اعرفي معانا ازاي اختيار الوان البيت ممكن يأثر على مودك ! وايه انسب الالوان لكل غرفة

ريهام محمود
ريهام محمود
6474

اختيار الوان البيت بيلعب دور مهم جدا في ديكور البيت, انتي ممكن بالالوان تعملي تصميم مميز واستايل مختلف لكل اوضه عندك, والالوان دورها مش بس لديكور البيت لكن كمان بتأثر على مزاجنا ومودنا يعني في الوان ممكن تعملك استرخاء وفي الوان تديكي طاقة ايجابية والوان تانية تديكي احساس بالنشاط, واحنا النهاردة هنقولكم من خلال المقال بتاعنا تأثير كل لون على المود ايه ؟ وايه انسب الالوان لكل اوضه في البيت.

تعالوا نعرف ازاي اختيار الوان البيت ممكن يأثر على مزاجك.. وانسب الالوان لكل اوضه:

1- اللون الاسود:

اللون الاسود في الديكور يعتبر من الالوان القوية جدا واللي بتبقى انيقة اوي, لكن اللون ده مينفعش لاوضة النوم او لاوضة المعيشة لانه هيبقى غامق اوي عليها لكن هيكون مناسب اوي لاوضة مكتب مثلا, لكن لازم لو هنختار الاسود يبقى نركز اوي على اختيار الاضاءة اننا نزودها عشان تدي اضاءة حلوة مع اللون الاسود.

اللون الاسود
اللون الاسود

2- اللون الابيض:

الابيض من الالوان الهادية والمريحة اللي بتعمل صفاء نفسي اوي وبتعمل جو مريح جدا في البيت, ممكن تختاري اللون ده للريسبشن مثلا هيديكي جو هادي ومريح.

اللون الابيض
اللون الابيض

3- اللون الموف او الارجواني:

اللون ده من الالوان المناسبة جدا لاوضة النوم لانه بيدي طاقة ايجابية جدا وبيزود النشاط, ممكن تنسقيه مع اللون الرمادي هيدي شكل حلو اوي للديكور.

اللون الموف
اللون الموف

4- اللون الازرق:

اللون الازرق من الالوان الباردة وبما انه لون مرتبط بالهوا والمية فيعتبر مناسب جدا للحمام, ممكن تعملي لون ازرق ناعم وتدخلي معاه اللون الازرق البحري اللي هو لون البحر او اللون الفيروزي مع الابيض, واللون ده يمشي بردو مع اوضة النوم.

اللون الازرق
اللون الازرق

5- اللون الاخضر:

اللون الاخضر من الالوان المميزة جدا اللي مافيش لون تاني ممكن ينافسه او يحل محله لانه من الالوان اللي بتهدي الاعصاب وبتعمل حالة استرخاء, عشان كده اللون ده مناسب جدا لاوضة النوم واوضة المعيشة.

اللون الاخضر
اللون الاخضر

6- اللون البني:

اللون البني من الالوان الدافية اللي بتعمل جو كوزي ومريح اوي وهتديكي شعور بالهدوء والراحة, وممكن تختاريه لاوضة المعيشة او المكتب, يعني اعمليه في الاوض اللي بتقضي فيها وقت طويل عشان تكوني قعدة فيها مرتاحة واعصابك هادية.

اللون البني
اللون البني

7- اللون الاحمر:

اللون الاحمر يعتبر لون العاطفة والطاقة بيدي نشاط وطاقة ايجابية اوي, عشان كده هو مناسب اوي لاوضة المعيشة, لكن نخلي بالنا لو اختارنا اللون الاحمر يبقى لازم منخليش اللون اوفر اوي او زيادة عن اللزوم لانه هيبقى مش حلو, يعني ممكن نعمل الاحمر وندخل معاه الابيض مثلا عشان يبقى في توازن في الالوان.

اللون الاحمر
اللون الاحمر

8- اللون البينك:

اللون البينك يعتبر من الالوان البناتي لانه في بنات كتير بيحبوا اللون ده لانه لو هادي ومريح اوي, واللون ده مناسب جدا لاوضة نوم الاطفال وخصوصا لو بنوتة طبعا, ممكن تدخلي اكتر من درجة بينك مع بعض الفاتح والغامق او البينك مع الابيض هيبقى حلو اوي.

اللون البينك
اللون البينك

9- اللون الاورانج او البرتقاني:

اللون البرتقاني من الالوان الدافية ومن الالوان اللي بتحسن المزاج جدا وكمان بتحسن الشهية يعني بتفتح النفس, عشان كده اللون ده هيبقى مناسب اوي لاوضة السفرة, واوضة المعيشة, والمطبخ.

اللون الاورانج
اللون الاورانج

10- اللون الاصفر:

اللون الاصفر من الالوان المشرقة والمبهجة اوي وبتدي مود بالفرح والحيوية, لكن لما نيجي نختار الاصفر ممكن نختاره للسجاد او قطع ديكور او كورنرات او للبراويز او للكنب لكن مش هيبقى اختيار حلو للحيطة.

اللون الاصفر
اللون الاصفر

شوفوا كمان افكار تجنن لديكور غرف نوم الاطفال

غرف نوم الأطفال
غرف نوم الأطفال

مقالات متعلقه

تغيير وتطوير.. اعرفي إزاي تجددي بيتك من غير فلوس كتير

تغيير وتطوير.. اعرفي إزاي تجددي بيتك من غير فلوس كتير

نصايح وأفكار ازاي تختاري لون الحوائط المناسب لغرفة النوم.. لتأثير أفضل على مودك وصحتك النفسية

نصايح وأفكار ازاي تختاري لون الحوائط المناسب لغرفة النوم.. لتأثير أفضل على مودك وصحتك النفسية

اكتر  6 ستايلات ديكور موضة السنة دي.. اتعرفي عليهم وجددي بيهم بيتك

اكتر 6 ستايلات ديكور موضة السنة دي.. اتعرفي عليهم وجددي بيهم بيتك