”.

الطريقة:

هندوب زيت جوز الهند في حمام مية سخنة وبعدين نضيف عليه باقي المكونات ونقلبها مع بعض كويس, وبعدين نحط الخليط في برطمان او علبة ونستخدمه وعادي لو لقتيه اتجمد او بقى شبه الكريم لانه زيت جوز الهند هيتجمد تاني, لما نيجي نستخدمه هناخد معلقة منه وندلك بيها البشرة بأطراف الصوابع في حركات دائرية لمدة دقيقة وبعدين نغسل البشرة بمية دافية وننشفها, الغسول ده منظف ومزيل للمكياج, ومرطب للبشرة, وكمان مقشر, مناسب لكل انواع البشرة وخصوصا الحساسة.

غسول البشرة بمكونات طبيعية 5
غسول البشرة بمكونات طبيعية 5

6- الوصفة السادسة:

المكونات:

– ¼ كوباية زيت جوز الهند.

– 2 معلقة كبيرة عسل نحل.

– 5 نقط من زيت اللافندر.

الطريقة:

هنخلط كل المكونات مع بعض ونحفظهم في علبة, ولما نيجي نستخدمه هنبل البشرة بمية دافية وناخد من الخليط ندلك البشرة في حركات دائرية لمدة دقيقة وبعدين نغسله بمية دافية.

غسول البشرة بمكونات طبيعية 6
غسول البشرة بمكونات طبيعية 6

شوفي كمان 7 طرق لعمل الكريم المرطب بمكونات طبيعية

طرق لعمل الكريم المرطب بمكونات طبيعيةعمل الكري
طرق لعمل الكريم المرطب بمكونات طبيعيةعمل الكري

مقالات متعلقه

4 أخطاء بتعمليهم لما تغسلي وشك، اعرفيهم وتجنبيهم

4 أخطاء بتعمليهم لما تغسلي وشك، اعرفيهم وتجنبيهم

وصفة لتنقية وتنظيف البشرة في البيت بمكونات سهلة وبسيطة

وصفة لتنقية وتنظيف البشرة في البيت بمكونات سهلة وبسيطة

نصايح ازاى تتخلصى من الرؤوس السوداء بشكل صحيح

نصايح ازاى تتخلصى من الرؤوس السوداء بشكل صحيح