اعرفي معانا ازاي تغيري حياتك للأفضل في شهر واحد بس !

بقلمريهام محمود فيمنوعات visibility13200

كتير دايما بنقعد نفكر بينا وبين نفسنا اننا عايزين نغير حياتنا او نعيش بأسلوب مختلف ونخلي حياتنا احسن وافضل لكن مش بنعرف نعمل ايه او نبدأ ازاي وايه اللي ممكن نغيره وايه اللي مش هنقدر نغيره, عشان كده احنا النهاردة جايبين لكل بنات حوا خطوات لو مشيتي عليها ونفذتيها هتخليكي تغيري حياتك للأفضل في شهر واحد بس.

اعرفي ازاي تغيري حياتك للأفضل في شهر واحد بس:

– الاسبوع الاول : تنقية العقل والجسم:

1- اصحي بدري:

اول خطوة هنعملها هي التعود على الصحيان بدري يعني تصحي كل يوم حوالي الساعة 6 الصبح لان ده هيخلي عندك وقت كبير تعملي كل اللي انتي عايزاه خلال فترة النهار وهيبقى عندك وقت كمان بعد ما تخلصي اللي وراكي انك تاخدي فترة راحة واسترخاء لنفسك, يعني هتقدري تعملي الصبح تمارين عشان تنشطي جسمك ويساعدك تكملي يومك بنشاط, الصحيان بدري هيخليكي تروحي مكان شغلك او دراستك وانتي مش مستعجلة او مضغوطة وهتبقي مرتاحة, كمان لما تقومي من النوم متفكريش بطريقة سلبية ان انتي مستنيكي يوم طويل ووراكي حاجات كتير او هتنزلي في زحمة المواصلات حاولي تفكري بطريقة ايجابية وان اليوم ده مستنياكي حاجة حلوة في اليوم يعني خليكي متفائلة اكتر.

2- اعتمدي نظام غذائي صحي:

اعتمدي على الاكل الصحي وخليه اسلوب حياتك على طول يعني حاولي تبعدي عن الحلويات والوجبات السريعة والاكل الغير صحي, وكلي اكتر الخضار والفاكهة واللحوم الخالية من الدهون لان الاكل المشبع بالدهون بيسبب خمول وكسل للجسم ده غير زيادة الوزن لكن الاكل الصحي هيديكي طاقة ويخلي جسمك على طول في نشاط.

3- مارسي رياضة:

الرياضة من اكتر الحاجات اللي بتحافظ على الجسم صحي ونشيط, عشان كده لازم نحاول نمارس اي نوع رياضة حتى لو الرياضات البسيطة اللي مش محتاجة جيم زي المشي, الجري, الرقص, اليوجا, او ممكن حتى تستخدمي السلم مثلا بدل الاسانسير في اي مكان تروحيه يعني تحاولي تحركي الجسم باي شكل يوميا.

ازاي تغيري حياتك للأفضل في شهر واحد بس
ازاي تغيري حياتك للأفضل في شهر واحد بس

– الاسبوع التاني: نظمي حياتك الخاصة:

1- نظمي المكان اللي انتي قعدة فيه:

نظمي اوضتك او المكان اللي انتي قعدة فيه كل فترة عشان تتخلصي من الحاجات القديمة او الحاجات اللي مالهاش لازمة وتفضي مساحة لحاجات تانية ده غير ان ده هيفرغ طاقة الجسم ويحسسك انك عملتي حاجة ايجابية حتى لو بسيطة, ونضفي المكان وخليكي دايما قعدة في مكان نضيف ومترتب لان ده بيفرق كتير اوي وبيأثر بشكل ايجابي على الحالة النفسية.

2- اعملي قايمة بالحاجات المهمة:

اعملي قايمة بالحاجات المهمة اللي عايزة تعمليها, لان ان احنا اغلب الوقت بنقعد نحط خطط ونقول هنعمل حاجات كتير ومش بنعملها وعشان ننفذها نكتبها في قايمة ونحط وقت لتنفيذها يعني مثلا لو عايزة تدرسي لغة او تاخدي كورس او تعملي اي حاجة كنتي مأجلاها حاولي تحطي لكل حاجة توقيت تخلصيها فيه واللي تخلصيه اشطبي عليه في القايمة بتاعتك الموضوع ده هيفرق جدا معاكم وهتحسي انك انجزتي وهتبقي مبسوطة جدا باللي انتي عملتيه.

3- افرزي حياتك الاجتماعية:

افرزي علاقاتك الاجتماعية مع كل الاصحاب والناس اللي انتي بتتعاملي معاهم وابعدي عن الناس اللي ليهم نظرة سلبية او الناس اللي بيضايقوكي او اللي اسلوبهم او طريقتهم مش بتعجبك ومش بتعرفي تتعاملي معاهم, ولازم تتعودي تاخدي قرارات حاسمة في الحاجات دي وتقرري تبعدي عن الاشخاص اللي بيأثروا بشكل سلبي على حياتك, واحتفظي بس بالاشخاص اللي بتكوني مبسوطة وانتي معاهم وتأثيرهم ايجابي عليكي.

ازاي تغيري حياتك للأفضل في شهر واحد بس
ازاي تغيري حياتك للأفضل في شهر واحد بس

– الاسبوع التالت: رتبي اهدافك واحلامك:

1- اكتبي اهدافك ونفذيها:

في الاسبوع التاني قولنا نحط قايمة بالحاجات المهمة والخطط اللي عايزين نعملها لما هتنفذيها اكيد هتحسي بالحماس وهتكوني مبسوطة انك انجزتي حاجة, وده هيخليكي متحمسة انك تعملي قايمة جديدة في الاسبوع التالت تحطي خطط وحاجات جديدة تنفذيها, ومن ضمن الخطط اللي هتكتبيها اكتبي كمان وقت لراحتك واسترخائك او الخروج مع اصحابك او انك تطلعي رحلة او تقري كتاب او قصة بتحبيها يعني خصصي وقت لمتعتك الخاصة, ومننساش نحط مواعيد لتنفيذ كل حاجة هنعملها اننا نخلصها في وقت معين.

2- اكتبي قايمة للاحلام الصعبة:

اكتبي قايمة بالحاجات او الاحلام اللي انتي شايفاها صعب تتنفذ او مستحيلة وتخيلي كل يوم انك بتعمليها ده لوحده بيدي طاقة ايجابية ولو في يوم جيتي حققتي حلم من الاحلام دي هتفتكري انك كنتي شايفاه في يوم من الايام حلم مستحيل وصعب تحققيه لكن انتي قدرتي تحققيه وده هيحسسك بالفخر بنفسك جدا, واكيد مافيش حلم صعب او مستحيل مع الارادة والاصرار والسعي وراه لتحقيقه.

3- حطي خطة يومية:

اعملي خطة او قايمة يومية للي هتعمليه تاني يوم, يعني كل يوم بالليل قبل ما تنامي دوني كل الحاجات اللي عايزة تعمليها تاني يوم ويكون هدفك انك تخلصي كل الحاجات دي ومتأجليش منهم اي حاجة, وحاولي دايما تفكري مش بس في خطة يومك لكن فكري في حياتك كلها وانتي عايزة تروحي لحد فين في الحياة او تحققي ايه يعني لازم نحط اهداف مش نعيش حياتنا من غير هدف.

ازاي تغيري حياتك للأفضل في شهر واحد بس
ازاي تغيري حياتك للأفضل في شهر واحد بس

– الاسبوع الرابع: توسيع أفاقك:

1- حاولي تعيشي بشكل مختلف:

حاولي تجربي حاجات مختلفة حتى لو كانت بسيطة يعني لو حتى هتمشي من طريق مختلف وانتي رايحة شغلك او جامعتك, او تقعدي في مكان او كافيه جديد غير اللي انتي متعودة تقعدي فيه, ادخلي محلات مش متعودة تروحيها او تشتري منها حاجة وجربيها, جربي تمارسي نوع رياضة جديد, يعني اعملي حاجات انتي مش متعودة تعمليها, وحاولي كل يوم او كل فترة تدوري على حاجة جديدة تضيفيها لحياتك.

2- واجهي مخاوفك:

حاولي انك تواجهي الحاجات اللي انتي بتخافي منها يعني مثلا لو رئيسك في الشغل بتحسي برهبة منه او بتخافي تتعاملي معاه جربي تروحي مثلا بفكرة جديدة هتفيد الشغل وتقترحيها عليه, او لو بتخافي تتعاملي مع اشخاص جداد حاولي تقبلي دعوة صاحبة ليكي مثلا خارجة مع اصحاب انتي متعرفيهمش واتعرفي عليهم ووسعي علاقاتك واخرجي من الدايرة بتاعتك عشان تتغلبي على احساس الخوف اللي عندك.

3- خدي استراحة:

خلال كل اللي احنا قولناه والخطط والاهداف اللي انتي حطتيها لنفسك وقدرتي انك تنفذيها وانجزتي وحققتي نجاح يبقى اكيد انتي تستحقي استراحة اخرجي من البيت وقضي وقت في مكان بتحبيه لوحدك وصفي ذهنك من اي حاجة, وياريت لو في الفترة دي تقفلي النت ووسايل الاتصال وتخصصي الوقت ده لنفسك بس, وممكن بعد ما تصفي ذهنك وتحسي انك ارتاحتي تفكري في اللي انتي انجزتيه خلال الشهر وهل انتي راضية عنه ولا لا ؟ وايه التغيرات اللي حصلت في حياتك ؟ وايه اللي ممكن تعمليه في المرحلة اللي بعد كده ولا  اكتفيتي باللي انتي حققتيه ؟.

ازاي تغيري حياتك للأفضل في شهر واحد بس
ازاي تغيري حياتك للأفضل في شهر واحد بس

لو نفذنا كل الخطوات دي يوميا هتفرق جدا في حياتنا وهنحس اننا بنحقق حاجة فيها وهنعيش الحياة بشكل مختلف عن اللي احنا متعودين عليه.