24 حيلة ذكية هتساعدك على تنضيف البيت بسرعة وسهولة

ريهام محمود
ريهام محمود
8550

شغل البيت والتنضيف مش بيخلص ومن اكتر الحاجات المتعبة والمرهقة واللي بتاخد مننا وقت كبير عشان نعمله, لكن من النهاردة هترتاحي وهتخلصي شغل البيت من غير ارهاق ولا تعب بحيل ذكية هتساعدك تنضفي البيت بسرعة وسهولة وهتوفرلك الوقت والمجهود.

24 حيلة ذكية هتساعدك تنضفي البيت بسرعة وسهولة:

1- من الحاجات اللي بنتعب في تنضيفها هي الحنفيات سواء في الحمام او المطبخ مع الوقت لمعتها بتروح وبتنطفي عشان نرجعها بتملع بطريقة سهلة ومن غير مجهود لمعيها بورق مشمع او ورق المطبخ هتلاقيها نضفت ورجعت تلمع تاني زي الاول.

تنضيف الحنفيات
تنضيف الحنفيات

2- لو عايزة تلمعي الارضية كويس ممكن تجيبي اي شراب قديم عندك وتحطيه في المساحة وتلمعي بيه الارضيات وخصوصا السيراميك والبورسلين.

تلميع الارضيات
تلميع الارضيات

3- الصواني اللي بنعمل فيها المعجنات او اي حاجة في الفرن وباقي الاكل بيلزق فيها ومش بيرضى يطلع وبيتعبنا وبيوجع ايدينا على ما ننضفه, ممكن ننضفه بسهولة باننا نرش شوية ملح في الصينية ونفركها بورق المطبخ هنلاقي اي بواقي اكل لازقة طلعت بسهولة.

تنضيف الصواني
تنضيف الصواني

4- الدهون والزيوت اللي بتكون لازقة على الفرن وبناخد فيها وقت ومجهود كبير عشان ننضفها ممكن تنضفيها بمكون واحد بس وهو زيت الزيتون حطي زيت الزيتون على اي فوطة عندك وامسحي بيه الفرن من بره ومن جوه وبعدين امسحيه مره كمان بفوطة ناشفة هتلاقيه نضف ورجع بيلمع.

– او نخلط ½ كوباية مية مع كوباية كربوناتو ونرش الخليط ده على الفرن من جوه ومن بره ونسيبه ربع ساعة وبعدين ننضفة بالمية وننشفه بفوطة ناعمة.

– وعشان ننضف الازاز اللي في الفرن نحط خل ابيض في ازازة ببخاخ ونرشه على الازاز ونسيبه ربع ساعة وبعدين نمسحة بفوطة ناشفة ونضيفة.

تنضيف الفرن
تنضيف الفرن

5- لو عندك اي بقعة على الكنبة او اي مفروشات ومش عارفة تتخلصي منها اخلطي معلقة كبيرة كربوناتو مع 1/3 كوباية خل ابيض وشوية مية سخنة بس مش مغلية تكون سخنة بس ومعاهم معلقة كبيرة من اي مسحوق منظف عندك وقلبيهم كويس مع بعض ورشي الخليط ده على البقعة وسيبيه كام ساعة او ممكن تسيبيها من بالليل للصبح وبعدين اشفطي الحاجات دي بالمكنسة هتلاقي البقعة راحت.

تنضيف المفروشات
تنضيف المفروشات

6- كلنا بيحصل عندنا اننا ممكن ننسى الاكل والطاسة تتحرق وبيكون تنضيفها من الحاجات الصعبة جدا, عشان نحل المشكلة دي صبي شوية مية في الطاسة وضيفي عليها كوباية خل ابيض وحطيهم على النار وسيبيهم يغلوا ولما المية تبدأ تنشف ارفعي الطاسة من على النار وحطي فيها شوية كربوناتو هتلاقي المية فارت كده استني لما تخلص فوران وادلقي المية هيتبقى عندك الكربوناتو في الطاسة افركيها كويس بليفة خشنة هتلاقي الطاسة رجعت بتلمع كانها جديدة.

تنضيف الطاسات المحروقة
تنضيف الطاسات المحروقة

7- الكاسات والكوبايات مع الوقت بتنطفي والمية والصابون بيسيبوا عليهم اثر مش بنعرف نتخلص منه, وعشان نرجعها تاني بتلمع ونتخلص من الاثار دي ننضفها بمية مضاف ليها شوية خل, او نفركها بالملح وبعدين نغسلها بالمية العادية ونسيبهم يبنشفو لوحدهم من غير ما نمسحهم بالفوطة.

تنضيف الكاسات والكوبايات
تنضيف الكاسات والكوبايات

8- عشان ننضف الاثار اللي بتكون في الكوفي ميكر او الكاتل من كتر الاستخدام هنصب فيه مية وخل ابيض بمقادير متساوية ونشغله عادي وقبل ما المية تغلي ويطفي شيليه وادلقي المية وحطي مية وخل تاني بنفس الطريقة وسيبيه لحد ما يغلي وبعدين ادلقي المية واغلي فيه مية نضيفة بس وادلقيها عشان تتخلصي من اي اثار لريحة الخل.

تنضيف الكاتل ومحضر القهوة
تنضيف الكاتل ومحضر القهوة

9- مسح التراب من الحاجات المجهدة في شغل البيت لانه بيرجع تاني بسرعة ولما بننضف مش بنعرف نشيل اثار التراب كله وعشان تنضفي التراب من على الاثاث بسهولة وباقل مجهود انقعي الفوطة اللي انتي هتمسحي بيها التراب في شوية من منعم الاقمشة اللي احنا بنستخدمه في الغسيل مع الهدوم وبعدين امسحي بيها التراب هتلاقيه طلع معاكي بسهولة ومن غير ما يسيب اي اثار وهتلاقي نفسك خلصتي في التنضيف في وقت اقل بكتير من اللي بتاخديه ده غير انه هينضف عن الطريقة التقليدية بتاعتنا.

وبالنسبة لمنعم الاقمشة لو مش عندك ممكن تعمليه في البيت هنخلط 5 كوبايات مية سخنة ومعاهم 3 كوبايات خل ابيض وكوبايتين بلسم الشعر اي نوع انتي بتستخدميه هنخلط المكونات دي كويس ونحطهم في اي حاجة فاضية وبكده يبقى منعم الاقمشة جاهز وهيبقى عندنا كمية هتقعد فترة كبيرة نقدر نستخدمه في اي وقت لتنضيف التراب ولتنعيم الهدوم كمان نحطه مع الهدوم في الغسالة بالطريقة العادية.

تنضيف التراب
تنضيف التراب

10- البقع واثار المية والصابون اللي بتكون في الفنجانين ممكن نتخلص منها بسهولة باننا نخلط كميات متساوية من المية والخل الابيض ونصب الخليط في الفنجانين ونسيبها ساعة وبعدين نغسلها بسفنجة هنلاقي مافيش اي اثار لبقع ولا اي حاجة في الفنجان.

تنضيف الفنجانين
تنضيف الفنجانين

11- المكوى مع الوقت الحديد بتاعها لونه بيغير وساعات اللون ده بيطلع في الهدوم واحنا بنكوي وبيبوظها عشان نلمع الحديد بتاعها ونرجعه بيلمع تاني هنجيب لوح التقطيع الخشب بتاع المطبخ ونحط عليه ورقة زبدة ونرش عليها كمية ملح ونسخن المكوى وندوس بيها على الملح كويس ونمشيها عليه كذا مره لمدة دقيقة هنلاقي الحديد بتاع المكوى رجع يلمع تاني زي الاول كانها جديدة.

تنضيف المكوى
تنضيف المكوى

12- المشكلة اللي بنعاني منها في الحمام دايما الاثار اللي بتبقى على الحيطة من الصابون والبخار ومع الوقت بتتكون بكتيريا  في الحمام ممكن تسبب بقع واثار صعب انها تطلع, لكن احنا جايبين الحل بانك هتخلطي ¼ كوباية من بيروكسيد الهيدروجين ” اللي هي مية الاكسجين” وهتلاقوها في الصيدلية رخيصة جدا ومعاها معلقة كبيرة اي نوع صابون سايل و1/2 كوباية مية هنخلطهم كويس وناخد من الخليط على سفنجة ونبدأ نمسح بيها البلاط وننضف اي بقع عليه وبعدين نغسليه بالمية العادية, ولو في بقع صعبة اوي ممكن ترشي الخليط وتسيبيه 10 دقايق وبعدين تفركيه بالسفنجة وتغسليه بالمية, ولو عايزة تحافظي على الحمام نضيف اطول فترة ممكنة اخلطي مية وخل ابيض بكميات متساوية وحطيها في ازازة ببخاخ ورشي بيها البلاط مرتين في الاسبوع لو مشيتي على الروتين ده هتلاقي الحمام على طول نضيف ومش هيتكون عليه اي بقع ومش هتتعبي في تنضيفه تاني.

او ممكن بليفة خشنة نحط عليها كربوناتو ونفرك البلاط وبعدين نغسله بالمية وممكن نستخدم فرشة السنان نحطها في الكربوناتو ونفرك بيها البلاط والاماكن الضيقة اللي بين السيراميك.

 او نفرك البلاط بالليمون ونسيبه من 10- 15 دقيقة وبعدين نشطفه بالمية.

تنضيف بلاط الحمام
تنضيف بلاط الحمام

13- مشكلة انسداد صفاية الاحواض اللي كل البيوت بتعاني منها عشان نتخلص من المشكلة دي هنخلط كميات متساوية من الملح والكربوناتو ونحطها في الصفاية وبعدين ندلق عليهم خل ابيض ونسيبها ربع ساعة وبعدين ندلق فيها مية مغلية هتلاقيها اتسلكت ومافيش اي انسداد خالص فيها.

تسليك صفاية الحوض
تسليك صفاية الحوض

14- عشان ننضف البانيو ونرجعه بيلمع باسهل طريقة هنبله بالمية ونرش فيه كربوناتو ونفركه بليفة خشنة ونسيبه 10 دقايق وبعدين هنخلط كميات متساوية من الخل الابيض والكلور ونرشه في البانيو كله على الكربوناتو ونسيبه من نص ساعة لساعة وبعدين اشطفيه بالمية كويس جدا.

تنضيف البانيو
تنضيف البانيو

15- عشان نتخلص من الدهون وبقايا الاكل اللي بتكون لازقة في الطاسة هنرش فيها كمية من الملح ونحط عليه مية ونسيبها عشر دقايق وبعدين نغسلها, هتلاقي الدهون طلعت بسهولة من غير ما تدعكي وتتعبي نفسك.

تنضيف الطاسة من الدهون
تنضيف الطاسة من الدهون

16- السفنجة اللي بنستخدمها في غسيل الاطباق والتنضيف محتاجة بردو تكون نضيفة عشان واحنا بنضف بيها مش بدل ما تنضف تزودلنا المشكلة, وعشان ننضفها هنحتاج كوبايتين مية سخنة ونضيف عليهم 2 معلقة كبيرة ملح ونحطهم في طبق بلاستيك ونسيب فيها السفنجة طول الليل لحد الصبح هتلاقيها نضفت خالص من اي حاجة فيها.

تنضيف سفنجة التنضيف
تنضيف سفنجة التنضيف

17- لو عندك Shower stall اللي هو بيكون ازاز مقفول حوالين الدش ومش عارفة تنضفيه من اثار الصابون هاتي مناديل ويبس وامسحي بيه الازاز وبعدين امسحيه بسفنجة نضيفة وبعدين اشطفيه بالمية.

تنضيف ازاز الحمام
تنضيف ازاز الحمام

 18- مشكلة كتير بنتعرض لها في المطبخ ان بيضة تقع تتكسر طبعا بتبهدل الدنيا ومش بنعرف ننضفها ازاي ده غير ريحتها النفاذة اللي مش بتروح بسهولة, اسهل طريقة لتنضيفها وحل المشكلة دي اننا نرش عليها ملح ونسيبها ربع ساعة وبعدين نشيلها بمنديل ورق هتلاقي اثار البيضة كلها اتشالت وكمان الملح هيمتص الريحة اللي ممكن تسيبها في المكان.

تنضيف مكان البيض
تنضيف مكان البيض

19- حوض المطبخ طبعا مع الاستخدام المستمر بيجير وبيبقى فيه بقع ولمعته بتروح عشان ننضفة هنجيب ملح نرشة في الحوض وعلى الصفاية ونجيب نص ليمونة ونفركه كويس بالملح والليمون وبعدين نشطفه بالمية هتلاقيه رجع يلمع تاني ده غير ان الليمون هيسيب ريحة حلوة فيه.

تنضيف حوض المطبخ
تنضيف حوض المطبخ

20- لكل بيربوا حيوانات اليفة في البيت وعندهم مشكلة ان الحيوانات بتسيب ريحة عشان نتخلص منه بسهولة هنخلط كوبايتين مية دافية مع معلقة كبيرة كربوناتو ومعاهم كام نقطة من زيت اللافندر او زيت الليمون او زيت الياسمين او اي نوع زيت عطري مفضل عندكم ونحطهم في ازازة ببخاخ ونرجهم كويس مع بعض ونرش بيه المفروشات اللي عليها ريحه او في البيت كله هيدي ريحة حلوة ومنعشة اوي للمكان.

التخلص من ريحة الحيوانات
التخلص من ريحة الحيوانات

21- عشان تنضفي التلاجة بطريقة سهلة وسريعة هنخلط لتر مية مع 2 معلقة كبيرة كربوناتو ونفرك التلاجة بالخليط ده وبعدين نمسحها بقماشة ناعمة.

– وعشان نتخلص من اي روايح في التلاجة نحط فيها شرايح ليمون, او حتة فحم ممكن نلفها في شاشة ونعلقها في التلاجة او تحطي كربوناتو في طبق صغير وتحطيه في اي مكان في التلاجة, او حطي فيها شريحة توست اسمر, كل الحاجات دي بتمتص الروايح ومش هتخلي في التلاجة اي ريحة مش حلوة.

تنضيف التلاجة
تنضيف التلاجة

22- المرايات دايما بتبقى ملطشة من ايدينا او بيجي عليها ميك اب او اي حاجة بتخليها مطفية وكلها علامات عشان نرجعها بتلمع تاني, هنجيب منظف ازاز الشبابيك ونضيف عليه معلقتين كبار كحول ونحط الخليط في ازازة ببخاخ ونرشه على المرايا ونمسحها بقماشة ناعمة.

تنضيف المرايات
تنضيف المرايات

23- لوح التقطيع اللي بنستخدمه في المطبخ من الحاجات اللي لازم نهتم بتنضيفها باستمرار لانه ممكن يتكون عليه بكتيريا تضرنا, هنضفة بطريقة بسيطة جدا هنرش عليه ملح خشن ونجيب نص ليمونة ونفركه كويس بيها مع الملح ونسيبه عليها من 5 – 10 دقايق وبعدين بنص الليمونة التاني هنفركه مرة كمان وبعدين نغسله بمية دافية.

تنضيف لوح التقطيع
تنضيف لوح التقطيع

24- تنضيف السجاد كمان من الحاجات المتعبة جدا وحتى بعد التنضيف ساعات مش بنوصل للنتيجة اللي احنا عايزينها, لكن النهاردة هتبقى المهمة دي سهلة عليكي بانك هترشي على سطح السجادة كلها كربوناتو ونشا وتسيبيه ربع ساعة عشان الخليط يمتص اي بقع او تراب وبعدين تشفطيه بالمكنسة هتلاقيها نضفت من اي تراب او بقع وكمان هتخلصك من اي ريحة مش حلوة فيها.

تنضيف السجاد
تنضيف السجاد

شوفي كمان حيل وافكار منزلية مبتكرة ماتفوتكيش

حيل وافكار منزلية
حيل وافكار منزلية

مقالات متعلقه

ازاي تعملي ازالة السموم من البيت

ازاي تعملي ازالة السموم من البيت

12 عادة بسيطة هتساعدك تحافظي على البيت نضيف ومترتب على طول

12 عادة بسيطة هتساعدك تحافظي على البيت نضيف ومترتب على طول

15 حيلة هتساعدك تنضفي البيت بشكل اسرع وبطريقة سهلة وفعالة

15 حيلة هتساعدك تنضفي البيت بشكل اسرع وبطريقة سهلة وفعالة