8 اسرار لوضع المانيكير من غير ولا غلطة

زى ما كلنا عارفين المانيكير مهم لاى لوك زيه زى المكياج و الاكسسوار، وكمان ستايلات المانيكير و الوانه مابتخلصش و دايما بنحب بنجرب بس معظم الوقت بتقابلنا مشكلة اننا مابنعرفش نظبطه او بيتغلبط مننا فبنضطر نروح للكوافير علشان نعمل مانيكير مضبوط و ده بيكلف و بياخد وقت . علشان كده فى المقال ده ” بنات حوا ” هتقولك ازاى تعملى مانيكير من غير ولا غلطة و زى المحترفين وفى 8 خطوات بس ..

8 اسرار اعرفى بيهم ازاى تعملى مانيكير من غير ولا غلطة

1- قبل ما تحطى المانيكير اغسلى ايدك  بالصابون و امسحى ضوافرك بمزيل المانيكير ” الاسيتون ” ، و بعدين اغسلى ايدك بمياة دافية قبل ما تحطى المانيكير علشان يدوم لوقت اطول .

2- مهما كان المانيكير بتاعك نوعه كويس لازم ترجيه قبل الاستخدام والادق من إنك ترجيه هو أنك تلفي ازازة المانيكير بين ايديكي، لانه لو فضل المانيكير من غير استخدام كتير ومع الوقت بيفصل ، لكن كمان مترجيهوش جامد علشان ميعملش فقاقيع و يبقى اصعب انك تفرديه على ضوافرك .

3- سر كمان مهم علشان تعملى مانيكير من غير ولا غلطة هى انه المانيكير من اللون الواحد ” يعنى لو هتحطى مانيكير بينك مثلا ” بيتحط فى 3 خطوات : 

-فى نص الضافر .
-و مرة على الضافر من الناحية اليمين.
و مرة على الضافر من الناحية الشمال .
التركيبة السائلة للمانيكير لما بتتفرد على الضوافر بالطريقة دى بتبقى كثافتها اقل،  بتدوم لوقت اطول و كمان بتنشف اسرع .

4- لو المانيكير بتاعك فضل فترة طويلة مركون ما تستخدميهوش ، لانه مع الوقت المادة المخففة او الـ diluter  اللى بتبقى مووجودة فى المانكير بتتبخر وبتخليه يبقى تقيل، علشان كده هتلاحظى انك لما تيجى تحطيه انه الطبقات بتاعته تقيلة و بتبقى مش عارفة توزعيه على ضوافرك بالتساوى ، كمان هياخد وقت اطول علشان ينشف و هتلاقيه بيتقشر من اقل حاجه . 

5- لو حطيتى مانيكير و حسيتى انه تقيل اوى او الطبقات جت منك سميكة و عايزة تخففيها ، استخدمى المخفف او الـthinnner  بدل الاسيتون لانه بيبقى الطف على المانيكير و هتقدرى باستخدامه انك تخففى المانيكير بس من غير ما تضطرى انك تشيليه كله و تعملى مانيكير من جديد .

6- فى موضة السنة دى ، هتحتاجى تعملى مانيكير من لونين علشان تعملى لوك مشرق و تريندى، علشان كده لازم تستنى لما الطبقة الاولى تنشف كويس جدا قبل ما تحطى الطبقة الثانيه . ممكن تستخدمى المانيكير سريع الجفاف بس خدى بالك انه مدة صلاحيته بتنتهى بسرعة .

7- السرعة اللى بينشف بيها المانيكير بتختلف من نوع للتانى ، فلو انتى مستعجلة ممكن تسرعى من جفاف المانيكير باستخدام السيشوار بس يكون على درجة حرارة متوسطة و مش قريب اوى من الضوافر .

8- لو المانيكير بتاعك اتلغبط او اتقشر و مفيش وقت انك تعمليه من جديد ، ممكن تصلحيه بانك تنعمى المناطق اللى اتلغبطت بجنب علبة كبريت و بعدين حطى طبقة جديدة من المانيكير فوق المنطقة اللى عايزة تصلحيها .