نصايح تعرفى بيها ازاى تحطى الروج الاحمر بطريقة صحيحة ..

مفيش حاجه بتدى لوك حلو و جرئ قد اللون الاحمر خصوصا الروج الاحمر ، و مفيش شك انه بيكون اختيار الشخصية الواثقة من نفسها و من مظهرها . لكن كمان انك تحطى روج احمر مش حاجه سهلة لانه بيحتاج مناسبات معينة وطريقة معينة علشان يبقى مظبوط معاكى و يدى شكل حلو زى انك تختارى الدرجة والنوع المناسبين لبشرتك ، علشان كده فى المقال ده ” بنات حوا ” هتقولك على نصايح مهمة تعمليها و انتى بتحطى الروج الاحمر علشان تقدرى تحطيه من غير قلق و يطلع شكله حلو .

نصايح تعرفى بيها ازاى تحطى الروج الاحمر بطريقة صحيحة ..

1- اختارى درجة الروج الاحمر المناسبة :

لو عايزة تعرفى ايه هى درجة الاحمر المناسبة ليكى يبقى لازم تجربى درجات كتيرة و مختلفة على قد ما تقدرى، كل مرة هتشترى فيها مكياج جربى تشترى درجة احمر مختلفة و تجربيها و اسألى اصحابك شكلها عليكى ازاى علشان يساعدوكى تعرفى ايه هى الدرجات المناسبة للون بشرتك. و اعرفى ان كانت بشرتك من النوع البارد ولا الدافئ ، “القاعدة بتقول انه لو لون بشرتك بيميل للاصفر و البيج تبقى بشرتك دافية ، و لو لون بشرتك بيميل للبينك او الاحمر فى خدودك تبقى بشرتك باردة ” . لو بشرتك دافية اختارى لون احمر اساسه برتقالى ، و لو باردة اختارى روج احمر اساسه بينك او ازرق .

2- استعملى الروج المات matte او الكريمى بدل الـlip gloss :

الروج الملمع او الـlip gloss بيميل لانه يلمع و ده ممكن يغير من شكل الروج على بشرتك، و استخدمى الروج المطفى او المات افضل .

3- خلى الروج الاحمر يبان طبيعى : 

اى وقت تحطى فيه روج بلون واضح و جرئ سواء الاحمر او الموف او الدرجات دى من الالوان ، خدى بالك انه خطوط تحديد شفايفك متبقاش باينة بانك تدمجيها كويس على شفايفك و انها تبان طبيعية ، بعد ما تحطى الروج ابعدى خطوتين عن المراية و شوفى ايه هى الاماكن اللى محتاجة تتخفف او تتصلح ، و ممكن تستخدمى الكونسيلر علشان تساوى الروج و متنسيش تضحكى قدام المراة علشان تتأكدى انه مفيش اى بقع روج على اسنانك :)

4- استبدلى قلم التحديد بالروج : 

ممكن تستتغنى عن قلم التحديد لو مابتعرفيش تستخدميه كويس بالروج نفسه ، حطى طبقى خفيفة من الروج الاحمر و افرديها كويس على شفايفك واستخدميها كقاعدة للروج الاساسى .

5- حطى الروج الاحمر بطريقة مختلفة : 

حطى الروج الاحمر بطريقة مختلفة بانك تستخدميه  مع مكياج عيون سموكى و فستان مناسب ، على عكس الكلام اللى بيقول انه الروج الاحمر مينفعش مع المكياج السموكى او التقيل، الفكرة كلها هى انك تحافظى على اللوك بتاعك بسيط و مناسب ليكى .

6- استخدمى الروج الاحمر بثقة :

خليكى دايما واثقة فى نفسك مهما كان اللوك اللى هتعمليه ، و لو قررتى تحطى روج احمر اعملى معاه المكياج و الهدوم المناسبة و هتطلعى بلوك واثق و حلو جدا .

شوفي كمان 6 اسباب هيخلوكي تحبي الروج المات !