اعرفي ازاي تزودي وزنك 11 كيلو في 25 يوم باللبن بس !
كلنا عارفين عشان نزود وزننا محتاجين ناكل كمية اكل اكتر من اللي احنا متعودين ناكلها ونزود عدد وجباتنا لكن الموضوع ده ساعات بيكون صعب على بنات كتير انهم يزودوا كمية الاكل ومعدتهم مش بتتقبل الا كمية صغيرة بس من الاكل ومش بيقدروا ياكلوا اكتر منها, لكن لحسن الحظ ان في طريقة سهلة ورخيصة تزود الوزن ومن غير ما نزود في كمية الاكل وهي الطريقة اللي احنا هنتكلم عليها النهاردة من خلال المقال بتاعنا هتساعدك تزودي وزنك 11 كيلو في 25 يوم.
– تعالوا نعرف الطريقة ازاي تزودي وزنك 11 كيلو في 25 يوم ؟
هي طريقة او نظام “جوماد” الطريقة دي بتعتمد على شرب 4 لتر لبن كامل الدسم يوميا, لان اللبن كامل الدسم غني بالبروتين والدهون وده بيساعد على تقوية العضلات واكتساب الوزن, كمان السوائل بتبقى اسرع في التأثير والجسم بيستفاد منها وبيمتصها وبيهضمها اسرع من الاكلات الصلبة.
وال4 لتر لبن كامل الدسم بيحتوي على 2400 كالوري او سعر حراري, و200 جرام كربوهيدرات, 120 جرام دهون, 120 جرام بروتين, وغيرها كتير من الفيتامينات والمعادن, وخبراء التغذية صرحوا ان نظام جوماد افضل حتى من المنشطات والفيتامينات اللي بتساعد على زيادة الوزن بسرعة.
– ليه النظام ده بيساعد على زيادة الوزن ؟
نظام جوماد بيساوي 2400 سعر حراري جسمك هياخدها في اليوم الواحد ده بالاضافة للوجبات الاساسية, ونظام جوماد مش بس بيزود الوزن او بيدي الجسم سعرات حرارية لكن كمان بيمد الجسم بنسبة عالية من البروتين اللي هتساعد على بناء العضلات, ده غير العناصر التانية اللي احنا اتكلمنا عليها, كمان النظام ده بيزود نسبة هرمون التستوستيرون اللي بيساعد على زيادة قوة العضلات.
– هل النظام ده آمن ؟
النظام آمن جدا ومافيش منه اي ضرر على الجسم, ده غير انك هتاخدي كمية كالسيوم كبيرة والدراسات اثبتت ان ده مفيد جدا للجسم لانه بيقلل من خطر الاصابة بحصوات الكلى.
– ايه نوع اللبن اللي نستخدمه ؟
اللبن اللي هيجيب نتيجة فعالة هو اللبن كامل الدسم لكن اللبن الخالي الدسم او قليل الدسم مش هيديكي النتيجة المطلوبة لان فيه نسبة دهون مشبعة وسعرات حرارية اقل, وممكن تشربي اللبن المبستر او اللبن العادي مش هتفرق المهم يكون كامل الدسم.
– ازاي نطبق نظام جوماد ؟
هنوزع الكمية على الوجبات وبين الوجبات يعني مثلا نشرب 1/2 لتر على الفطار, 1/2 لتر على الغدا, 1/2 لتر على العشا, 1/2 لتر كمان بعد الرياضة لو بتمارسي اي نوع رياضة, وبين الوجبات الاساسية كلي وجبات خفيفة واشربي معاها اللبن, وقبل النوم, وحاولي تاكلي وجبة كل 3 ساعات, يعني قسمي الكمية على مدار اليوم كله.
ولو مش هتقدروا في البداية تشربوا الكمية كلها مره واحدة ممكن تضيفوا اللبن بالتدريج يعني
– الاسبوع الاول : كلي كل يوم وجبة كل 3 ساعات بس عشان تعودي معدتك تزود كمية الاكل.
– الاسبوع التاني : كلي وجبة كل 3 ساعات + 1/2 لتر لبن كامل الدسم.
– الاسبوع التالت : كلي كل يوم وجبة كل ساعات + لتر لبن.
– الاسبوع الرابع : كلي وجبة كل ساعات + لترين لبن.
– الاسبوع الخامس : كلي وجبة كل تلات ساعات + 4 لتر لبن.
طبعا زي ما قولنا نقسم الكمية على الوجبات طول اليوم, لما هنقسم كمية اللبن بالطريقة دي ده هيخلينا نعود جسمنا على كمية اللبن بالتدريج وممكن يكون هيجيب نتيجة ابطأ لاننا مش هنشرب ال4 لتر من اول اسبوع لكن هيكون افضل للجسم.
– مثال لتطبيق النظام ممكن تمشوا عليه:
اول حاجة اللبن يتشرب بعد الاكل سواء كان فطار او غدا او عشا او وجبات خفيفة, ولازم تكون في وجبة كل 3 ساعات.
– ممكن نفطر عادي الفطار بتاعنا والافضل ناكل مثلا بيض بالخضار وتشربي معاه عصير برتقان.
– بعد الفطار وجبة خفيفة ممكن تاكلي مكسرات او موز مثلا وبعدها تشربي لتر لبن.
– وجبة الغدا ممكن تاكلي فراخ او لحمة مع الخضار يعني الاكل العادي اللي انتي متعودة تاكلية.
– بعد الغدا وجبة خفيفة تانية مكسرات او تفاح وتشربي بعدها لتر لبن.
– لو بتمارسي رياضة كلي بعدها موز او شوفان واشربي بعدها لتر لبن, ولو مش بتمارسي رياضة كلي وجبة خفيفة وبعدها اللبن.
– كلي وجبة العشا ممكن تاكلي فيها مكرونة بالصلصة وعليها جبنة.
– بعد العشا وقبل النوم ممكن تاكلي جبنة او فاكهة وبعدها لتر لبن.
طبعا ده مثال لتقسيم كمية اللبن انتوا ممكن تغيروه زي ما انتوا عايزين المهم تخلصوا الكمية خلال اليوم, مجرد ما توصلوا للوزن اللي انتوا عايزينه وقفوا النظام ,واكتر فترة لتطبيقه من شهر لشهرين وبعدها اشربوا اللبن مره واحدة في اليوم يعني العادي بتاعنا.
– عشان نحافظ على وزننا ومينزلش تاني نمشي على قواعد التغذية ال8 اللي هي:
1- متفوتيش وجبة الفطار لازم تفطري كل يوم.
2- ناكل كل 3 ساعات وجبة.
3- دخلي البروتين في نظامك الغذائي مع كل وجبة, زي البيض واللحوم الحمرا, والفراخ, والاسماك, الجبنة.
4- كلي خضروات وفاكهة زي الموز, التفاح, الاناناس, البرتقان, التوت, البروكلي, الطماطم, القرع, الخس, الفول, القرنبيط, البسلة.
5- كلي كربوهيدرات ودي هتلاقيها في الارز, المكرونة, الخبز, البطاطس, الشوفان.
6- كلي الدهون الصحية هتلاقيها في البيض, واللحوم الحمرا, والزبدة.
7- اشربي مية عشان تحافظي على الجسم من الجفاف لو بتمارسي رياضة عشان تعوضي نسبة العرق اللي بتخرج من الجسم.
8- كلي الاغذية الكاملة او الطازة زي اللحمة, والسمك, والفاكهة, البيض, الارز, الشوفان, وابعدي عن الاغذية المصنعة اللي هي اللحوم المجمدة او الخضار والفواكة المحفوظة.
اعرفي افضل 6 وجبات فطار هتساعدك على زيادة الوزن
