!خدعة المراية و ازاى تعمليها و تستفيدى منها
اوقات كتير لما بنصحى من النوم الصبح و نبص فى المراية بنحس اننا مش حلوين و ان وشنا مليان عيوب ، زى الهالات السوداء و الحبوب و البشرة الباهته و اكيد بنتضايق و مابنحبش نشوف شكلنا كده . و كل اللى بنلاحظه بيبقى العيوب الموجودة فى وشنا بسي و بنبدأ نفكر فى شكلنا و فى نفسنا بشكل سلبى و نفقد الثقة بمظهرنا و نفضل ننتقد نفسنا فى كل حاجه و مع الوقت كل ما نبص فى المراية بنتضايق و نزعل ! بس بعد ما تقرى المقال ده هتغيرى رأيك تماما، هنعرفك على خدعة جديدة هتغير تفكيرك و تخليكى تبصى لنفسك فى المراية بشكل مختلف، اعرفى معانا ايه هى خدعة المراية و ازاى تعمليها و تستفيدى منها.
اعرفى معانا ايه هى خدعة المراية و ازاى تعمليها و تستفيدى منها !
خدعة المراية هى تحدى هتعمليه فى خطوات بسيطة هتغير نظرتك لنفسك فى المراية خالص ، و التحدى ده هو تحدى ابتسامة السبع ايام .
الخطوة الاولى :
كل مرة تبصى لنفسك فى المراية او تعدى على مراية صدفة حتى لو مش قاصدة لازم تبتسمى لنفسك حتى لو مش لابسة حاجه بتحبيها اوى او لو مش عاملة مكياجك ، لازم تبتسمى .
الخطوة الثانية :
و انتى مبتسمة و باصة لنفسك فى المراية ، حاولى تلاقى حاجه جديدة تحبيها او عاجباكى فى نفسك ، زى عينيكى ، شكل شعرك ، لفة طرحتك اى حاجه تعجبك . و استمرى على الخطوات دى اسبوع كامل .
ازاى التحدى ده هيفيدك ؟
1- ابتسامتك لنفسك فى المراية :
فى مادة بيفرزها الجسم فى الدم اسمها ” الاندروفين ” لما بتبتسمى، و بتتفرز عن طريق العضلات فى وشك و مخك بيترجمها على انك مبسوطة و سعيدة فبيبدأ يقلل من التوتر و بيخليكى تجسي انك مبسوطة ، علشان كده كل مرة تبتسمى لنفسك حتى لو مفيش حاجه مخلياكى مبسوطة فعلا جسمك بيفرز المادة دى و بيبدأ مخك يرسل اشارات بأنك سعيدة و مع تكرار الابتسامة هتبدأى حسى انك مسترخية و مبسوطة و فى آخر السبع ايام هتلاقى انه طريقة نظرتك لنفسك اتغيرت و انك بقيتى تشوفى جمال فى نفسك اكتر من الاول .
2- فكرى افكار ايجابية عن نفسك لما تبصى فى المراية :
علماء الاجتماع بيقولوا انه 95% من المشاعر اللى بنحسها مسؤولة عنها طريقة تفكيرنا فى نفسنا خلال اليوم ، و بالشكل ده كل ما نفكر فى نفسنا بشكل وحش و نفتكر السلبيات اللى فينا بس هنحس اننا طول الوقت زعلانين و مكتئبين و هتبدأى تحسي انك مش جميلة و مش هتشوفى الحاجات الحلوة اللى فيكى ، علشان كده مهم اننا نفكر فى نفسنا بطريقة ايجابية و نفضل نفكر نفسنا بالحاجات الحلوة اللى فينا ، مع الوقت هتلاقى الافكار الايجابية بقت بتخطر على بالك لوحدها و انك بعدتى عن اى افكار او طاقة سلبية .
الخلاصة هى انك تنفذى خدعة المراية و تبصى لنفسك كل يوم فى المراية و انتى فخورة بنفسك و بشكلك و ستايلك و تفكرى فى نفسك بطريقة ايجابية و تركزى على الحاجات الحلوة اللى فيكى ، و فى نهاية تحدى السبع ايام هتلاقى طريقة تفكيرك و احساسك بنفسك اتغيرت و بقيتى مرتاحة اكتر و مرحة و عندك طاقة كبيرة ، جربى خدعة المراية معانا و شاركينا النتايج فى نهاية التحدى :) .