21 حركة أتيكيت الجنتلمن Gentlemen هما بس اللى بيعملوها
مفيش بنت فينا متفرجتش على فيلم ولا مسلسل الا و لفت نظرها طريقة تعامل البطل مع البطلة و ازاى بيحترمها و مبيسبقهاش و هما ماشيين ، بيساعدها دايما و يحاول يخليها مرتاحة و متدلعة طول الوقت، وبيتعامل معاها برقة وشياكة. بس الحقيقة هى انه مش كل الرجالة بتتصرف بالطريقة دى و انه الجنتلمن gentlemen بس هما اللى بيعرفوا ازاى يتعاملوا مع الستات ، فى المقال ده ” بنات ح 21 حركة أتيكيت الجنتلمن بيتعاملوا بيها مع الستات خلال يومهم علشان تقدرى تعرفى الاشخاص اللى حواليكى gentlemen ولا لا ..
21 حركة أتيكيت الجنتلمن Gentlemen هما بس اللى بيعملوها
1- بيقف لما الست بتدخل المكان اللى قاعدين فيه :
واحدة من اقدم قواعد أتيكيت الجنتلمن هى انه لما ست او بنت او حد كبير فى السن بيدخل الاوضة او المكان اللى متجمعين فيه ، الراجل لازم يقوم يقف كعلامة على التواضع و الاحترام ، و دلوقتى الجنتلمن بيعملوا كده كمان لما بيكونوا بيرحبوا بضيف او بيقابلوا حد لاول مرة
2- بيمشى جنبك على الطرف اللى ناحية الشارع :
زمان لما بيبقى راجل و ست ماشيين جنب بعض فى الشارع كان الراجل بيمشى جنب الست من ناحية الشارع علشان يحميها من الناس و من تراب الشارع واى حاجه ممكن تضايقها ، و دلوقتى كمان الحركة دى من حركات الجنتلمن متعارف عليها و ليها تأثير حلو جدا علشان بتبين قد ايه هو مهتم بيكى و عايز يحميكى .
3- بيفتحلك الباب :
الجنتلمان دايما بيفتح الباب للست اللى معاه سواء باب العربية ، باب التاكسى او باب البيت و المطعم ، زمان كان الراجل بيفتح للست باب العربية لانها بتبقى مشغولة فى انها ترفع ديل الفستان الطويل بتاعها . دلوقتى الجنتلمان فى زماننا بيساعد الست و هى بتركب العربية و وهى نازلة منها مش علشان هى ضعيفة لكن كتعبير منه عن تقديره و مساعدته ليها .
4- الجنتلمان مابينتقدش اكل البيت :
الجنتلمان عمره مابينتقد او يعيب فى اكل البيت حتى لو مش عاجبه ، لكنه دايما بيقدر و يحترم المجهود اللى بتعمله الست علشان تعمل الاكل و تقدمه .
5- مابيضحكش على الفاضى علشان يجذب الانتباه :
الضحك العالى و من غير سبب بيعتبر من التصرفات الغير مقبولة فى قواعد فن الأتيكيت ، علشان كده الجنتلمان مابيضحكش الا اذا كان الموقف بيستدعى الضحك و مبيستخدمش الضحك فى لفت النظر ليه ، لكن شخصيته هى اللى بتلفت نظر الناس ليه .
6- بيسحبلك الكرسي علشان تقعدى :
زمان كان انه الراجل يسحب الكرسي علشان الست تقعد بحيث يبقى وشها للناس فى المكان اللى هما قاعدين فيه من فن الأتيكيت ، لكن دلوقتى الجنتلمان بيسحب الكرسي للست علشان تقعد بحيث تكون بعيدة عن الناس و التليفزيون لو موجود علشان يفضل مركز معاها و مهتم بيها من غير ما حاجه تشتت انتباهه .
7- بيقعد بعد ما الست تقعد :
أتيكيت الجنتلمين بيقول انه الراجل مينفعش يقعد الا لما الست او الضيف يقعد الاول ، و زمان كان الراجل بيفضل واقف لحد ما كل الستات اللى فى الاوضة يقعدوا .
8-بيساعدك تلبسى / تقلعى الجاكت :
من زمان الجنتلمان بيساعد الست تلبس او تقلع الجاكت بتاعها ، و الحركة دى بتعتبر من اساسيات قواعد أتيكيت الجنتلمن .
9- مابيسبقكيش و انتوا ماشيين :
زمان كانوا الستات بيلبسوا فساتين طويلة و ليها ديل ، و كان ممكن يتكعبلوا فيها لو مشيوا بسرعه او يتكعبلوا و هما طالعين او نازلين على السلم . علشان كده الرجاله كانوا دايما بيمشوا بالراحة و بخطوات صغيرة علشان ميسبقوش الست و يجنبوها انها تقع ، و علشان كده القاعدة دى من قواعد أتيكيت الجنتلمن مستمرة لحد دلوقتى، و كمان لو الست لابسة جيبة قصيرة الجنتلمان لازم يطلع قبلها مش بعدها .
10- بيقوم و يسيبلك الكرسى بتاعه لو مفيش كرسى فاضى :
من اساسيات انه يكون الراجل جنتلمان هى انه يقوم يقف و يسيب الكرسي بتاعه للست تقعد لو مفيش كرسي فاضى فى الاوتوبيس او المترو .
11- بيشيل عنك الشنط :
الجنتلمان بيساعد الست دايما و يشيل عنها اى شنط او اكياس هى شايلاها ، و لو مسافرين بيساعدها ترتب شنطها فى الطيارة او العربية .
12- بيدفع الحساب :
الجنتلمان دايما بيدفع الحساب لو خارجين مع بعض تشربوا حاجه او على العشا ، و مبسيبش الست ابدا تدفع الحساب او حتى تدفع نصيبها منه .
13- بيمسكلك الشمسية لو الدنيا بتمطر :
فى الأتيكيت دايما الصغير بيمسك الشمسية للكبير لما الدنيا بتمطر ، و دلوقتى كمان الجنتلمان بيمسك للست الشمسية لما الدنيا بتمطر حتى لو هو نفسه هيتبل شوية .
14- بيديكى الجاكت بتاعه :
الجنتلمان دايما مركزو بياخد باله من كل حاجه ، فلو شافك سقعانه او بترتعشى بيديكى الجاكت بتاعه .
15- بيحفظ اسرارك :
الجنتلمان دايما بيحفظ السر خصوصا لو انتوا مرتبطين ، و لو انفصلتوا عمره ما بيخرج السر ده لحد .
16-بيوصلك لحد البيت :
دايما هيوصلك لحد التاكسى او عربيتك او لحد البيت ، علشان يطمن انك وصلتى من غير ما تحصل اى حاجه تضايقك .
17- بيسمعلك :
الجنتلمان دايما بيهتم و يسمع لكل حاجه بتقوليها ، انه يكون مستمع كويس اهم من انه يكون بيتكلم كويس و دى واحدة من اقدم قواعد أتيكيت الجنتلمن .
18- دايما بيوصل فى ميعاده :
الجنتلمان معروف دايما بكلمته ، و عمره ما هيتحجج بالزحمة او المواصلات كعذر للتأخير ، لكنه دايما بيخطط لمواعيده و بيعمل حساب اى ظرف يحصل ، الجنتلمان دايما بيوصل فى ميعاده .
19- دايما بيعلق على جمالك ” بيجاملك ” :
الجنتلمان بيقدر الوقت و المجهود اللى بتبذليهم علشان تحضرى نفسك لخروجه او ميعا د ، علشان كده دايما هيلاحظ جمالك و يكلمك عنه و يجاملك و يركز على الحاجات الحلوة اللى فيكى .
20- مبيبصش لواحدة تانية :
الجنتلمان الحقيقى عمره ما يبص لواحدة تانية حتى و انتى مش معاه .
21- بيستأذن والدك قبل ما يعرض عليكى الجواز :
من اهم قواعد أتيكيت اجنتلمن انه لو حب يرتبط بيكى بشكل رسمى لازم يستأذن والدك الاول قبل ما يفتح معاكى الموضوع و يعرض عليكى الجواز .