نصايح و قواعد الأتيكيت فى عالم الانترنت و السوشال ميديا.. اعرفيهم

بقلمآية حسان فيمنوعات visibility4613

الغلطات اللى بنعملها فى عالم الانترنت و السوشال ميديا كتيرة و مبناخدش بالنا منها ، من status الفيس بوك اللى بتبقى شخصية جدا وممكن نحكى فيها ادق تفاصيل يومنا و كمان التغريدات الشخصية او الـtweets اللى بنفضل كل شوية نعملها على تويتر من غير ما نفكر ، و كمان مكالمات الفيديو اللى ممك نعملها مع اصحابنا او قرايبنا المسافرين فى الاوقات او الاماكن الغلط  لدرجة انه فى دراسة بتقول ان على الاقل 13% من مستخدمين اموبايل الانترنت بيعملوا نفسهم جالهم مكالمة علشان يهربوا بيها من اجتماع او الكلام فى موضوع معين ! . و علشان نتجنب الاخطاء دى فن الأتيكيت عمل لينا قواعد معينة نلتزم بيها علشان نتصرف بشكل صحيح فى عالم الانترنت من خلال نصايح و قواعد الأتيكيت فى عالم الانترنت و السوشال ميديا ، و اللى لازم تعرفيهم و تتصرفى من خلالهم خصوصا لو كان شغلك او تواصلك مع الناس من حواليكى اونلاين .

نصايح و قواعد الأتيكيت فى عالم الانترنت و السوشال ميديا.. اعرفيهم 

نصايح و قواعد الأتيكيت فى عالم الانترنت و السوشال ميديا.. اعرفيهم
نصايح و قواعد الأتيكيت فى عالم الانترنت و السوشال ميديا.. اعرفيهم

قواعد الأتيكيت بخصوص استخدام الموبايل :

1-خدى بالك من المكان اللى انتى فيه : 

لما تكونى فى مواصلة زى الاوتوبيس  او المترو و المكان ضيق من حواليكى بحيث انه الناس مش هتعرف تتحرك او تبعد عنك حاولى متستقبليش او تعملى مكالمات فى الوقت ده ، ولو بتلعبى على الموبايل او بتسمعى اغانى يبقى لازم تستخدمى الهاند فرى ، القاعدة دى بتعتبر من أهم  قواعد الأتيكيت فى عالم الانترنت . 

2- اصحابك اهم من موبايلك : 

لو قاعدة بتتغدى مع اصحابك خلى كلامكم لبعض حقيقى و مباشر مش من خلال رسايل الموبايل او الـ whatsapp الا اذا كان فى حاجه طارئة حصلت و لازم تستخدمى موبايلك ، و لو اضطريتى تردى على التليفون وانتى مع اصحابك او فى اجتماع حاولى على قد ما تقدرى تبقى المكالمة سريعة و مختصرة .

نصايح و قواعد الأتيكيت فى عالم الانترنت
نصايح و قواعد الأتيكيت فى عالم الانترنت

3- اعرفى امتى تقفلى موبايلك و تسيبيه فى البيت : 

لو انتى من الاشخاص المرتبطين جدا بموبايلك و مبتسبيهوش من ايدك و عندك مناسبة مهمة او خارجة مع اولادك مثلا ، يبقى لازم تقفلى موبايلك قبل ما تنزلى و تحاولى تقضى الوقت كله مع اللى بتحبيهم من غير ما تنشغلى بيه ، و لو انتى عارفه انه مش هتقدرى تتحكمى فى نفسك و هتفتحى التليفون يبقى اسلم حل انك تسيبيه فى البيت قبل ما تنزلى .

4- متبعتيش رسايل و انتى بتاكلى : 

لو معزومة على العشا بره مع اهلك او اصحابك او حتى بتاكلى فى البيت مع اسرتك ، واحدة من قواعد الأتيكيت فى عالم الانترنت بتقول انك لازم تبعدى عن التليفون تماما و متبعتيش اى رسايل خلال الاكل .

5- متتكلميش فى حاجه شخصية وسط الناس : 

لو جاتلك مكالمة بخصوص موضوع شخصى و انتى فى الشغل او فى مطعم مع اصحابك حاولى تلاقى مكان هادى و شخصى تردى فيه على التليفون ، بالطريقة دى مش هتزعجى الناس اللى معاكى و فى نفس الوقت هتحمى خصوصيتك . 

 قواعد الأتيكيت فى عالم السوشال ميديا:

فى دراسة اتعملت سنة 2011 بتقول انه 85% من مستخدمى الانترنت من الاناث بيشاركوا حاجات شخصية زيادة عن اللزوم عن حياتهم الخاصة ، علشان كده حاولى تطبقى نصايح الأتيكيت دى :

نصايح و قواعد الأتيكيت فى عالم الانترنت
نصايح و قواعد الأتيكيت فى عالم الانترنت

1- متعمليش share لاى حاجه شخصية ولو كانت بسيطة : 

من أهم  قواعد الأتيكيت فى عالم الانترنت و السوشال ميديا هى انك متشاركيش عالم الفيس بوك بأى صورة او status ممكن تحسى بعد كده انه مكنش ينفع حد يشوفها ، موقع الفيس بوك مفيد فى الموضوع ده لانه بيوفر خاصية انك تختارى ناس معينة تشوف اى حاجه بتحطيها .

2- التزمى بنصايح و قواعد الأتيكيت سواء كنتى اونلاين او لا : 

نصايح و قواعد الأتيكيت فى عالم الانترنت و السوشال ميديا هى نفسها مبتتغيرش سواء كنتى بتتواصلى مع متابعينك و اصحابك اونلاين او لا ، بمعنى انك لازم تتصرفى على طبيعتك حتى و انتى على السوشال ميديا و تتعاملى مع الناس باحترام و كأنك قاعده معاهم face to face، و حاولى تطبقى مبدأ انه لو مش هتقولى حاجه لطيفة يبقى متتكلميش .

3- اهتمى بمتابعينك و اتفاعلى معاهم : 

خبراء الأتيكيت فى عالم الانترنت و السوشال ميديا بيقولوا انه واحدة من اهم القواعد اللى لازم تستخدميها هى انك تردى على متابعينك و اصدقائك على السوشال ميديا و تتفاعلى معاهم ، لانه الانترنت وسيلة تفاعلية بحيث انه الطرفين يقدروا يتواصلوا و يتكلموا مع بعض بعكس التليفزيون مثلا اللى بيعتبر وسيلة تواصل فردية الكلام فيها بيبقى فى اتجاه واحد .

4- اعرفى ايه اللى ينفع تعمليله share  و فين : 

قبل ما تعملى post جديد اسألى نفسك سؤال ، انتى مهتمة ان الناس تشوف الpost ده ولا لا ؟ لو الاجابة اه يبقى اعملى البوست ده و اتفاعلى مع الـcomments  اللى هتجيلك . السؤال الثانى هو الـpost ده يتحط فين ؟ اختارى تويتر لو موضوع البوست اللى انتى عايزة تحطيه هيجذب متابعينك و الـfollowers بتوعك خصوصا انه البوست على تويتر محدد بعدد معين من الحروف ، اما الـposts الطويلة و الصور فمكانها الانسب هو الفيس بوك لانه معظم التفاعل عليه بيبقى بين الاهل و الاصدقاء و كمان حجم البوست فيه غير محدد .

5- افتكرى دايما انك مش مضطرة تقبلى كل follow او friend request:

لو لقيتى عندك follow او friend request جديد على تويتر او الفيس بوك ، قبل ما تقبلى طلب الصداقة او تحتفظى بالـfollow ده ادخلى شوفى بروفايل الشخص ده عامل ازاى ، لو حسيتى نفسك مهتمة اقبلى الطلب لكن لو حسيتى انه مش مناسبك ماتتردديش فى انك ترفضى الطلب او تحذفيه .و يفضل انك على تويتر تعملى فولو للناس اللى بيعملولك فولو ، اما الفيس بوك خليه مساحه للتواصل مع اهلك و اصدقائك اكتر و كمان من خلاله تقدرى تفصلى بين حياتك الشخصية و حياتك العملية لانه فى الفيس بوك بتقدرى تختارى الموضوعات اللى تحبى تشوفيها .

6- افتكرى دايما انه النت مفيهوش اى حاجه شخصية : 

قاعدة تانية مهمة من قواعد الأتيكيت فى عالم الانترنت هى انك ضرورى تفتكرى انه النت مساحة مفتوحة و اى حد بيقدر يشوف اى حاجه ، مفيش حاجه على النت شخصية . 

 قواعد الأتيكيت فى الـ video chat : 

نصايح و قواعد الأتيكيت فى عالم الانترنت
نصايح و قواعد الأتيكيت فى عالم الانترنت

1- حاولى تبعدى عن مشاكل الاتصال : 

لو هتعملى فيديو كول video call من خلال الانترنت ، من خلال سكايب او اوفو او اى برنامج اتصال تانى سواء كان علشان هتكلمى جوزك او خطيبك او اتصال بخصوص الشغل ، حاولى الاول تتأكدى من انه مفيش

اى مشاكل فى خط الانترنت بتاعك ممكن تشوش الاتصال او تتسبب فى قطعه . 

2- متتكلميش فيديو لو المكان مش مناسب : 

انك  تهتمى بعدم ازعاج الناس من حواليكى حاجه مهمة جدا ، و مهم كمان انك لو مثلا هتعملى video call بخصوص شغل انه يبقى المكان اللى هتتكلمى منه مناسب ، يعنى مينفعش تعملى فيديو كول بخصوص الشغل من المطبخ او اوضة النوم مثلا ! حاولى يبقى فى المكتب ، باختصار انه يكون المحيط اللى هيبان فى الاتصال مناسب لطبيعة الاتصال نفسه بيعتبر قاعدة مهمة من قواعد فن الأتيكيت فى عالم الانترنت .

3- خلى المكالمة تبقى طبيعية على قد ما تقدرى : 

حاولى تبقى الكاميرا قريبة من الشاشة اللى هيبان عليها الشخص اللى هتكلميه علشان يحس انك بصاله و انتى بتكلميه و كأنكم قاعدين مع بعض . و حاولى كمان متتوتريش و تبقى على طبيعتك .

الخلاصه هى انك لما تيجى تتصلى بعالم الانترنت و السوشال ميديا حاولى تنفذى القواعد اللى اتكلمنا عليها و كمان تتصرفى حسب الذوق العام ، و لو اتحطيتى فى موقف و سألتى فيه نفسك ارد على الموبايل ولا لا  يبقى الاحسن متروديش و افتكرى دايما انه استخدام الانترنت فى الاساس هو علشان نتواصل مع الناس اللى بنحبهم و بنهتم بيهم .