12 خطوة هتخليكي تعيشي حياة زوجية سعيدة تستمر مدى الحياة

بقلمريهام محمود فيعلاقات visibility18219

تأسيس بيت وحياة زوجية اكيد حاجة مش سهلة لكن الاصعب من المرحلة دي هي المرحلة التانية بعد تأسيس الحياة الزوجية انك هتعيشي  مع الشخص اللي اختارتيه وتبدأوا حياة مع بعض وانك تحافظي على الحياة بينكم في استقرار وتعيشوا حياة سعيدة دي مهمة مش سهلة خالص ومحتاجة مجهود وتضحيات من الطرفين اكيد, عشان كده احنا النهاردة هنقولكم على شوية نصايح وخطوات يمكن تكون بسيطة بس الحاجات دي هي اللي بتفرق اوي في استمرار الحياة بين اي زوجين وبتضمن لهم يعيشوا حياة سعيدة ومستقرة مدى الحياة.

تعالوا نعرف مع بعض 12 خطوة عشان تعيشوا حياة زوجية سعيدة:

1- ناموا في حضن بعض كل يوم:

التعبير عن المشاعر وان كل اتنين يحسوا انهم دايما قريبين من بعض دي بتفرق كتير اوي, عشان كده ناموا في حضن بعض كل يوم متبقوش بعيد عن بعض او كل واحد في ناحية وكانكم في مكانين منفصلين خليكوا جنب بعض وحسوا ببعض على طول لان الحضن ده بيدي احساس بالأمان للطرفين.

ناموا في حضن بعض كل يوم
ناموا في حضن بعض كل يوم

2- خليك دايما مهتم بيها:

الاهتمام ده حاجة اساسية ومهمة جدا جدا بين اي اتنين يعني دايما حسسوا بعض انكم خايفين على بعض ولوحد تعب مثلا يبقى لازم التاني يكون جنبه ويهتم بيه والكلام للطرفين اكيد مينفعش طرف واحد يعمل كده والتاني لا لان الحياة الزوجية عطاء متبادل بين الطرفين.

خليك دايما مهتم بيها
خليك دايما مهتم بيها

3- دوروا دايما على حل وسط:

الحياة الزوجية اكيد مش بتخلى من المشاكل مهما كانوا الاتنين بيحبوا بعض عشان كده في اي مشكلة عشان متكبرش نبعد عن العند وندور على حل وسط يرضي الطرفين يعني مش كل واحد يتمسك بموقفه لمجرد بس انه يمشي رأيه او يعمل اللي في دماغه وخلاص لا لازم تتكلموا وتتفاهموا وتوصلوا لحل يرضي الطرفين.

دوروا دايما على حل وسط
دوروا دايما على حل وسط

4- ادوا مساحة لبعض:

الموضوع ده مهم جدا اننا ندي لبعض مساحة كل واحد فينا يمارس اهتمامات خاصة بيه او يعمل حاجة بيحبها بعيد عن الطرف التاني, لان للأسف في كتير بيقعوا في غلطة انهم مش بيدوا مساحة حرية للطرف التاني وكل واحد بيعتبر التاني بقى ملكية خاصة ليه ومش من حقه يعمل حاجة بعيد عنه وده اكبر غلط لازم يكون كل واحد ليه شخصية واهتمامات يقدر يمارسها مع نفسه, يعني مثلا ممكن تدي مساحة حرية للزوج يقرا او يرسم او يمارس اي هواية بيحبها او يخرج مع اصحابة, والزوج بردوا لازم يسيب مساحة حرية للزوجة ممكن تخرج مع صحباتها او تمارس هواية خاصة بيها او اي حاجة بتحبها ده هيفرق كتير جدا في الحياة بينكم  لان ده هيكسر ملل الحياة الزوجية وهيدي فرصة لكل طرف يشتاق للتاني وانه يبقى عايز يكون معاه اكتر.

ادوا مساحة لبعض
ادوا مساحة لبعض

5- خلوا دايما في ثقة متبادلة بينكم:

لازم تكون في ثقة بين الطرفين وكل واحد يكون واثق في قرارات واختيارات الطرف التاني ويؤمن بعقليته وتفكيره وقدراته وانه مهما حصل في الحياة هتقدروا انكم تتخطوه وتكملوا حياتكم, لان اكيد الخوف المستمر وعدم الثقة في الطرف التاني ده هيخلي الحياة صعبة وهتبقوا عايشين حاسين بعدم امان.

خلوا دايما في ثقة متبادلة بينكم
خلوا دايما في ثقة متبادلة بينكم

6- سامحوا بعض:

التسامح ده من اساسيات اي حياة زوجية ناجحة وسعيدة لو اي طرف غلط او حصلت اي مشكلة لازم يكون في تسامح من الطرفين يعني مش كل واحد يقف للتاني على الغلطة لا لازم نحاول اننا نعدي الغلطات ونسامح بعض لان التسامح ده هو اللي بيخلي الحياة تستمر.

سامحوا بعض
سامحوا بعض

7- احترموا وقدروا احلام بعض:

مهم اوي ان كل طرف يحترم احلام الطرف التاني مهما كانت حتى لو كل واحد فيكم شايف الحلم ده صعب او حتى شايفة بسيط او صغير من وجهة نظره, لازم كل واحد يحترم حلم التاني مهما كان ويساعدوا ويشجعوا كمان انه يحققوا او يوصل له.

احترموا وقدروا احلام بعض
احترموا وقدروا احلام بعض

8- غازلوا بعض:

الكلام الحلو ليه تأثير السحر بين اي اتنين يعني حتى لو بكلام بسيط بس بيفرق اوي, والكلام الحلو للطرفين يعني زي ما البنت بتحب تسمع كلام حلو الراجل كمان بيحب يسمع الكلام الحلو, يعني مثلا انتي ممكن تمدحي في شكله في طريقة لبسه في اسلوبة او طريقته في حل مشكلة حتى ده هيحسسه بنفسه اوي وهينبسط جدا, وطبعا البنت بتعيش على الكلام الحلو دي حاجة مفروغ منها :) عشان كده الراجل لازم دايما يسمع شريكته كلام حلو وكمان ياخد باله من التفاصيل الصغيرة يعني مثلا تمدح في فستان جديد لبساه او تسريحة او لون شعر جديد لان الحاجات دي بتفرق اوي, ومهما مرت السنين بينكم لازم ده يستمر يعني مش في بداية الجواز بس وبعدين نبطله لا لازم ده يكون موجود على طول بينكم.

غازلوا بعض
غازلوا بعض

9- شاركوا بعض قلقكوا ومخاوفكوا:

لازم كل طرف يشارك التاني كل حاجة جواه يعني لو اي حد منكم جواه حاجة او خايف من حاجة او بيفكر في حل مشكلة معينة لازم يفضفض مع الطرف للتاني ويشاركوا اللي هو حاسس بيه ميبقاش كل واحد عايش منفصل عن التاني لازم تكون في مشاركة في كل حاجة.

شاركوا بعض قلقكوا ومخاوفك
شاركوا بعض قلقكوا ومخاوفك

10- ادعموا بعض مهما كانت المشكلة:

ادعموا بعض وخليكوا دايما جنب بعض في اي مشكلة تحصل مهما كانت بسيطة لازم كل طرف يحسس الطرف التاني انه معاه وجنبه مهما حصل وان اي مشكلة هتقدروا تعدوها مع بعض.

ادعموا بعض مهما كانت المشكلة
ادعموا بعض مهما كانت المشكلة

11- متلوموش بعض:

زي ما قولنا الحياة الزوجية مش بتخلى من المشاكل وممكن اي طرف يغلط عادي بس لما حد فيكم يغلط يحاول ميلومش التاني ويقوله مثلا ان المفروض ده مكنش يحصل وانك غلطان وكلام من ده لا لو حد غلط خلاص عادي كلنا بنغلط منقعدش بقى نلوم بعض ونحسس بعض بالذنب ومنديش اي مشكلة اكبر من حجمها.

متلوموش بعض
متلوموش بعض

12- متستسلموش حتى لو فشلتوا اكتر من مره:

الحياة مليانة صعوبات وعقبات كتير ممكن نقابلها وممكن نفشل اكتر من مره لكن مش من اول فشل او اول مشكلة نستسلم ومنكملش لا لازم الطرفين يتخطوا الصعوبات دي مع بعض ويقوموا مره واتنين ويكملوا سوا ويعدوا اي مشاكل او اي عقبات هتقابلهم في الحياة.

متستسلموش حتى لو فشلتوا اكتر من مره
متستسلموش حتى لو فشلتوا اكتر من مره

نتمنى ان النصايح دي تفيدكم وتنفذوها في حياتكم لانها هتفرق كتير اوي وهي زي ما قولنا يمكن تكون بسيطة بس هتضمن لكم حياة زوجية سعيدة ومستقرة تستمر مدى الحياة.

اعرفوا كمان ازاي تجددوا الحياة الزوجية

تجديد الحياة الزوجية .