9 طرق مذهلة علشان ترتيب الشنط و المحفظة لازم تعرفيهم

مع الوقت بيزيد عدد وأنواع الجزم و الشنط اللي عندنا وهنا بتظهر مشكلة بتضايق وتحير معظم البنات وهى اننا بنبقى مش عارفين نحط الشنط دى فين او نرتبها ازاى ، علشان كده مهما نرتب دولابنا و نروقه بتفضل الشنط و المحافظ هى مشكلتنا الوحيدة اللى مش لاقيينلها حل ، بس فى المقال ده بنات حوا هتقولك على الحل ، اعرفى معانا 9  طرق مذهلة علشان ترتيب الشنط و المحفظة هيخلوكى ترتبيهم بسهولة و من غير تعب.

9 طرق مذهلة علشان ترتيب الشنط و المحفظة لازم تعرفيهم 

1- استخدمى حامل الكتب و المجلات : 

واحدة من اسهل طرق ترتيب الشنط و المحفظة هى انك تستغلى حامل الكتب او المجلات ، ببساطة رصى المحفظة او البورتوفيه في الحامل واحده ورا التانية و حطيهم على رف فى دولابك او على التسريحة. الطريقة دى مناسبة اكتر للشنط من غير ايد و اللى حجمها صغير، لكن مثالية للمحافظ و البورتوفيه .

2- استخدمى حلقات ستارة الشاور : 

ممكن تستخدمى حلقات الستاير بتاعت الحمام فى ترتيب الشنط ، لانه الحلقات دى ميزتها انها بتتفتح و تتقفل فهتقدرى تعلقى عليها شنطك بسهولة ، و بعد كده تقدرى ترتبيهم على حامل الشماعات فى دولابك .

3- استخدمى حامل الازايز او الحامل الجاهز : 

طريقة تانية لترتيب الشنط و المحافظ هى حامل الازايز او الحامل الجاهز زى اللى فى الصورة، حامل الازايز و الكاسات هتلاقيه فى محلات تجهيزات المطابخ .

4- استخدمى الرف او الجزامة القديمة : 

لو عندك ارفف مش محتاجاها او جزامة قديمة مثلا ممكن تستغليها فى ترتيب شنطك و المحافظ و كمان البورتوفيه  ، زينيها بورق ملون و ممكن كمان تحطى فيها باسكت او علبة علشان ترتبي فيها المحافظ الصغيرة بطريقة احسن .

5- بوكس الهدايا : 

ممكن تستخدمى علبة جزمة قديمة او بوكس هدايا فى تخزين المحافظ و البورتوفيهات ، زينى العلبة و رتبى فيها المحافظ و بعد كده حطيها على الرف فى دولابك .

6- استخدمى المسامير و الحوامل : 

ممكن تخصصى حيطة او زاوية فى اوضتك فاضية و تزينيها بورق حائط ، و ثبتى عليها المسامير من الحجم الكبير او الحوامل و علقى عليها شنطك و ممكن تعلقى عليها اكسسوارتك كمان . الطريقة دى بتعتبر سهلة جدا و بتدى شكل حلو فى اوضتك .

 7- وحدة ترتيب المكتب : 

واحدة من الافكار الحلوة لترتيب المحافظ و البورتوفيهات من الحجم الصغير هى انك تستخدمى وحدة ترتيب اوراق المكتب و ترتبى فيها المحافظ بتاعتك ، و بعد كده ممكن تحطيهم عى الرف فى الدولاب او على التسريحة، هتلاقى الوحدة دى فى المكتبات الكبيرة او محلات تجهيزات المكاتب .

8- وحدة ترتيب الجوابات :

ممكن كمان تستخدمى وحدة ترتيب الجوابات فى ترتيب المحافظ بتاعتك ، هتلاقيها فى محلات تجهيزات المكاتب و المكتبات الكبيرة .

9- رتبيهم فى الدولاب :

ممكن تخصصى ضرفة دولاب للشنط و الجزم الخاصة بيكى ، ولو عروسة جديدة و لسه بتشترى عفشك ممكن تخصصى دولاب صغير منفصل علشان ترتيب الشنط و المحافظ بعيد عن دولاب الهدوم .