اعملي بنفسك مثبت الشعر بمكونات طبيعية
مثبت الشعر من الحاجات اللي شعرنا بيحتاجها دايما وخصوصا في الصيف عشان نحميه من حرارة الجو والرطوبة لكن مشكلة مثبتات الشعر اللي في السوق انها بتكون فيها مواد كيميائية ونسبة عالية من الكحول بتضر الشعر وبتخليه جاف, عشان كده احنا النهاردة جايبين لكل بنات حوا اكتر من طريقة لعمل مثبت الشع بمكونات طبيعية مش هتسبب اي ضرر للشعر وبالعكس كمان هتفيده وتخليه صحي وبيلمع.
تعالوا نشوف مع بعض طرق لعمل مثبت الشعر بمكونات طبيعية:
1- الوصفة الاولى:
المكونات:
– كوباية مية.
– 4 معالق صغيرة سكر ابيض.
– نقطتين من زيت المسك.
– نقطتين من زيت اللافندر.
– نقطتين من زيت النعناع.
– نقطتين من زيت الروزماري.
الزيوت دي اختيارية يعني مش لازم تحطيها كلها ممكن تختاري نوع او اتنين او تختاروا زيوت تانية حسب ما تفضلوا الريحة بتاعة الاسبراي.
الطريقة:
هنغلي كوباية المية ونضيف لها السكر لحد ما يدوب خالص وبعدين هنرفعها من على النار ونسيبها لحد ما تبرد خالص وبعدين نضيف لها الزيوت اللي احنا اخترناها, ونحط الاسبراي بتاعنا في ازازة ببخاخ ونحتفظ بيه في التلاجة وكده يكون جاهز عندنا نستعمله في اي وقت, والوصفة دي الميزة فيها انها من غير كحول.
2- الوصفة التانية:
المكونات:
– كوباية ونص مية.
– 2 معلقة كبيرة سكر ابيض.
– 1 معلقة كبيرة كحول طبي “من الصيدلية”.
– من 10 – 15 نقطة اي نوع زيت تختاروه “اللافندر – النعناع – الروزماري – الخزامي – زيت شجرة الشاي – زيت الليمون”.
الطريقة:
هنغلي المية وبعدين نحط السكر لحد ما يدوب, نرفعه من على النار ونسيبه يبرد وبعدين ونضيف الزيوت والكحول, ونحطه في ازازة ببخاخ ونستخدمه, والاسبراي ده مالوش فترة صلاحية يعني ممكن يقعد عندك اي فترة مش هيحصله اي حاجة.
3- الوصفة التالتة:
المكونات:
– كوباية مية.
– 2 معلقة كبيرة سكر ابيض.
– 1/4 كوباية من جل صبار الالوفيرا.
– معلقة كبيرة كحول طبي.
– من 10 – 15 نقطة اي نوع زيت تختاروه.
الطريقة:
نفس الطرق اللي فاتت بالظبط بس هنضيف الالوفيرا مع باقي المكونات بعد ما نغلي المية ونسيبها تبرد.
4- الوصفة الرابعة:
المكونات:
– كوباية مية.
– 2 معلقة كبيرة سكر.
– معلقة كبيرة خل التفاح.
– معلقة كبيرة زيت جوز الهند او زيت الجوجوبا او زيت الزيتون.
– من 5 – 10 نقط زيت اللافندر او اي نوع زيت.
الطريقة:
زي الطرق اللي فاتت هنغلي المية وندوب السكر ونسيب الخليط يبرد وبعدين نضيف باقي المكونات.
شوفي كمان وصفات لتعطير الشعر بمكونات طبيعية
