20 حيلة سهلة هتساعدك تصحي بدري نشيطة !
الصحيان بدري تقريبا من اصعب واغلس الحاجات عند معظمنا اللي بنعاني منها كل يوم الصبح سواء الصحيان للشغل او للجامعة او للمدرسة بنقوم بالعافية ومن غير نشاط وبيبقى نفسنا نكمل نوم, لكن احنا النهاردة جايبين لكل بنات حوا اللي بيكرهوا الصحيان بدري او مش بيعرفوا يصحوا بدري حيل سهلة هتساعدك تصحي بدري وتكملي يومك وانتي نشيطة.
20 حيلة سهلة هتساعدك تصحي بدري نشيطة:
1- اتمشي بعد الغدا:
حاولي انك بعد وجبة الغدا تتمشي شوية في اي مكان وتستنشقي هوا نقي لان ده هيساعد جدا انك اخر اليوم تقدري تنامي بسهولة وهيقلل الارق ويخليكي تصحي الصبح وانتي فايقة ونشيطة لانك هتكوني نايمة كويس.
2- مارسي الرياضة بالليل:
جربي مارسي الرياضة بالليل بدل الصبح, لان في بعض الدراسات اثبتت ان التمارين الرياضية بالليل بتكون اكتر فعالية من ممارستها الصبح وخصوصا في فصل الشتا كتير مننا ممكن يكسلوا يلعبوا رياضة الصبح يبقى البديل ليها اننا نلعب الرياضة بالليل.
3- متتفرجيش على التليفزيون لوقت متأخر:
حاولي انك متتفرجيش على التليفزيون او تستخدمي اي اجهزة الكترونية بعد الساعة 8 بالليل وانك تتعرضي للاشعاعات اللي خارجة من الاجهزة دي قبل النوم لان الاشعة دي بتمنع انتاج هرمون الميلاتونين وده هرمون النوم او المسئول عن النوم وبالتالي لما يقل هيسبب لنا ارق ومش هنعرف ننام كويس وهنصحى الصبح بالعافية وجسمنا هيبقى تعبان ومرهق.
4- شمي زيوت عطرية:
الزيوت العطرية من الحاجات المفيدة والفعالة جدا اللي بتساعد على الاسترخاء والنوم بشكل اسرع, قبل ما تنامي شمي اي نوع زيت عطري مفضل عندك زي اللافندر مثلا او الياسمين او النعناع اي نوع انتي تحبيه هيساعد ك جدا تنامي كويس وبسرعة وبالتالي هتصحي تاني يوم الصبح نشيطة.
5- افطري كويس ومتاكليش قبل النوم:
في بنات كتير بيفوتوا وجبة الفطار او مبيفطروش كويس لكن الوجبة دي اهم وجبة في اليوم عشان كده لازم تفطري كويس جدا عشان تقدري تمارسي يومك بنشاط, واتجنبي الاكل قبل وقت النوم على طول لان ده هيخليكي متعرفيش تنامي كويس يعني اخر وجبة تكون قبل النوم بساعتين لاربع ساعات.
6- لو نعسانة نامي:
لو حسيتي انك نعسانة وعايزة تنامي ادخلي نامي على طول حتى لو الميعاد بدري او قبل وقت نومك اللي انتي متعودة عليه لانه الجسم ساعتها بيكون محتاج للنوم فعلا ولو اتجاهلتي ده هتدخلي تنامي بعد كده مش هتعرفي تنامي وبالتالي مش هتعرفي تقومي بدري.
7- نامي وانتي فاتحة الشباك:
وانتي نايمة خلي شباك الاوضة مفتوح عشان يكون في تهوية كويسة والهوا يتجدد جوه الاوضة, لان النفس اثناء النوم بينتج ثاني اكسيد الكربون بكمية اكبر, عشان كده التهوية مهمة وهتعمل فرق كبير جدا في انك تنامي مرتاحة وتقدري تصحي بدري وانتي مش تعبانة.
8- حطي المنبه بعيد عنك:
طبعا كلنا بنبقى ظابطين المنبه الصبح واول ما يرن نطفيه وننام تاني ونكسل اكتر ونتأخر على مواعيدنا, عشان كده خلي المنبه في مكان بعيد عن السرير عشان لما يرن الصبح تقوميه تطفيه وتتحركي من مكانك وبالتالي هتفوقي وتقومي على طول.
9- اصحي على موسيقتك المفضلة:
ممكن تظبطي المنبه على رنة او نغمة او موسيقى انتي بتحبيها وبالتالي الصبح اول ما يرن هتنتبهي ليه على طول وهتصحي مودك حلو لانك صاحية على صوت حاجة انتي بتحبيها.
10- فكري بشكل ايجابي:
حاولي تفكري بشكل ايجابي ناحية المكان اللي انتي رايحاه الصبح سواء الشغل او الجامعة او المدرسة فكري انك هتحصل لك حاجة حلوة في اليوم ده او في حاجة حلوة مستنياكي ده هيشجعك انك تصحي بدري نشيطة ومودك حلو, وابعدي خالص عن التفكير السلبي او المشاكل.
11- اتحركي في السرير اول ما تصحي:
بعد ما تصحي على طول وانتي لسه على السرير اتحركي واعملي اي نشاط, يعني في البداية خدي نفس عميق كذا مره ورا بعض وبعدين دلكي منطقة الاذن لان الحركة دي هتساعد على تحسين الدورة الدموية في الراس, وافركي كف ايديكي في بعض, اعملي تمارين استرتش للذراعين والرقبة والضهر, وكده تبقي انتي مستعدة انك تقومي من السرير بعد ما نشطتي نفسك وجسمك.
12- حطي هدفك قدامك:
لو انتي عندك حاجة مهمة الصبح خليها دايما قدام عينيكي وفكري فيها لان ده لوحده كفيل انه يخليكي تصحي بدري نشيطة عشان تنجزي الحاجة اللي انتي عايزة تعمليها.
13- استخدمي الاضاءة لو صاحية بدري اوي:
لو انتي صاحية بدري اوي ولسه الدنيا بره مش نور اول ما تصحي من النوم نوري اي اضاءة عندك في البيت عشان النور هيقلل من انتاج هرمون الميلاتونين اللي قولنا عليه هرمون النوم وبيخليكي تحسي انك نعسانة, الاضاءة في الحالة دي هتساعدك انك تفوقي وتبقي نشيطة.
14- اشربي مية قبل الفطار:
دي حيلة بسيطة بس فعالة جدا وهو انك تشربي كوباية مية قبل وجبة الفطار هتساعدك جدا انك تحسي بالنشاط ومش بس كده كمان هتظبط عمل الجهاز الهضمي وهتجهزه او تخليه مستعد للاكل.
15- افتحي الشباك وخدي نفس عميق:
اول ما تصحي من النوم افتحي الشباك وخدي نفس عميق لان ده هيساهد جدا انك تتخلصي من احساس انك عايزة تنامي وهينشطك جدا وهيحسن الدورة الدموية.
16- نظمي مواعيد نومك:
حاولي انك تنظمي مواعيد نومك وتنامي وتصحي كل يوم في نفس الميعاد, لان ده هيظبط الساعة البيولوجية للجسم وهيخليكي تقدري تنامي كويس وتصحي وانتي نشيطة كل يوم.
17- فكري في ميعادك المهم:
طبيعي انه لما بنكون هنصحى بدري اوي بيبقى عندنا حاجة مهمة سواء في الشغل او في الدراسة عشان كده مجرد ما هتقومي من النوم وتفتكري انك عندك اجتماع في الشغل مثلا او محاضرة مهمة في الجامعة ولازم توصلي لها في ميعاد محدد ده هيخليكي تصحي بسرعة وتتخلصي من احساس النوم على طول.
18- متبصيش في الساعة لو صحيتي في نص الليل:
الموضوع ده بيحصل لكتير مننا اننا نقلق في نص الليل لاي سبب ونبص في الساعة الحركة دي هتخليكي تفوقي ومش هتعرفي ترجعي تنامي تاني بسهولة ده غير انه هتقعدي تحسبي فاضل كام ساعة نوم وتصحي وده لوحده هيخليكي متعرفيش تنامي, عشان كده احسن حاجة لو قلقتي متبصيش في الساعة وارجعي نامي تاني على طول قبل ما النوم يروح منك.
19- ابعدي عن الاجهزة الالكترونية اول ما تصحي من النوم:
كتير مننا اول حاجة بنعملها اول ما بنصحى اننا نمسك الموبايل لكن ده غلط حاولي انك تتجنبي الاجهزة الالكترونية دي اول ما تصحي من النوم لمدة من 10 ل 15 دقيقة عشان تحاولي تتواصلي مع نفسك وتفوقي الاول وتستعيدي نشاطك وبعدين تتواصلي مع العالم الخارجي.
20- رتبي سريرك:
يمكن تكون حاجة بسيطة جدا وتشوفوها عادية لكن الحركة البسيطة اللي بنعملها في ترتيب السرير دي هتساعد جدا في انك تفوقي نفسك وتنشطي جسمك, وتفصلي ما بين شكله بالليل والنهار ميبقاش طول اليوم منكوش وكمان وهو شكله مترتب ميغركيش انك ترجعي تنامي تاني ورغم بساطة الخطوة دي لكن هتفرق جدا معاكي.
شوفي كمان 25 طريقة علشان تديكي طاقة ونشاط حالا
