اعرفوا معانا الماسك الهندي الفعال لتنعيم الشعر وتغذيته

طبعا كلنا بنشوف شعر الهنود قد ايه حلو وناعم وتقيل وعلى طول بيلمع والسر في ده انهم على طول بيهتموا بيه بالماسكات المغذية للشعر واحنا النهاردة جايبين لكل بنات حوا سر من اسرار جمال شعر الهنود واحد من الماسكات المشهورة في الهند اللي كل الهنديات بيعملوه لشعرهم, الماسك ده بينعم الشعر وبيغذية وبيعالج التلف والتقصف وبيخليه بيلمع وشكله صحي.

تعالوا نشوف مع بعض الماسك الهندي لتنعيم الشعر:

المكونات:

– 1 كوب حنة “وتكون بلون او من غير لون حسب اختياركم”.

– 3 صفار بيض.

– ½ كوباية قشطة حامضة ساور كريم اللي بنستخدمها في الطبخ او ” قشطة عادية, او زبدة, او زبادي”.

– ½ معلقة كبيرة عصير ليمون.

– 2 كوب شاي اسود “او شاي اخضر, او شاي البابونج”.

طريقة التحضير:

– اول حاجة هنجيب كوبايتين الشاي نضيف عليهم 3 كوبايات مية ونحطه على النار ونسيبه يغلي لحد ما الكمية تبقى النص وبعدين هنصفيه كويس من تفل الشاي وبعدين نضيف عليه الحنة ونقلبهم مع بعض كويس ونسيب الخليط لحد ما يبرد خالص.

– اثناء ما احنا سايبينه يبرد هنخلط القشطة او الزبدة او الزبادي المكون اللي احنا اخترناه مع صفار البيض وعصير الليمون ونضربهم مع بعض كويس هيكون خليط الحنة والشاي بتاعنا برد هنضيفهم عليه ونقلبهم مع بعض لحد ما يمتزجوا مع بعض كويس.

طريقة الاستخدام:

– هنغسل الشعر ونسيبه لحد ما ينشف شوية يعني يبقى ما بين الناشف والمبلول هنوزع الخليط على الشعر كله من الجذور للأطراف وممكن نستخدم فرشة الصبغة عشان نوزعه كويس على الشعر ناخد خصلة خصلة ونحط عليها الخليط.

– بعد ما نخلص الشعر كله هنغطيه بكيس بلاستيك او بطاقية الشعر, هنسيبه على الشعر من ساعة لتلات ساعات.

– بعد كده هنغسل الشعر بمية دافية مش سخنة ننزل الماسك من الشعر كويس وبعدين نغسله عادي بالشامبو والبلسم.

– القناع ده يتكرر مره واحدة بس في الشهر ودي الميزة فيه انك مش محتاجة تعمليه اكتر من مره في الاسبوع لانه تأثيره بيقعد فترة طويلة على الشعر مش محتاج يتكرر كتير.

ياللا يا بنات جربوا الماسك وقولوا لنا النتايج :)

شوفوا كمان وصفات طبيعية لفرد الشعر المجعد