13 طريقة طبيعية لتنضيف البيت من مكونات طبيعية تماما .. اعرفيهم معانا

ريهام محمود
ريهام محمود
3913

احنا اتكلمنا قبل كده على خدع وحيل لتنضيف البيت بطرق سهلة وسريعة, النهاردة احنا جايبين لكم 13 مكون طبيعي موجودين في كل بيت ممكن تستخدميهم في التنضيف وفي نفس الوقت نتيجتهم فعالة جدا والاهم انهم اامن من المواد الكيماوية اللي ممكن تضر جلدنا وصحتنا مع الاستخدام المستمر ليها, والمواد دي تعتبر بدائل للمنظفات اللي احنا بنشتريها من بره يعني مش هتحتاجي تستخدمي معاها اي حاجة تانية.

13 طريقة طبيعية لـ تنضيف البيت من غير مواد كيماوية:

1- الليمون:

الليمون مطهر رائع جدا وفعال في ازالة الزيوت والدهون وبقع الصابون من البلاط وبيحمي الاسطح من تكون البكتيريا والعفن عليها, ده غير انه معطر طبيعي للجو عشان كده هو يعتبر بديل هايل لمنظفات المطبخ والحمام.

– ممكن تستخدميه لتنضيف الميكروويف هتضيفي 3 معالق كبيرة عصير ليمون ل400 ملل مية وتحطيهم في طبق وتحطيه في الميكروويف وتشغليه وتسيبيه عشر دقايق هينضف الميكروويف كله من جوه.

– ممكن تنضفي الحنفيات المجيرة من اثار بقع الصابون بانك تفركيها بعصير الليمون, وممكن تنضفي بيه بلاط الحمام والمطبخ بنفس الطريقة.

– ممكن كمان تستخدمي الليمون انك تفركي بيه الاسماك واللحوم والفراخ وبعدين تشطفيها بالمية العادية الطريقة دي هتخلصك من الريحة الزفرة اللي بتبقى فيهم.

13 طريقة طبيعية لتنضيف البيت من غير مواد كيماوية 1
13 طريقة طبيعية لتنضيف البيت من غير مواد كيماوية 1

2- الخل:

الخل كمان مطهر طبيعي وبيساعد جدا في تنضيف البقع, ويعتبر بديل لمنظف الازاز والشبابيك والبلاط والارضيات, وممكن عشان ريحة الخل النفاذة تضيفي له كام نقطة زيت لافندر هينضف ويديكي ريحة حلوة في نفس الوقت.

– ممكن تضيفي معلقة كبيرة خل للتر مية وحطي الخليط ده في ازازة ببخاخ ونضفي بيها المرايات والشبابيك.

– لتنضيف ارضيات الحمام رشي الخل على الارضية وسيبيه عشر دقايق وبعدين اغسليه بمية نضيفة.

– ممكن تنضفي الاحواض وصفاية الحوض والدش بالخل السخن, سخني الخل وهاتي قماشة بليها كلها كويس بالخل وحطيها على الصفاية او لفيها على الدش وسيبيها نص ساعة وبعدين شيليها واغسلي المكان بمية نضيفة, والحوض رشي عليه الخل وافركيه بفرشة هتلاقيه نضف.

13 طريقة طبيعية لتنضيف البيت من غير مواد كيماوية 2
13 طريقة طبيعية لتنضيف البيت من غير مواد كيماوية 2

3- الملح والكربوناتو:

الملح يعتبر مزيل للبقع وممكن تستخدميه في المطبخ والحمام ولتنضيف الادوات الصحية.

– عشان تطهري فوط المطبخ اواي سفنجة بتستخدميها للتنضيف انقعيهم في مية وملح وسيبيهم فترة وبعدين اغسليهم بمية عادية.

– عشان تتخلصي من الروايح الكريهة في التلاجة قبل ما تنضفيها حطي شوية ملح على السفن اب المياة الغازية العادية اللي احنا بنشربها وامسحي بيه التلاجة من بره ومن جوه.

– عشان تنضفي السجادة رشي عليها ملح وبعدين رشي فوقيه مية بسيط يعني متبليهاش خالص وسيبيه نص ساعة او لحد ما ينشف خالص وبعدين اشفطي الملح بالمكنسة, والطريقة التانية بالكربوناتو رشيها على السجادة وافركيها بالراحة بالفرشة وبعدين اشفطي الكربوناتو من على السجادة بالمكنسة او نفضيها.

13 طريقة طبيعية لتنضيف البيت من غير مواد كيماوية 3
13 طريقة طبيعية لتنضيف البيت من غير مواد كيماوية 3

4- بودرة المسطردة:

بودرة المسطردة تعتبر بديل فعال جدا لمنظف الاطباق لانها بتساعد في التخلص من الدهون والزيوت,  كل اللي هنعمله هنضيف معلقة صغيرة من بودرة المسطردة على كام لتر مية سخنة يعني ممكن 2 او 3 لتر ونحطهم في اي ازازة فاضية عندنا ونستخدمها بدل سايل غسيل الاطباق, والبودرة هنلاقيها عند العطار او في السوبر ماركت.

13 طريقة طبيعية لتنضيف البيت من غير مواد كيماوية 4
13 طريقة طبيعية لتنضيف البيت من غير مواد كيماوية 4

5- الكوكاكولا والبيبسي:

ايوه الكوكاكولا والبيبسي اللي احنا بنشربهم يمكن تكون معلومة غريبة وجديدة لكن هما يعتبروا منظفات فعالة جدا بيزيلوا بقع الصابون وبينضفوا الاسطح ممكن تنضفي بيهم اي حاجة في البيت الحمام, والدش, والحنفيات, والادوات الصحية, والبلاط, وحتى الطاسات والحاجات المحروقة, والافران.

– لو عندك اي طاسة محروقة اغلي فيها كمية من الكوكاكولا او البيبسي هتشيل اي اثار من الطاسة وهترجعها كأنها جديدة.

– كمان بيشيل الصدا من اي حاجة في البيت بليفة افركي مكان الصدا بالكوكاكولا او البيبسي هتلاقي الصدا راح منها.

– البلاعات المسدودة صبي فيها كوكاكولا او بيبسي وسيبيها طول الليل هتلاقيها اتسلكت.

13 طريقة طبيعية لتنضيف البيت من غير مواد كيماوية 5
13 طريقة طبيعية لتنضيف البيت من غير مواد كيماوية 5

6- اقراص فيتامين سي:

اقراص فيتامين سي هتلاقوها موجودة في الصيدلية تعتبر منظف فعال للحمام والبقع اللي بيبقى صعب نتخلص منها في قعدة التواليت.

– دوبي كام قرص فيتامين سي في شوية مية وحطي الخليط في ازازة ببخاخ ورشي بيه قعدة التواليت كلها وسييه من بالليل للصبح وبعدين افركيه بالفرشة واغسليه بمية نضيفة.

13 طريقة طبيعية لتنضيف البيت من غير مواد كيماوية 6
13 طريقة طبيعية لتنضيف البيت من غير مواد كيماوية 6

7- زيت الزيتون:

زيت الزيتون يعتبر بديل لمنظف الاثاث والجلد والخشب.

حطي كام نقطة زيت زيتون على قماشة وامسحي بيهم الاثاث والاسطح الخشب والاثاث المصنوع من الجلد.

والاسطح والاثاث الخشب اللي دايما بيبقى فيها خدوش لو عايزة تتخلصي منها اخلطي نص كوباية زيت زيتون مع نص كوباية خل وامسحي بيهم مكان الخدوش هتلاقيها اختفت ولو الخدوش كبيرة ومرحتش من اول مره ممكن تكرريها تاني بعد كام يوم لحد ما تختفي.

13 طريقة طبيعية لتنضيف البيت من غير مواد كيماوية 7
13 طريقة طبيعية لتنضيف البيت من غير مواد كيماوية 7

8- الزيوت الاساسية:

الزيوت الاساسية تعتبر معطر ومعقم طبيعي للجو, ممكن تستخدميها كمعطر او تنضفي بيها الارضيات الخشب, والمطبخ, والحمام.

– اخلطي كميات متساوية من زيت اللافندر وزيت شجرة الشاي, وامسحي بيها رخامات المطبخ, ولوح تقطيع الاكل, وممكن تنضفي بيه بلاط الحمام.

– عشان تنضفي ارضيات الحمام او المطبخ ضيفي 30 نقطة من زيت اللافندر وزيت شجرة الشاي ل 5 لتر مية ونضفي الارضيات بالخليط ده غير انه هينضف وهيعقم المكان كمان هيدي ريحة حلوة اوي.

13 طريقة طبيعية لتنضيف البيت من غير مواد كيماوية 8
13 طريقة طبيعية لتنضيف البيت من غير مواد كيماوية 8

9- معجون السنان:

معجون السنان منظف ومزيل للبقع ممكن تستخدميه للاسطح والبلاط والحمام ولتنضيف الفضة.

– حطي كمية من معجون السنان على قماشة ونضفي بيها اي فضة عندك حتى لو قديمة اوي هترجع تلمع تاني.

– معجون السنان فعال جدا في التخلص من بقع الحبر, والمكياج, بقع الدهون والزيوت, وبقع القهوة والشاي من على السجاد, حطي المعجون على اي بقعة عندك وسيبيه عشر دقايق وبعدين اغسليه.

– دايما عندنا مشكلة على الترابيزات الخشب لما بنحط عليها الكوبايات بتعمل علامة ومش بنعرف نتخلص منها لكن معجون السنان هيخلصك منها بسهولة افركي العلامات دي بقماشة ناعمة عليها معجون سنان هتلاقيها اختفت.

– لو عندك علامات حبر او بقع على الحيطان افركيها بمعجون السنان هتطلع معاكي بسهولة.

تنضيف البيت من غير مواد كيماوية 1
تنضيف البيت من غير مواد كيماوية 1

10- بيروكسيد الهيدروجين او مية الاكسجين:

مية الاكسجين بديل لمنظفات الحمام والمطبخ ويعتبر مبيض طبيعي وليه خصائص مضادة للجراثيم.

– ممكن تنضفي بيه رخامات المطبخ بس حطيه على قماشة وامسحي بيه الرخامة, او لوح تقطيع الاكل, او العلب اللي بتحفظي فيها الاكل هينضفها ويعقمها, وهتلاقو مية الاكسجين في الصيدلية رخيصة جدا.

– اخلطي كمية من مية الاكسجين مع عصير الليمون ده يعتبر مبيض طبيعي للملابس كبديل للكلور.

– الكوبايات والاطباق البيضا اللي بتكون مصفرة او عليها بقع صابون انقعيها في مية سخنة مضاف ليها 2 معلقة كبيرة مية اكسجين وسيبيهم عشر دقايق وبعدين اغسليهم بمية نضيفة هتلاقيهم رجعوا كأنهم جداد.

تنضيف البيت من غير مواد كيماوية 2
تنضيف البيت من غير مواد كيماوية 2

11- الفحم:

الفحم العادي اللي احنا بنستخدمه في الشوي من الحاجات الفعالة جدا في التخلص من اي ريحة كريهة في التلاجة, او في سلة القمامة.

– ممكن تحطي قطعة فحم في شاشة وتعلقيها في التلاجة هتخلصك من اي ريحة مش حلوة فيها, وممكن تستخدمي اقراص الفحم اللي بتتباع في الصيدلية بس الاقراص اطحنيها وحطيها في طبق وحطي الطبق في اي مكان في التلاجة هيمتص اي روايح.

– وممكن تستخدمي الفحم تحطيه في سلة القمامة عشان يمتص اي روايح مش حلوة.

تنضيف البيت من غير مواد كيماوية 3
تنضيف البيت من غير مواد كيماوية 3

12- بودرة التلك:

بودرة التلك ممكن نستخدمها لتنضيف البقع من المفروشات والارضيات.

– لو عندك اي بقعة زيوت او دهون على الهدوم او المفروشات رشي عليها بودرة تلك وغطيها باي ورقة وحطي عليها حاجة تقيلة عشان يضغط عليها والبودرة تدخل جوه النسيج وتمتص البقع وسيبيها لتاني يوم وبعدين نفضي البودرة من عليها هتلاقي البقعة راحت.

– كمان ممكن تستخدميها لتنضيف الارضيات رشي الارضية بالبودرة وسيبيها عليها فترة وبعدين افركيها بفرشة واغسليها بمية نضيفة.

تنضيف البيت من غير مواد كيماوية 4
تنضيف البيت من غير مواد كيماوية 4

13- البطاطس النية:

البطاطس النية تعتبر منظف للشبابيك.

– افركي الشبابيك بشريحة بطاطس نية وبعدين امسحيها بقماشة ناشفة ونضيفة.

– لو عندك لوحات مرسومة عايزة تنضفيها قطعي 2 ثمرة بطاطس وحطيهم في اربعة لتر مية وسخنيهم مع بعض وسيبي المية دي في مكان دافي لمدة 24 ساعة وبعدين امسحي بيها اللوحات بتاعتك وبعدين امسحيها بسفنجة بمية نضيفة.

تنضيف البيت من غير مواد كيماوية 5
تنضيف البيت من غير مواد كيماوية 5

اعرفي كمان 24 حيلة ذكية هتساعدك على تنضيف البيت بسرعة وسهولة

24 حيلة ذكية هتساعدك على تنضيف البيت بسرعة وسهولة
24 حيلة ذكية هتساعدك على تنضيف البيت بسرعة وسهولة

مقالات متعلقه

ازاي تعملي ازالة السموم من البيت

ازاي تعملي ازالة السموم من البيت

12 عادة بسيطة هتساعدك تحافظي على البيت نضيف ومترتب على طول

12 عادة بسيطة هتساعدك تحافظي على البيت نضيف ومترتب على طول

15 حيلة هتساعدك تنضفي البيت بشكل اسرع وبطريقة سهلة وفعالة

15 حيلة هتساعدك تنضفي البيت بشكل اسرع وبطريقة سهلة وفعالة