18 عادات سيئة هما السبب فى البشرة الخشنة .. اتعرفى عليهم

مفيش شك ان الاهتمام بالبشرة مهم واساسي لصحتنا و جمالنا عموما ، ورغم انه ممكن تكونى بتهتمى ببشرتك بانك مبتناميش بالمكياج وبتشربي مياة كتير وبتستخدمى ماسكات تنضيف البشرة وغيرها من طرق الاهتمام بالبشرة الا انك بتلاحظى انه بشرتك برده خشنة ومفيش اى حاجه بتخليها تبقى ناعمه اوانها تبان صحية ونضرة ، علشان كده فى المقال ده بنات حوا هتقولك على اسباب مهمة ممكن هى تكون السبب فى البشرة الخشنة وتكونى بتعمليها وانتى مش واخدة بالك لازم تعرفيهم .

18 عادة سيئة هما السبب فى البشرة الخشنة .. اتعرفى عليهم 

1- الاستحمام بمية سخنة : 

المياة السخنة فى الشاور وخصوصا ايام الشتا اكد ممتعة و حلوة ، لكن المية السخنة وبخار المية اللى بيملا الشاور ليها تأثير وحش جدا على بشرتك و بتعتبر السبب فى البشرة الخشنة  لان المية السخنة بتزيل الزيوت المرطبة عن البشرة و بتسبب الحكة و تخليها مشدودة خصوصا لو بتستخدمى صابونة الجسم المنظفة مع المية السخنة. الحاجتين دول مع بعض بيسببوا جفاف و خشونة شديدة لطبقة البشرة السطحية . علشان تتجنبى ده حاولى دايما تستخدمى المية الدافية و الفاترة فى الاستحمام و كل ما كانت المياة باردة كل ما كان ده مفيد لبشرتك .

2- استخدام كمية قليلة من الـsun block : 

حاجه تانية ممكن تكون السبب فى البشرة الخشنة هى انك تستخدمى كمية من الـsun block اقل من اللى بشرتك محتاجاها ، الدراسات بتقول انه المفروض تستخدمى الـsun block بعامل حماية من الشمس SPF30 كل يوم و انتى نازلة مش بس على وشك فى الايام العادية وعلى ايديكى و رجليكى ازى ما بنعمل ايام المصيف ولكن على جسمك كله حتى لو فى الايام العادية او ايام الشتا اللى مفيهاش شمس. استخدمى الكريم المضاد للشمس على ودانك ، ايديكى رقبتك و كل مكان لانه اشعة الشمس بتعتبر واحده من الاسباب الرئيسية للاصابة بالانواع المختلفة من سرطان الجلد . علشان كده مهم متنسيش انك تستخدمى الكريم المضاد للشمس على كل مساحة جلدك و بكمية مناسبة وكفاية و كمان علشان تحمى بشرتك من الجفاف و الخشونة .

3- تجفيف البشرة بطريقة غلط : 

غلطات صغيرة بنعملها بتكون السبب فى البشرة الخشنة زى اننا ندعك بشرتنا بالفوطة جمد زيادة لما نيجى ننشف وشنا ، حركة زى دى بتسبب تشقات صغيرة فى طبقة البشرة السطحية وبتزيل كل الزيوت منها و ده بيخلى بشرتك تبقى جافة وخشنة و ممكن كمان تسبب الاحمرار و الحكة . الطريقة الصحيحة هى انك باستخدام فوطة قطنية ناعمة تجففى وشك و بشرتك بطريقة الطبطبة وفى حركات رقيقة و خفيفة ، ولازم بالراحة وتكون حركاتك رقيقة خصوصا فى الاماكن اللى البشرة بتبقى فيها ضعيفة زى حولين العيون . و كمان مهم تستخدمى كريم العين حوالين عيونك قبل النوم . تجفيف البشرة بطريقة غلط هيخلى بشرتك تخشن وتعجز و تبان فيها التجاعيد بدرى .

4- لمس الوش كتير :

لما تروحى الشغل او السوبر ماركت و تشترى خضار و تلمسي حاجات كتيرة بايدك ، مبتستخدميش ايدك فى الاكل مثلا الا لما تغسليها صح ؟ لازم كمان تعملى كده مع بشرتك طول ما ايدك مش نضيفة متلمسيش بيها وشك و بشرتك لانه ايدينا بتبقى مليانة بالاتربة و الجراثيم اللى بتسبب مشاكل البشرة زى الحبوب و تهيج البشرة و ده بيسبب خشونة البشرة . علشان كده لازم تحاولى متلمسيش وشك بايدك. فى دراسة حديثة كمان بتقول انه الموايلات ليها تأثير سئ على البشرة لانها بتنقل الجراصيم و البكتيريا اللى بتتنقل من حد للتانى ، و علشان تتجنبى الحاجت دى و تحافظى على بشرتك استخدم دايما المناديل المبللة و امسحى بيها ايدك من وقت للتانى .

5- استخدام ادوات مكياج مش نضيفة :

استخدام ادوات المكياج زى الفرش ، سفنجة البودر ، و الملقط و الماسكارا و ادوات العناية الشخصية المختلفة ممكن تسبب اذى كبير لبشرتك خصوصا لو بتحبفظى بيها فى مكان رطب زى الحمام . الادوات دى بتجذب الاتربة و الجراثيم و البكتيريا اللى بتسبب حبوب البشرة و خشونتها . علشان كده ضرورى تهتمى بنضافة اادوات دى و تغسليهم بشكل منتظم بالكحول علشان تقضى على الجراثيم.

6- حك البشرة : 

حك البشرة ” انك تهرشى فى وشك ” او انك  تشدى الحبوب خصوصا لو بتهرشى نفس المنطقة فى وشك انه الحركة دى بتزيل طبقة البشرة السطحية عن جلدك و بتسيبها جافة و معرضة للالتهابات . لكن لو انتى لتعانى من الحكة المستمرة للبشرة يبقى ضرورى تستشيرى دكتور جلدية علشان يعالج المشكلة دى لو فى سبب مرضى ، اما الحكة عموما بتسببها المية السخنة و استخدام كميات زيادة من مستحضرات التجميل. 

7-اختيار منتجات غير مناسبة لبشرتك : 

حاجه تانية مهمة علشان تتجنبى خشونة البشرة هى انك تختارى مستحضرات العناية بالبشرة المناسبة ليكى  و لنوع بشرتك و لعمرك ، لانه اختيار منتجات غير مناسبة لبشرتك هيأذى بشرتك و يسبب لها الجفاف و الخشونة . لو مش عارفة ايه المناسب ليكى او ازاى تختارى ممكن ترجعى لدكتور جلدية و تسأليه عن افضل المنتجات بالنسبه لك .

8-استخدام منتجات بتسبب جفاف البشرة : 

استخدام منتجات فيها مواد بتسبب جفاف البشرة زى الكحول و السلفات خطأ شائع بنعمله كتير و بنبقى فاكرين انه المنتجات دى هتنضف البشرة مع انه مع استخدامنا المتكرر ليها بتبقى هى السبب فى البشرة الخشنة ، لانها بتخلى البشرة تبقى جافة و تتقشر . اطباء الجلد بينصحوا اننا نستخدم الزيوت الطبيعية على بشرتنا من وقت للتانى زى زيت الجوجوبا علشان نعمل توازن للبشرة .

9- استخدام الكريم على البشرة و هى مبلولة : 

فى اعتقاد شائع بيقول انه لو استخدمنا الكريم المرطب على بشرتنا و هى مبلولة ده هيساعد البشرة تفضل رطبة لمدة اطول ، و الحقيقة انه ده غلط . الصح هو انك تجففى بششرتك على خفيف بفوطة قطنية بطريقة الطبطبة و بعدين تستخدمى التونر و بعد كده كريم مرطب لبشرتك لما تنشف . التونر مع الكريم المرطب المناسبين لبشرتك هيامنوا الترطيب الكفاية و يبعدوكى عن انه تكون الغلطة دى سبب فى البشرة الخشنة . 

10- استخدام منتجات البشرة اللى بتعمل رغوة كتيرة :

افضل لبشرتك انك متشتخدميش غسول البشرة اللى بيعمل رغوة كتيرة ، لانه الرغوة دى معناها انه الغسول ده فيه مكونات مضرة للبشرة . علشان كده حاولى تستخدمى غسول البشرة اللى بيعمل رغوة اقل او من غير رغوة . و لو شرتك جافة او حساسة استخدمى الغسول او الكريم اللى بيبقى اللبن من مكونات ، و استخدمى الغسول بمكونات خفيفة للبشرة الدهنية .

11- استخدام كمية زيادة من البودرة :

معظم البنات بتميل لانها تستخدم كمية زيادة من البودرة خصوصا فى ايام  الحر علشام متخليش وشهم يلمع ، بس كمان استخدام كمية زيادة من البودرة ممكن يكون السبب فى البشرة الخشنة لانها بتقفل المسام و بالتالى بتضر البشرة علشان البودرة بتمتص الزيوت الطبيعية اللى بتفرزها بشرتك فبتخليها جافة و مشدودة .

12- قلة الاهتمام بالجلد حوالين العيون :

منطقة البشرة او الجلد حوالين العيون مهمة و حساسة جدا علشان كده بتتطلب اهتمام خاص ، مهم انك تستخدمى الكريمات المخصصة للمنطقة دى ، بخفة استخدمى الكريم على المنطقة دى وافرديه على كل مساحة الجلد حوالين عيونك من الزاوية الخارجية للعين . و قاعدة مهمة هى انك بتفردى الكريم على عضمة الخد من فوق مش على الجفون .

13- قلة الاهتمام بالشفايف : 

الشفايف الخشنة و اللى بتتقشر مضرة جدا لبشرتك ، علشان كده متنسيش تهتمى بشفايفك و ترطبيها من ضمن روتين الاهتمام ببشرتك الخاص بيكى لانه قلة الاهتمام الشفايف ممكن كمان تكون السبب فى البشرة الخشنة . 

14- النوم و الوش على المخدة :

معظمنا بنفضل ننام على جنبنا او على وشنا و بيبقى وشنا على المخدة ، لكن الطريقة دى فى النوم غلط على البشرة لانها ممكن تسبب التجاعيد و الخطوط . افضل وضعية للنوم هى على الضهر لانها بتجنبك تكون التجاعيد و بتدى المساحة لبشرتك تتنفس .

15- توزيع الكريم على وشك بطريقة غلط :

مهم كمان انك توزعى اى كريم بتستخدميه على وشك بطريقة صحيحة ، نفس طريقة عمل مساج الوش. يعنى من منتصف الوش لبرة .لانه توزيع الكريم على وشك بطريقة غلط هيرهق بشرتك و يخليها جافة .

16- مبتغيريش فرش السرير مرات كفاية :

اطباء الجلد بيوصوا بتغيير اكياس المخدات و فرش السرير كل يومين او تلاتة بالكتير ، لانه استخدام نفس الفرش لمدة طويلة  ممكن يكون السب فى البشرة الخشنة لانه بتبقى نايمة على فرش مليان بالعرق و الزيوت اللى بتفرزها بشرتك و جسمك يوم ورا التانى . ده بيسبب الحبوب على بشرتك و وشك خصوصا لو انتى من اصحاب البشرة الدهنية .

17-الاكل السريع و قلة شرب المية :

اكل الحاجات اللى فيها دهون كتير و الحلويات مضر جدا لبشرتك ، و علشان تتمتعى ببشرة صحية لازم يبقى اكلك صحى بأنك تاكلى خضار و فاكهة كتير و تستبدلى الصودا و المشروبات الغازية بالمية ، و تحاولى يوكن اكلك غنى بفيتامين B  المهم للبشرة و ده هتلاقيه فى السبانخ ، التفاح ، الكبدة ، و كمان اكلات بتحتوى على الزنك زى البيض ، السى فود و السودانى علشان تتمتعى ببشرة صحية و تتجنبى خشونة و جفاف البشرة .

18- مبتستخدميش تونر :

لو مبتستخدميش تونر يبقى انت بتعملى سبب مباشر فى خشونة البشرة ، مهم انك بعد ما تغسلى وشك انك تستخدمى تونر قبل الكريم المرطب . التونر بيزيل الزيوت الزايدة عن حاجه بشرتك و بيقلل المسام و بيساعد بشرتك انها تتشرب الكريم بعمق .

شوفى معانا كمان 7 اسرار لجمال البشرة بيعملوهم الموديلز