اكتر 10 اخطاء بنقع فيهم في اختيار الوان ديكور البيت !
اتكلمنا قبل كده عن اهمية اختيار الوان البيت قد ايه بتفرق في الديكور وجو البيت وكمان تأثير الالوان على المود وازاي نختار الالوان المناسبة لكل غرفة, لكن ساعات كتير لما بنيجي نختار الالوان بنقع في اخطاء من غير ما ناخد بالنا وبيطلع الشكل في النهاية مش حلو, عشان كده احنا النهاردة جايبينكم اكتر 10 اخطاء ممكن تكونوا بتقعوا فيهم في اختيار الوان ديكور البيت.
اكتر 10 اخطاء بنقع فيهم في اختيار الوان ديكور البيت:
1- استخدام اللون الابيض زيادة عن اللزوم:
من الاخطاء اللي ممكن نقع فيها اننا نختار الالوان كلها ابيض في ابيض يعني الوان الحيطة والاثاث وكل حاجة في الاوضة يبقى لونها ابيض ده غلط جدا لان هيخلي شكل الاوضة ممل اوي وباهت, عشان كده لازم نحط لمسات من لون تاني مع اللون الابيض عشان تدي حياة للمكان.
2- تقسيم الالوان بطريقة غلط:
في كتير بيختاروا انهم يقسموا الحيطة الوان مختلفة يعني بيعملوا كل جنب لون مختلف في الحالة دي لازم نختار تناسق الالوان صح, لان من الحاجات الغلط اللي بنقع فيها اننا نختار تقسيم الوان مش متناسق او مش ماشي مع بعضه او تعملي تقسيمات الوان زيادة وفي النهاية بيطلع الشكل مش حلو.
3- التباين في الالوان:
ضروري نختار تباين في الالوان ما بين الحيطة والاثاث يعني مينفعش مثلا نكون عاملين الحيطة باللون البيج ونختار اثاث بنفس اللون لان المكان شكله هيطلع ممل اوي ومافيش فيه حياة عشان كده اختاري الوان متناقضة يعني لو الحيطة فاتحة اختاري اثاث بلون غامق والعكس.
4- الاضاءة:
لما نيجي نختار الالوان لازم نحط في اعتبارنا واحنا بنختارها هيكون شكلها ايه في الاضاءة لان طبعا الاضاءة الطبيعية اللي بالنهار بيكون شكل الالوان فيها مختلف عن الاضاءة الصناعية اللي هي باللمبات, عشان كده واحنا بنختار الالوان نحاول نختارها صح وتكون حلوة في اضاءة الصبح وبالليل.
5- اختيار الوان الارضيات والسقف اخر حاجة:
الوان الارضيات والسقف دي المفروض بتبقى اخر حاجة نختارها بعد اختيار الوان الحيطة والاثاث لاننا بنختار على اساسهم الالوان اللي تمشي للارضيات والسقف لانهم بيكملوا الشكل النهائي للديكور.
6- توزيع غير صحيح للالوان:
لو هنختار نعمل اكتر من لون في نفس الاوضة منختارش الالوان بنسب متساوية يعني ميكونش مثلا نص الاوضة ابيض ونصها احمر لان ده غلط والشكل هيطلع مش حلو, الصح اننا نختار لون اساسي يبقى بنسبة 60% من مساحة الاوضة ونختار لون تاني يمشي معاه لباقي المساحة يعني يبقى لمسات وتاتشات بس بلون تاني مع اللون الاساسي.
7- اختيار مزيج الوان متناقضة غلط:
مزج الالوان ده محتاج اختيار دقيق جدا خصوصا لو هنختار الوان عكس بعض او متناقضة مع بعض ممكن نقع في غلطة اننا نختار الوان مش ماشية مع بعض ونلاقي الشكل طلع في الاخر مزعج جدا عشان كده لازم ناخد بالنا واحنا بنختار لان في خط رفيع ما بين اختيار الوان متناقضة وتطلع بشكل انيق وبين اننا نختار الوان تطلع ذوقها مش حلو.
8- اختيار لون واحد:
من الغلطات اللي بنقع فيها اننا نختار لون واحد لالوان الحيطان والوان الاثاث, الافضل اننا نحط لمسات بدرجات الوان مختلفة ما بين الوان الحيطة والاثاث هتدي شكل احلى وانيق اكتر بكتير من اللون الواحد.
9- اختيار مزيج الوان متناسقة:
مزيج الالوان في الاوضة الواحدة بيدي شكل حلو اوي للديكور بس مهم جدا اننا نختار الوان متناسقة مع بعض ما بين الوان الحيطة والاثاث والسقف والارضيات عشان يطلع الشكل النهائي حلو ومش مزعج.
10- الالوان الفاقعة:
مش مفضل اننا نختار الوان فاقعة بشكل مبالغ فيه لانها هتبقى مزعجة للعين جدا, لو عايزة تدخلي لون فاقع او زاهي اوي ممكن تختاريه في اماكن بسيطة في الاوضة يعني في جنب واحد بس من الحيطة مثلا او في قطع ديكور معينة او في كورنرات, يعني تبقى لمسات بسيطة تدي حياة للمكان وفي نفس الوقت يبقى مريح للعين والاعصاب.