8 نصايح فعالة لتفادي اضرار استخدام الكمبيوتر فترات طويلة
تقريبا معظمنا بيقضي فترات طويلة جدا قدام الكمبيوتر سواء للشغل او للتسليه او لغيرها, وفي كتير بيبقى طبيعية شغلهم بتفرض عليهم ان هما يقضوا ساعات طويلة قدام الكمبيوتر يوميا وده اكيد بيأثر بشكل سلبي على الصحة وبيسبب الم للجسم وبيضر العين, وللأسف اننا بنهمل الموضوع ده او مش بنهتم بيه اوي ومع مرور الوقت بنلاقي ان المشكلة زادت, عشان كده احنا النهاردة هنقولكم على نصايح فعالة جدا لتفادي الاضرار والمشاكل اللي ممكن تحصل لنا من القعدة قدام الكمبيوتر فترات طويلة.
8 نصايح فعالة لتفادي اضرار استخدام الكمبيوتر فترات طويلة:
1- طريقة القعدة:
من اكتر الحاجات المهمة اللي لازم ناخد بالنا منها هي طريقة القعدة قدام الكمبيوتر لازم نقعد بشكل مستقيم ويكون ضهرنا مفرود, خلي الكمبيوتر في مستوى ايدك مش اعلى ولا اقل, وخلي يكون في مساحة كافية تحت الترابيزة او المكتب اللي انتي حاطه عليه الكمبيوتر بتاعك عشان تقدري تحركي رجلك بحرية من تحتها, والافضل كمان يكون في مسند للرجل تحطي رجلك عليه عشان تبقى مرتاحة اكتر.
2- تغيير القعدة كل فترة:
نحاول نغير قعدتنا كل فترة عشان ميبقاش التركيز على جزء واحد بس في الجسم, وكمان ناخد على الاقل استراحة 5 دقايق كل ساعة نقوم نعمل فيهم اي حاجة تانية لان ده هيمنع التعب وهيحسن كمان التركيز, ولو حصل وحسيتي بالام في الضهر او في الرقبة او الكتف وملزماكي ومش بتروح يبقى لازم تروحي للدكتور عشان المشكلة متزيدش.
3- مستوى الايد في الكتابة على الكمبيوتر:
مستوى الايد وانتي بتكتبي لازم يكون في مستوى لوحة المفاتيح, ومتسنديش منطقة المعصم على المكتب وانتي بتكتبي عشان ده هيخلي الايد في وضع مش مريح وهيتعب العضلات وفي النهاية هتلاقي نفسك حاسة بألم فيها, وحاولي على قد ماتقدري متجهديش الصوابع كتير في الكتابة.
4- خلي اكسسوارات الكمبيوتر قريبة منك:
خلي حاجة خاصة بالكمبيوتر قريبة منك يعني مثلا السماعات او فلاشة او كابل بتستخدميه لنقل حاجة يعني ملحقات الكمبيوتر كلها اللي ممكن تستخدميها عشان متجهديش نفسك كتير او ترهقي نفسك.
5- لو حسيتي بألم روحي للدكتور:
لو حسيتي بألم ملازم ليكي في الصوابع او صداع مزمن بسبب استخدام الكمبيوتر فترات طويلة يبقى لازم متهمليش الموضوع وتروحي للدكتور فورا عشان المشكلة متزدش.
6- تغيير اسلوب الحياة:
المتخصصين في مجال الصحة صرحوا ان القعدة قدام الكمبيوتر لساعات طويلة بتقلل من العمر 15 سنة وان اللي بيقعدوا بشكل مستمر يوميا اكتر من 6 ساعات دول معرضين للوفاة اسرع, ده غير ان القعدة الطويلة بتسبب زيادة الوزن في منطقة الارداف والفخدين لان طول ما انتي قعدة الدهون بتتجمع اكتر حاجة في المناطق دي, عشان كده الافضل نغير اسلوب حياتنا ونحاول على قد ما نقدرنقلل من القعدة قدام الكمبيوتر فترات طويلة اوي.
7- اهتمي بصحة عنيكي:
من اهم النصايح لمستخدمين الكمبيوتر هي انهم يستخدموا فلتر للشاشة عشان يتجنبوا الانعكاسات اللي بتخرج من شاشة الكمبيوتر وممكن تضر العين, ادي عينكي استراحة كل 5 دقايق واعملي لها تمرين بسيط اوي انك تحركيهم يمين وشمال او لتحت وفوق عشان تريحي عنيكي, او تخلي في المكان اللي انتي قعدة فيه زرع مثلا وتبعدي عنيكي عن الشاشة وتركزي عنيكي على الزرع لمدة دقايق عشان تعملي استرخاء للعين وده كمان هيحمي العين من الجفاف لان التركيز في الشاشة لفترة طويلة ممكن يسبب جفاف للعين, متخليش شاشة الكمبيوتر قدام شباك او ضوء لان الضوء ده هينعكس الشاشة ويوجع لك عنيكي, ممكن كل فترة تقفلي وتغمضي عينيكي كذا مره ورا بعض كتمرين للعين وتريحيها شوية من التركيز في الشاشة بشكل مستمر, وممكن نعمل النضارة اللي بتكون مضادة للانعكاسات ودي بتتعمل مخصوص للي بيستخدموا الكمبيوتر فترات طويلة عشان تحمي العين من الاشعة الضارة اللي خارجة من الشاشة.
8- واظبي على ممارسة الرياضة:
الرياضة مهمة جدا بشكل عام ومهمة بشكل خاص للي بيستخدموا الكمبيوتر فترات طويلة عشان تنشطي العضلات وتحافظي عليها قوية وفي وضع صحي, على الاقل مارسي رياضة 30 دقيقة كل يوم يعني ممكن تمارسي المشي او الجري او حتى في البيت تعملي تمارين بسيطة تنشطي بيها العضلات.
