30 خطوة هتخليكي تعيشي حياة مثالية سعيدة .. اعرفيهم معانا

ريهام محمود
ريهام محمود
13511

كلنا بنحلم اننا نعمل تغيير جذري في حياتنا او نعيش الحياة بشكل مختلف بس المشكلة هي بتكون نحقق ده ازاي ؟ وازاي نقدر نغير حياتنا للاحسن ونعيش مبسوطين وتكون حياتنا مثالية وراضيين عنها, النهاردة احنا جايبين لكم من خلال المقال بتاعنا 30 خطوة تقدري تحققي بيها ده وتعملي تغيير جذري لحياتك وتعيشي حياة مثالية سعيدة…

30 خطوة هتخليكي تعيشي حياة مثالية سعيدة:

30 خطوة هتخليكي تعيشي حياة مثالية سعيدة 1
30 خطوة هتخليكي تعيشي حياة مثالية سعيدة 1

1- قضي وقتك مع الاشخاص الصح:

قضي وقتك مع الاشخاص اللي بتحبيهم وبتكوني مبسوطة وانتي معاهم واللي بيأثروا على حياتك وحالتك النفسية بشكل ايجابي يعني خليكي قريبة من الناس اللي بيدوكي طاقة ايجابية وابعدي عن الاشخاص اللي بيدوكي طاقة سلبية او كل ما تقعدي معاهم تحسي انك مخنوقة ومتضايقة لان دول بيسحبوا من طاقتك وبيأثروا على حالتنا النفسية بشكل سلبي جدا.

2- واجهي مشاكلك:

متهربيش من مشاكلك او تتجنبيها لكن الصح انك تواجهيها وتحليها وتاخدي فيها قرارات حاسمة لكن لو هتتجنبي كل مشكلة هتقابلك هتلاقي في الاخر حياتك كلها مشاكل ومش هتعرفي تحليها.

3- خليكي صادقة مع نفسك:

خليكي صادقة وصريحة مع نفسك, يعني لو في اي عيب في شخصيتك مثلا حابة تغيريه يبقى واجهي نفسك بالعيب ده واسعي انك تغيريه, وخليكي صادقة مع نفسك في اللي هتقدري تغيريه وتحققيه في حياتك واللي مش هتقدري تغيريه, يعني خليكي صريحة مع نفسك في كل جوانب حياتك سواء العملية او الشخصية عشان تقدري تغيري نفسك وحياتك للأحسن.

4- خلي سعادتك اولوية في حياتك:

خلي دايما سعادتك وحياتك ونفسك ليها الاولوية قبل اي حاجة تانية, اعملي الحاجات اللي بتبسط, وبعد ما تحققي سعادة نفسك هتقدري ساعتها تقدمي المساعدة لغيرك او للناس اللي حواليكي ومحتاجين منك المساعدة.

5- خليكي نفسك وخليكي فخورة بنفسك:

خليكي نفسك متحاوليش تقلدي حد او تعيشي حياة شخص تاني لكن دايما خليكي انتي ولازم تكوني فخورة بنفسك, لان كل شخص فيه عيوب ومميزات وفي نقط ضعف ونقط قوة وجوه كل واحد فينا جمال مختلف عن التاني, دوري دايما عن نقط قوتك والجمال اللي جواكي والحاجة اللي بتميزك واظهريها.

6- عيشي الحاضر بتاعك:

عيشي الحاضر واللحظة اللي انتي فيها لان دي هي المضمونة ومترهقيش نفسك او تبوظي لحظة سعادة بانك تفكري في حاجة حصلت في الماضي او ايه اللي هيحصل في المستقبل لان ده في ايد ربنا لكن انتي اعملي اللي عليكي بس وعيشي يومك ولحظتك وانبسطي واستمتعي بحياتك.

7- اتعلمي من اخطائك:

اكيد كلنا بنقع في اخطاء في حياتنا لكن مش عيب اننا نغلط لان الغلط ده هو اللي بيعلمنا دروس في الحياة اهم حاجة اننا نتعلم من الاخطاء دي ومنكررهاش تاني, يعني ممكن نفشل مرة واتنين لكن الاهم اننا نقوم تاني ونكمل ونحسن من نفسنا وقدراتنا ونوصل لاهدافنا ونحققها.

8- حبي نفسك زي ما انتي:

لازم تحبي نفسك زي ما انتي مش زي ما الناس عايزة تشوفك لان لو انتي محبتيش نفسك متنظريش من اللي حواليكي يحبوكي لان زي ما انتي بتحسي بنفسك او بتشوفي ناسك اللي حواليكي هيشوفوكي بنظرتك لنفسك.

9- اتمتعي بالحاجات اللي عندك:

اتمتعي بالحاجات اللي بالفعل عندك يعني متبصيش لغيرك انه عنده حاجة اكتر منك, لان كل انسان بيكون في حياتة حاجة نقصاه عشان كده متفكريش في اللي مش عندك واتمتعي باللي انتي تملكيه, وفي النهاية طموح الانسان مش بينتهي لكن لو فضلنا نجري ورا اللي عند غيرنا انه يبقى عندنا هتلاقي الحياة مرت بيكي وانتي بتحاولي توصلي للي عند غيرك من غير ما تتمتعي باللي انتي اصلا حققتيه او تملكيه.

10- اصنعي سعادتك بنفسك:

متستنيش حد تاني يجي يسعدك او يكون سبب سعادتك انتي لازم تسعدي نفسك من جواكي, وتشوفي الايجابيات اللي في حياتك, السعادة هتتوجد في حياتك لما انتي تقرري تعيشي حياتك سعيدة.

30 خطوة هتخليكي تعيشي حياة مثالية سعيدة 2
30 خطوة هتخليكي تعيشي حياة مثالية سعيدة 2

11- ادي احلامك وافكارك فرصة لتحقيقها:

كلنا عندنا احلام عايزين نحققها ادي فرصة لاحلامك لتحقيقها وانتهزي الفرص اللي ممكن تيجي قدامك تساعدك تحققيها ومتخافيش من الفشل لان في الحياة مافيش حاجة مضمونة بنسبة 100% كل حاجة فيها احتمالات النجاح والفشل بس اهم حاجة اننا نجرب وندي فرصة لاحلامنا انها ممكن تتحقق.

12- خليكي واثقة في خطواتك:

خليكي دايما واثقة في نفسك وفي انك ممكن تاخدي خطوة تانية في حياتك وتتقدمي وتعملي حاجة اكتر من اللي انتي فيها, عشان لما تيجي فرصة قدامك متتردديش وتقدري تستغليها في انك تحققي اللي انتي عايزاه.

13- وسعي دايرة علاقاتك واعملي علاقات جديدة:

حاولي تعرفي ناس اكتر وتوسعي دايرة العلاقات بتاعتك بس لازم تختاري الناس اللي انتي ترتاحي معاهم وشايفة انهم قريبين من شخصيتك يعني اختاري الناس والاصدقاء اللي انتي تفتخري بمعرفتهم وتكوني مبسوطة بيها ويكون في بينكم احترام وتقدير متبادل , وعشان تختاري صح اختاري على اساس افعال الاشخاص لان الافعال اكيد بتكون اكتر صدق من الكلام يعني الاشخاص اللي ليهم مواقف ايجابية معاكي هما دول اللي تقربي منهم وتدخليهم في دايرة الصداقة بتاعتك.

14- ادي فرصة لاشخاص جداد يدخلوا حياتك:

العلاقات بتختلف وبتتغير مع الوقت ومرور السنين والاصدقاء اللي كانوا معاكي قبل كده ممكن يكونوا غير اللي معاكي دلوقتي لان كل حاجة بتتغير وفي علاقات بتستمر وعلاقات بتنتهي, عشان كده لازم ندي فرصة لناس جديدة تدخل حياتنا وخليكي واثقة في حكمك على الاشخاص بس خليكي دايما مستعدة لمواجهة اي حاجة في العلاقات الجديدة, او انك ممكن تتعلمي حاجة من حد وتكتسبي خبرات او تقابلي اشخاص ممكن يغيروا حياتك يعني خليكي دايما مستعدة لاي حاجة.

15- نافسي نفسك:

اكيد كلنا ممكن نكون شايفين اشخاص حوالينا حابين نكون زيهم او نوصل للي هما وصلوا ليه ودي حاجة ايجابية جدا بس دايما خلي المنافس الوحيد ليكي هو نفسك انتي نافسي نفسك واتحديها انك توصلي للي انتي عايزاه.

16- افرحي للناس اللي حواليكي:

خلي دايما عندك الروح الرياضية انك تفرحي لنجاحات الناس اللي حواليكي وتهنيهم عليها, يعني منقولش مثلا ليه الشخص ده وصل او حقق حاجة وانا لا لان الشعور ده هيخلينا منحققش حاجة في حياتنا, وخليكي مؤمنة انه هيجي يوم واللي حواليكي هيفرحولك زي ما انتي فرحتيلهم ويهنوكي على حاجة قدرتي تحققيها.

17- دوري على الجانب المشرق في اي مشكلة او موقف صعب:

كلنا بنتعرض لمشاكل ومواقف صعبة في حياتنا لكن حاولي في الاوقات دي متحبطيش وانك تدوري على الجانب المشرق في المشكلة او الموقف اللي حصلك وان دايما في امل, وتفكري بشكل ايجابي وان المواقف الصعبة بتخلينا اقوى يعني مش بسبب مشكلة واحدة او موقف صعب تحسي ان حياتك فاشلة او ان ده خلاص النهاية لا افتكري اللي انتي حققتيه في حياتك ونجحتي فيه ساعتها هتقدري تتخطي اي مشكلة.

18- سامحي نفسك واللي حواليكي:

كلنا ممكن نكون عانينا بسبب قرارات غلط احنا خدناها او قرارات من اللي حوالينا وممكن المعاناة دي تستمر معانا فترة, لكن الحل ليها انك تعودي انك تسامحي نفسك ومتفضليش تأنبي نفسك او تحسسي نفسك او اللي حواليكي بالذنب, وممكن يكون نسيان الماضي صعب وخصوصا لو حاجة مسببة لنا الم نفسي لكن خليكي واثقة انك تقدري تتخطيها وتكملي حياتك وتعتبريها تجربة اتعلمتي منها حاجة.

19- ساعدي اللي حواليكي:

حاولي دايما تكوني حاسه باللي حواليكي ولو في ايدك حاجة تساعديهم متتأخريش عن المساعدة لان تأكدي ان المساعدة دي هتتردلك في يوم ما تحتاجي حد يساعدك في اي موقف او اي مشكلة تحصل في حياتك.

20- اسمعي صوتك الداخلي:

خليكي دايما واثقة في احساسك واتكلمي مع نفسك واسمعي صوت قلبك واحساسك في قراراتك وخليكي صادقة مع نفسك, او ممكن تستشيري اقرب الناس ليكي اللي بتثقي في رأيهم وتتناقشي معاهم في اللي انتي بتفكري فيه وتشاركيهم معاكي.

30 خطوة هتخليكي تعيشي حياة مثالية سعيدة 3
30 خطوة هتخليكي تعيشي حياة مثالية سعيدة 3

21- ادي نفسك استراحة:

كل فترة او لما تحسي انك مجهدة ومضغوطة لازم تاخدي فترة راحة تستعيدي فيها نشاطك وتستجمعي نفسك وتشوفي كل اللي انتي حققتيه, فترة راحة قصيرة هتكون مفيدة اوي ليكي عشان تقدري تكملي بعدها بنشاط اكتر.

22- لاحظي الجمال في اللحظات الصغيرة او البسيطة:

مش لازم تستني حاجة كبيرة اوي تحصل في حياتك عشان تحسي بجمالها, ممكن حاجات بسيطة في الحياة هي اللي تسعدنا وتفرق معانا عشان كده حاولي تحسي بجمال الحاجات الصغيرة وتنبسطي بيها يعني ممكن يبسطك انك قعدة مع شخص معين, او قعدة في مكان معين, او انك عايشة حياة اسرية مستقرة اللي احيان كتير مش بنحس بده واحنا عايشين فيه, كل الحاجات دي هتعمل فرق جدا في حياتك لما تحسي بجمالها وتعيشيها.

23- اقبلي كل حاجة زي ما هي:

من اكبر التحديات اللي بتقابل اي حد عايز يغير من نفسه للاحسن ان هو يقبل اي حاجة حواليه زي ما هي ساعات كتير بيكون من الافضل اننا نقبل المجتمع والناس حوالينا زي ما هما بدل ما تحاولي تغيري في حاجة صعب او مستحيل تتغير ومافيش حياة في اي مكان بتكون كاملة ودايما في مقولة بتقول “اتعلم تحب الاشياء وتعرف قيمتها وهي مش كاملة”.

24- حققي اهدافك خطوة خطوة:

 زي ما بيتقال مشوار الالف ميل يبدأ بخطوة تحقيق الاهداف كمان بيتحقق خطوة خطوة يعني منستعجلش في تحقيق اهدافنا ونمشي فيها خوة خطوة لحد ما نوصل لهدفنا.

25- عبري عن مشاعرك اكتر:

خليكي منفتحة اكتر في التعبير عن مشاعرك وانك تحكي اللي جواكي للمقربين ليكي او للاشخاص اللي بتثقي فيهم, لان الفضفضة دي ليها تأثير ايجابي جدا على الحالة النفسية مجرد ما هتحكي اللي جواكي هتحسي براحة نفسية كبيرة جدا وهتفرق معاكي اوي.

26- اتحملي مسئولية قراراتك واختياراتك:

لازم تتحملي مسئولية كل اختياراتك وقراراتك في حياتك, وتتحملي السلبيات والاخطاء لانك لو متحملتيش مسئولية حياتك هتدي فرصة لشخص تاني هو اللي ياخد عك القرارات او يدخل في حياتك ويبقى تحكم فيها, انتي الوحيدة اللي تتحكمي في حياتك مش اي شخص تاني وانتي اللي لازم تاخدي اي قرار خاص بيكي وتختاري حياتك تمشي ازاي.

27- ادي اهتمام لعلاقاتك الخاصة:

ادي جزء من وقتك لعلاقاتك وحياتك الخاصة وعبري عن مشاعر الحب والتقدير للناس اللي في حياتك, ومش مهم عدد الاصدقاء يكون كتير لكن الاهم انهم يكونوا دول الاصحاب الحقيقين اللي انتي بتحبيهم وعايزاهم يكونوا موجودين في حياتك.

28- ركزي على الحاجات اللي تقدري تغيريها:

اكيد احنا مش هنقدر نغير كل حاجة في حياتنا لان في حاجات بيكون صعب تغيرها فمتضيعيش طاقتك على اللي مش هتقدري تغيريه عشان متحبطيش لو مقدرتيش تغيريه, عشان كده حاولي تركزي وتوفري طاقتك للحاجات اللي تقدري تغيريها.

29- فكري بشكل ايجابي:

فكري بشكل ايجابي انك قادرة انك تحققي اي حاجة نفسك فيها وحاولي تتغلبي على الافكار والمشاعر السلبية مهما كانت الظروف او العقبات قدامك لان التفكير الايجابي هيديكي قوة انك تحققي اهدافك , لان انتي مش هتقدري تتحكمي في كل اللي بيحصل في حياتك او بتمري بيه لكن تقدري تتحكمي في طريقة التعامل معاه, وكل انسان عنده في حياته جوانب سلبية وايجابية لكن اللي بيفرق حد عن التاني هو التركيز على الجانب الايجابي في الحياة اللي بيخلينا نقدر نكمل حياتنا.

30- حسي بكل النعم والحاجات الحلوة في حياتك:

في النهاية واخر نصيحة دايما افتكري كل النعم والحاجات الحلوة اللي ربنا ادهالك في حياتك سواء كانت حاجات بسيطة وصغيرة او كبيرة  يعني شوفي انك مثلا بتاكلي وبتلبسي كويس, وعايشة في مكان كويس مرتاحة فيه وحواليكي اهلك واصحاب بيحبوكي, وانك بصحة كويسة, او انك وصلتي لمرحلة التعليم اللي انتي عايزاها, وان في حاجات كتير اوي موجودة عندك من غير حتى ما تتعبي فيها هتحسي ساعتها انك غنية جدا باللي عندك واللي في غيرك كتير ممكن يكونوا بيتمنوه, يعني الرضا عن حياتنا ده في حد ذاته هيخلينا نحس بالسعادة ونعيش مرتاحين.

30 خطوة هتخليكي تعيشي حياة مثالية سعيدة 4
30 خطوة هتخليكي تعيشي حياة مثالية سعيدة 4

اعرفي كمان ازاي تغيري حياتك للأفضل في شهر واحد بس !

ازاي تغيري حياتك للأفضل في شهر واحد بس
ازاي تغيري حياتك للأفضل في شهر واحد بس

مقالات متعلقه

جمل لو قولتيهم لشريكك هتخليه يدوب في حبك

جمل لو قولتيهم لشريكك هتخليه يدوب في حبك

7 حاجات المفروض الست متغيرهمش في نفسها عشان زوجها

7 حاجات المفروض الست متغيرهمش في نفسها عشان زوجها

7 حاجات الرجالة بيكونوا عايزينها موجودة في العلاقة

7 حاجات الرجالة بيكونوا عايزينها موجودة في العلاقة