تمارين الكارديو لحرق الدهون بشكل سريع جدا .. اعرفيهم معانا

ريهام محمود

في

22160

تمارين الكارديو هي تمارين تدريب القلب والاوعية الدموية وببساطة اكتر هي نوعية التمارين اللي بتحتاج مجهود عالي وبترفع معدل ضربات القلب لفترة طويلة وهي تعتبر من افضل التمارين الرياضية اللي بتساعد على حرق الدهون بشكل سريع جدا ومفيدة للصحة بشكل عام, والنهاردة من خلال المقال بتاعنا هنتعرف بالتفصيل على فوايد تمارين الكادريو, وهنشوف مع بعض تمارين تقدري تنفذيها في البيت بكل سهولة.

– فوايد تمارين الكارديو:

1- من اهم فوايد تمارين الكارديو هي حرق الدهون بشكل سريع جدا وبناء عضلات الجسم, وبتحسن شكل الجسم.

2- بتحسن المزاج جدا وبتقلل من الاكتئاب, لان دراسات كتير اثبتت ان تمارين القلب ليها تأثير كبير على المزاج وبتخليكي تحسي بالسعادة.

3- بتقلل من التعب الذهني, وبتدي الجسم طاقة وبتخليكي نشيطة على طول.

4- ليها تأثير ايجابي جدا على الصحة بشكل عام وبتحمي من خطر الاصابة بامراض كتير زي امراض القلب, والسكر وغيرها.

5- من اهم مميزات التمارين دي انها مش بتحتاج معدات رياضية ولا محتاجة تروحي لجيم عشان تعمليها ممكن تنفذيها في البيت بكل سهولة.

– انواع تمارين الكارديو:

– تمارين الكارديو ليها انواع كتير زي المشي, والجري, وركوب العجل, السباحة, او الرياضات الجماعية زي كرة السلة, وكرة القدم, والتمارين اللي ممكن نعملها في البيت زي اللي هنشوفها مع بعض في المقال بتاعنا, يعني كل الرياضات اللي بتحتاج حركة مستمرة ومجهود تعتبر تمارين كارديو.

– بالنسبة للي مش عايزين يخسوا وعايزين يحافظوا على وزنهم بس ممكن يمارسوا كارديو خفيف زي المشي لمدة 20 دقيقة يوميا, وللي عايزين يخسوا ويحرقوا دهون يمارسوا تمارين الكارديو يوميا من 30 ل 60 دقيقة.

– تعالوا نشوف مع بعض مجموعة من تمارين الكارديو:

اول حاجة اعملي احماء ب 4 حركات كل حركة لمدة 30 ثانية, وبعدين ابدأي التمارين كل تمرين اعمليه بسرعة على قد ما تقدري لمدة دقيقة من غير ما تستريحي بين الحركات وبعد ما تخلصي التمرين استريحي لمدة دقيقة وبعدين كرريه تاني مرتين او تلاتة زي ما انتي عايزة.

1- التمرين 1:

خدي خطوة كبيرة لورا برجلك الشمال واتني الركبة, مع دفع الرجل اليمين لقدام واتأكدي ان مستوى الركبة في رجلك اليمين في نفس مستوى القدم وبعدين ترجعي تقفي وتبدلي وتعملي الحركة بالرجل اليمين, وتحافظي طول الوقت على الضهر والصدر مشدودين, كرري التمرين 10 مرات.

2- التمرين 2:

اقفي مفرودة وارفعي ايدك الاتنين مفرودين فوق راسك وبعدين انزلي بجسمك كأنك هتقعدي زي ما بتعملي تمرين السكوات وحافظي على الضهر مفرود وارجعي اقفي تاني, وكرري التمرين 10 مرات.

3- التمرين 3:

نامي على الارض وافردي ايدك الاتنين جنبك واتني الركبتين وخلي القدمين تحت الركبتين على طول, وبعدين ابدأي ارفعي منطقة الوركين بعيد عن الارض وبعدين رجعي ضهرك على الارض ببطء, وانتي بتعملي التمارين حافظي على ان الرقبة والضهر يكونوا مسترخيين مش مشدودين او واخدين وضع غلط, كرري التمرين 10 مرات.

4- التمرين 4:

اسندي باطراف صوابعك وبايدك على الارض كأنك هتعملي ضغط وخلي الذراعين تحت مستوى الكتفين بالظبط وشدي جسمك خلي الضهر مفرود في خط مستقيم من الرقبة لحد القدمين, وبعدين المسي بايدك اليمين كتفك الشمال, وبدلي المسي بايدك الشمال كتفك اليمين, كرري التمرين 10 مرات.

5- التمرين 5:

هناخد نفس وضعية التمرين اللي فات بالظبط, وبعدين هنرفع الرجل اليمين وندفع الركبة لنص الجسم, ونبدل ونعمل الرجل التانية بنفس الطريقة, اعملي التمرين ده بأكتر عدد ممكن من العدات على قد ما تقدري لمدة دقيقة.

6- التمرين 6:

هتقفي مفرودة وترفعي ايديكي لفوق وتنطي وبعدين تنزلي مع تني الركبة وتسندي ايديكي على الارض وتفردي جسمك كله لورا وتنزلي بمنطقة الصدر قريب من الارض كأنك بتعملي ضغط, وبعدين ترجعي تقفي تاني وتكرري التمرين بأكتر عدد من العدات اللي تقدري عليها لمدة دقيقة.

7- التمرين 7:

خدي وضع القرفصاء اتني الركبتين ورجعي الذراعين لورا وبعدين نطي نطه عالية على قد ما تقدري مع فرد الذراعين لفوق, وبعدين تنزلي تاني في وضع القرفصاء وتكرري التمرين بأكتر عدد من العدات لمدة دقيقة.

8- التمرين 8:

اقفي بشكل مستقيم وخلي الرجلين الاتنين لازقين في بعض وابدأي نطي للجنب من الشمال لليمين ومن اليمين للشمال بشكل سريع لان اهم حاجة في التمرين ده التركيز على السرعة, وحافظي على جسمك مفرود, كرري التمرين بأكبر عدد من العدات لمدة دقيقة.

9- التمرين 9:

نامي على الارض وارفعي الوركين والركبتين بزاية 90 وخلي ايديكي الاتنين مفرودين جنبك, وابدأي ارفعي راسك مع الكتفين واعلى الضهر عن الارض مع مد الذراعين وخدي عشر مرات شهيق وزفير وانتي في الوضع ده وبعدين ارجعي نامي على الارض تاني, وكرري التمرين 10 مرات.

10- التمرين 10:

اسندري على الارض بأطراف صوابع الرجل وبالايد على الارض وخلي جسمك مفرود وبعدين ارفعي منطقة المؤخرة لفوق وحافظي على الركبتين مفرودين وممكن تخلي فيهم تنيه بسيطة بس واضغطي بايدك على الارض, ومنطقة الكتفين تبقى لتحت والراس بين الذراعين, خدي نفس عميق خمس مرات او اكتر على قد ما تقدري وانتي في الوضع ده وبعدين اعدلي جسمك للوضع الاولاني, كرري التمرين 10 مرات.

11- التمرين 11:

اسندي بالركبتين والايدين على الارض وخلي ايدك تحت الكتفين والركبتين تحت منطقة الوركين, وبعدين لفي العمود الفقري وقوسي منطقة الضهر لقدام من غير ما تحركي الركبتين او الذراعين من مكانهم ونزلي راسك لتحت, خدي نفس عميق خمس مرات او اكتر وبعدين رجعي جسمك للوضع الاولاني وارفعي راسك ودقنك لفوق وكرري التمرين 10 مرات.

12- التمرين 12:

اقفي وافتحي رجلك وخلي قدم الرجل اليمين للجنب وقدم الرجل الشمال لقدام واتني ركبتك اليمين وافردي ايديك للجنبين خدي نفس عميق لمدة خمس مرات او اكتر وبعدين بدلي واعملي نفس الحركة للرجل التانية, كرري التمرين 10 مرات.