اعرفي معانا 8 استخدامات جمالية لفرشة السنان !

ريهام محمود

في

8008

اكيد لما هنقول فرشة السنان كل تفكيرنا هيجي اننا ننضف بيها سنانا ونحافظ عليها, لكن فرشة السنان ليها استخدامات تانية غير اننا ننضف بيها سنانا بس, وده اللي هنعرفه النهاردة من خلال المقال بتاعنا.

تعالوا نتعرف على 8 استخدامات جمالية لفرشة السنان:

1- التخلص من تكتل الماسكارا على الرموش:

كتير مننا لما بنحط الماسكارا بنعاني من مشكلة تكتل الماسكارا على الرموش وبيبقى شكل مش حلو لكن فرشة السنان هتخلصنا من المشكلة دي هنجيب فرشة السنان وبعد ما نحط الماسكارا نمشي بالفرشة على الرموش عشان تشيل الزيادات وتخلصنا من اي كتل .

2- لتنضيف الضوافر:

من الاستخدامات المفيدة لفرشة السنان هي تنضيف الضوافر, تقريبا كلنا بنتعرض ان الضوافر ممكن يبقى تحتيها مش نضيف بشكل كافي بسبب شغل البيت او التراب اللي في الجو وخصوصا اللي ضوافرهم طويلة بيلاقوا صعوبة ينضفوا تحتها كويس, لكن فرشة السنان هتسهل علينا تنضيف الضوافر باننا نستخدمها لفرك الضوافر بالمية والصابون.

او ممكن نعمل خلطة بالكربوناتو والليمون ونفرك بيها الضوافر بفرشة السنان عشان نخليها بيضا وبتلمع.

3- سرحي بيها الشعر واتخلصي من البيبي هير:

ممكن نستخدم فرشة السنان نسرح بيها خصل الشعر هتلاقو بعدها الشعر بقى شكله ناعم جدا ومتساوي بشكل حلو ومافيش شعر طاير, ومفيدة جدا انها تخلصك من البيبي هير ممكن ترشي عليها مثبت شعر وتمشيها على البيبي هير.

4- فرشة للحواجب:

فرشة السنان مفيدة جدا في ظبط شكل الحواجب, بدل ما تجيبي فرشة مخصوص للحواجب ممكن تستخدمي بدالها فرشة السنان تسرحي بيها الحواجب هتظبط لك شكله وهتساوي شكل الشعر.

5- لتقشير الشفايف والبشرة والجسم:

المواظبة على تقشير الشفايف من الحاجات المهمة جدا عشان نحافظ على شفايفنا ناعمة وشكلها حلو, وفرشة السنان من الحاجات اللي هتساعدنا في المهمة دي ممكن تفركيها بالمية بس, او تحطي على الشفايف كريم مرطب وتفركيها بالراحة بالفرشة هتخلصك من كل الجلد الميت وتخلي الشفايف ناعمة, او ممكن تعملي مقشر بخلط سكر مع زيت الزيتون وفرك الشفايف بفرشة السنان بالخليط ده في حركات دائرية.

والفرشة مش للشفايف بس لا كمان ممكن تستخدميها لفرك اي منطقة في الوش او الجسم يعني ممكن تستخدميها للكوعين والركب.

وكمان للوش خصوصا عند منطقة الانف عشان تخلصك من الرؤوس السودا ممكن تحطي عليها معجون سنان وتسيبيه شوية ينشف وبعدين تفركيه بفرشة السنان, او في طريقة تانية اننا نبل حتة قطن بمية دافية ونحطها على الانف دقيقتين كده عشان نفتح المسام وبعدين نخلط شوية كربوناتو مع معجون سنان ونحط عليهم مية لحد ما يبقى عندنا الخليط على شكل عجينة هناخد منه بفرشة السنان ونفرك الانف بيه كويس في حركات دائرية من دقيقتين لتلات دقايق وبعدين نغسله, الطرق دي فعالة جدا في التخلص من الرؤوس السودا.

6- لوضع وازالة منتجات البشرة:

ممكن تستخدميها مع الماسكات زي ما قولنا ممكن تعملي بيها سكراب للبشرة تحطي السكراب وتفركي البشرة بالفرشة, او ممكن كمان تفردي بيها الماسك وتشيليه بيها قبل ما تغسليه تفركيه بالفرشة عشان يسهل عليكي انك تتخلصي من الماسك وخصوصا مع الماسكات اللي بيكون فيها حاجات بتنشف اوي على البشرة وبتبقى صعب تتشال وبعد ما تفركيه اغسليه عادي بالمية هتلاقيه اتشال بسهولة.

7- لتنضيف البشرة بعد ازالة الشعر:

ممكن تستخدميها تفركي بيها البشرة بعد ازالة الشعر, تعملي سكراب للبشرة وتفركي السكراب بالفرشة هينعم بشرتك جدا بعد ازالة الشعر وهيمنع ظهور الحبوب او تهيج البشرة بعد الازالة لانه هينضف البشرة كويس ومش هيخلي في شعر تحت الجلد.

8- لتنضيف فرش المكياج:

فرش المكياج بتاعتنا لازم نحافظ عليها دايما نضيفة عشان منضرش بشرتنا, وفرشة السنان من الحاجات اللي هتسهل علينا تنضيف فرش المكياج اننا نفرك الفرش بالراحة بفرشة السنان هتنضفها كويس جدا حتى من جوه وفي الاماكن اللي بيكون صعب تنضيفها لانها هتدخل بين الشعر وتنضف الاركان والاماكن الصغيرة اللي مش بتقدري توصلي لها بصوابعك.