7 طرق لعمل الكريم المرطب بمكونات طبيعية .. اعرفيها معانا
الكريم المرطب من الحاجات الاساسية والمهمة جدا لبشرتنا اللي لازم منستغناش عنها ابدا لانه هو اللي بيحافظ على رطوبة ونعومة بشرتنا من الجفاف وبيحفظ المية جواها وبيخليها دايما رطبة وشكلها صحي, لكن مشكلة المرطبات اللي موجودة في السوق ان في كتير منها في مواد كيميائية وممكن تأثر على بشرتنا وخصوصا اللي بشرتهم حساسة زيادة ولازم تفضلي تجربي كتير لحد لما تلاقي اللي يناسبك, عشان كده احنا النهاردة جايبين لكل بنات طرق تقدروا تعملوا بيها الكريم المرطب بنفسكم في البيت بمكونات طبيعية سهلة وبسيطة.
7 طرق لعمل الكريم المرطب بمكونات طبيعية:
1- كريم اللافندر وزيت جوز الهند:
المكونات:
– ½ كوباية زيت جوز هند.
– معلقة صغيرة زيت فيتامين E.
– 12 نقطة من زيت اللافندر.
الطريقة:
هندوب زيت جوز الهند في حمام مية سخنة يعني هنجيب اي حاجة عندنا نغلي فيها مية وبعدين نحط زيت جوز الهند في طبق ونحطه في المية دي لحد ما يدوب, بعد كده هنضيف عليه باقي المكونات ونخلطهم كويس مع بعض, وكده يبقى المرطب بتاعنا جاهز نحطه في اي علبة فاضية ونستخدمه على البشرة.
والكريم ده مفيد جدا للبشرة بسبب المكونات فيه زيت جوز الهند مكافح للشيخوخة وبيحافظ على شباب البشرة, مضاد للفطريات والجراثيم, ومرطب هايل للبشرة, وبيحتوي على خصائي مضادة للاكسدة, وفيتامين اي مفيد جدا في علاج حب الشباب والندبات اللي بتنتج عنه , وزيت اللافندر فيه خصائص مضادة للاكسدة وبالتالي بيحمي البشرة من الجذور الحرة اللي بتسبب شيخوخة البشرة, ومهديء للعضلات.
2- كريم الالوفيرا وزيت اللوز:
المكونات:
– 4 معالق كبيرة جل صبار الالوفيرا.
– 2 معلقة كبيرة زيت جوز الهند.
معلقة صغيرة زيت فيتامين E.
– 2 معلقة كبيرة زيت لوز حلو.
الطريقة:
هنخلط جل صبار الالوفيرا مع زيت فيتامين E وزيت اللوز وبعدين ندوب زيت جوز الهند ونضيفة عليهم ونقلبهم لحد ما يمتزجوا مع بعض كويس وكده يبقى الكريم جاهز عندنا, والكريم ده مناسب للبشرة العادية .
3- كريم مرطب لعلاج الاكزيما:
المكونات:
– ¼ كوباية زيت جوز هند.
– ¼ كوباية زبدة الشيا.
– ¼ كوباية شوفان.
– 2 معلقة صغيرة زيت فيتامين E.
– كام نقطة من زيت اللافندر.
الطريقة:
هنطحن الشوفان في الخلاط لحد ما يبقى عندنا دقيق ناعم, وندوب زيت جوز الهند على نار هادية ونضيف عليه زبدة الشيا وزيت اللافندر ونقلبهم كويس وبعدين نضيف عليهم الشوفان المطحون وفيتامين E ونقلبهم كويس مع بعض لحد ما يدوبوا ويمتزجوا مع بعض وبعدين نرفعهم من على النار, وكده يبقى الكريم جاهز ونحطه في علبة فاضية لحد ما يتجمد ونستخدمة, وممكن نحتفظ بيه في درجة حرارة الغرفة عادي بس لو الدنيا حر ممكن نحطه في التلاجة.
الكريم ده مرطب وفي نفس الوقت لعلاج الاكزيما اللي بتكون في الجلد بسبب مكوناته زي ما قولنا فوايد زيت جوز الهند وفيتامين اي وزيت اللافندر, وزيادة كمان عليهم فوايد الشوفان مفيد جدا في علاج التهاب الجلد ويعتبر علاج طبيعي للاكزيما, وبيهدي البشرة, وزبدة الشيا مرطب طبيعي للبشرة لانه غني بفيتامين A.
4- كريم زبدة الشيا وزيت الفانيليا:
المكونات:
– ½ كوباية زبدة الشيا.
– ¼ كوباية زيت جوز الهند.
– ½ معلقة صغيرة زيت الفانيليا.
– معلقة كبيرة زيت فيتامين E.
هندوب زيت جوز الهند ونضيف عليه زبدة الشيا وفيتامين E وزيت الفانيليا ونخلطهم كويس مع بعض, ونحطه في التلاجة 10 دقايق وبعدين نطلعه نخلطه تاني بالشوكة عشان نتأكد ان كل المكونات امتزجت مع بعض كويس,بعدين نحطه في علبة فاضية ونستخدمه.
5- كريم جل الالوفيرا وشمع العسل:
المكونات:
– ¾ كوباية جل صبار الالوفيرا.
– 1/8 كوباية شمع العسل.
– ¼ كوباية زيت لوز حلو.
– 2 معلقة كبيرة زيت جوز الهند.
– ½ معلقة كبيرة فيتامين E.
– 6 نقط زيت زيت البرتقان.
– نقطتين زيت الليمون.
الطريقة:
في حمام مية هنسيح شمع العسل مع زيت جوز الهند وزيت اللوز الحلو, وفي طبق تاني هنسيح جل الالوفيرا لوحده بردو في حمام مية وبعدين لما شمع العسل والزيوت يسيحوا نضيف عليهم جل الصبار ونقلبهم مع بعض كويس بالمعلقة او ممكن نخلطهم مع بعض في الخلاط, نسيبه يبرد وبعدين نضيف عليه فيتامين E وزيت البرتقان وزيت الليمون ونقلبهم مع الخليط كويس, هنحطه في علبة ونحتفظ بيه في التلاجة, والكريم ده ينفع لترطيب الايد والبشرة والجسم كله.
6- كريم الالوفيرا:
المكونات:
– كوباية جل صبار الالوفيرا.
– ¼ كوباية شمع العسل.
– ¼ كوباية زيت لوز حلو.
– ¼ كوباية زيت جوز الهند.
– 10 نقط اي زيت عطري تختاروه.
الطريقة:
هندوب شمع العسل وزيت جوز الهند وزيت اللوز مع بعض في حمام مية سخنة ولما يدوبوا خالص نسيبهم يبردو وبعدين نحطهم في الخلاط ونضيف عليهم صبار الالوفيرا والزيت العطري ونضربهم مع بعض كده هيبقى الكريم جاهز نحتفظ بيه في علبة فاضية.
7- كريم زيت الزيتون وشمع العسل:
المكونات:
– ½ كوباية زيت زيتون.
– 2 معلقة كبيرة او 14 جرام شمع العسل.
– كوباية مية.
– من 10- 20 نقطة اي زيت عطري.
الطريقة:
هندوب شمع العسل مع زيت الزيتون في حمام مية سخنة على نارهادية ونقلبهم لحد ما الشمع كله يدوب خالص, هنغلي كوباية المية وبعدين نسيبها لحد ما تبرد شوية وتبقى دافية بس ونضيفها واحدة واحدة لشمع العسل وزيت الزيتون ونضربهم بالبلندر مع بعض واحنا بنضيف المية او في الخلاط وبعدين نضيف الزيت العطري ونضربهم تاني لحد ما يبقى عندنا خليط كريمي نحطه في علبة ونستخدمة.
شوفي الطريقة والوقت الصح لاستخدام الكريم المرطب
