ازاى تستغلى الاكسسوارات فى تحسين اللوك بتاعك؟!

اوقات كتير بيكون الطقم بتاعنا شيك و جديد بس بنحس انه فى حاجه ناقصة، و اوقات  تانية بنبقى مستعجلين و محتاجين نطلع بشكل stylish  و شيك فى اسرع و قت و مش عارفين نعمل كده ازاى، علشان كده فى المقال ده بنات حوا هتقولك ايه الحل ، فى المقال ده هنقولك ازاى تستغلى الاكسسوارات فى تحسين اللوك بتاعك و ازاى تقدرى تحولى بيه اى طقم عادى عندك لطقم فى منتهى الشياكه، مختلف و على الموضة و من غير اى تعب .

ازاى تستغلى الاكسسوارات فى تحسين اللوك بتاعك

نضارات الشمس :

نضارات الشمس بتعتبر حل سريع علشان تضيف اناقة لاى ستايل و كمان هتدارى عيونك لو تعبانة او مرهقة بعد يوم من غير نوم او شغل كتير ، و مثالية لاى مكان تروحيه لو كان المدرسة او الكلية او لو حتى مسافرة، يفضل انه يبقى عندك نضارة شمس او اتنين هيحمي عينك من اشعة الشمس الضارة خصوصا فى الصيف و كمان منطقة الجلد حوالين عينيكى لانها بتبقى رقيقة جدا و سهل انه يحصلها ضرر او انه يظهر فيها تجاعيد .حطى روج بلون فاتح مع النضارة الشمس علشان تخلى اللوك بتاعك مختلف .

الطاقيه:

الطاقيه قطعة اكسسوار مختلفة و جديدة ، ممكن فى الاول تستغربى شكلك بيها لانك مش متعودة عليها فى ستايلك بس هي كانت موضة جدا زمان ودلوقتي رجعت تاني ومع الوقت هتتعودى و هتحبى شكلك بيها جدا و كمان لو فى يوم كسلتى تعملى شعرك الطاقيه هتساعدك و يحل المشكلة دى  وهتبقى واحدة من قطع الاكسسوار المفضلة عندك .

نصيحتنا ليكى انك تشترى طاقيه سعرهـا معقول و تجربيها فى البيت براحتك على اكتر من طقم وخليكى لبساها ساعه ولا اتنين فى البيت و شوفى شكلها عليكى و هتحسيها ازاى قبل ما تقررى تلبسيها .

الحزام :

حاجه مهمة كمان علشان تعرفى معانا ازاى تستغلى الاكسسوارات فى تحسين اللوك بتاعك هى انك تعرفى تستغلى الحزام ، لانه  قطعة اكسسوار مفيدة جدا علشان تبرز وسطك لو انتى رفيعة او تدارى و تجمل من شكل منطقة الوسط لو انتى مليانة ، علشان كده مهما كانت طبيعة جسمك الحزام من قطع الاكسسوار اللى ليها تأثير كبير على تغيير شكل جسمك  و بتساعدك تعملى ستايلات مختلفة و متنوعة .

نصيحتنا ليكى هى انك تلبسى حزام رفيع مع مع الفساتين او التيشيرتات الواسعه علشان تظهرى وسطك .

الاكسسوار الكبير:

قطع الاكسسوار الكبيرة او الواضحة هتساعدك تحسنى اللوك بتاعك خصوصا لو لابسة حاجه بسيطة مفيهاش تفاصيل كتير و محتاجة تضيفلها حاجه تظهرها ، كوليه كبير ملون  هيحول اللوك بتاعك وانتى لابسة تيير او بلوزة سادة ، وحلق جريء ممكن يحول الفستان الكاجوال بتاعك لفستان تقدرى تخرجى بيه بالليل او تحضرى بيه مناسبة  .

الجزمة:

هو افضل و اسهل طريقة  تخلى بيها رجلك تبان طويلة بانك تلبسى شوز كعب من لون بشرتك ” بالالوان النيود ” فهيبان و كأنه هو ده طول رجلك الطبيعى ، جربى تلبسى الشوز باللون النيود مع جينز رجله مرفوععه لفوق لستايل كلاسيك ، او البسي الشوز بلون فاقع مع الجينز للوك تريندى و مطرقع .

نصيحتنا ليكى عن ازاى تستغلى الاكسسوارات فى تحسين اللوك بتاعك هى انك تستغلى الشوز كوي لانها ممكن تخلى اللوك بتاعك واضح و جرئ خصوصا لو لبستى شوز بألوان طبيعية زى الاسود، البنى ، الابيض ، الجراى ، او الازرق .

الاسكارف :

الايشارب او الاسكارف بيقدر يجدد اى لوك حتى لو كان طقم قديم زهقتى منه ، لو حبيتى تلبسى تيشيرت قديم و عايزة تخليه على الموضة بساطة البسى معاه سكارف حوالين رقبتك و هتلاحظى انه شكل الطقم اتغير و بقى احلى بكتير . نصيحتنا ليكى هى انك يبقى عندك اسكارف حرير او ستان لانه هيبعد عنك الحر فى الصيف و يدفيكى فى الشتا و كمان سهل تربطيه و بيطلع شكله شيك جدا .

شنطة بألوان جريئة :

شنطة او بورتوفيه صغير بلون واضح او جرئ قادرة انها تغير شكل اللوك بتاعك 180 درجة ، الشنطة حزء اساسى فى اى طقم علشان كده حاولى تستغليها فى انك تجددى و تغيرى بيها شكل اللوك بتاعك . سواء كانت شنطة كلاسيك او شنطة كروس او حتى شنطة ضهر ، اختارى شنطة بلوك جرئ و مناسب و هتلاحظى التغيير الكبير .جربى تلبسى الشنطة بحجم كبير مع جينز و غيرى اللوك بتاعك من غير اى تعب .

بكده تكونى عرفتى معانا ازاى تستغلى الاكسسوارات فى تحسين اللوك بتاعك ، جربيهم و قوليلنا ايه رايك ☺ . و اعرفى معانا كمان 5 طرق تخلى بيهم هدومك القديمة جديدة وعلى الموضة