8 طرق لعمل مزيل العرق بمكونات طبيعية
مزيلات العرق من الحاجات اللي مش بنستغنى عنها طول السنة لكن استخدامها بيكون اكتر في الصيف اكيد عشان نمنع العرق اللي بيسببه حرارة الجو والرطوبة ونخلي دايما ريحتنا حلوة, لكن مشكلة مزيلات العرق اللي في السوق ان في كتير منها بيكون فيها مواد كيميائية بتضر البشرة وبتسمر منطقة تحت الابطين وممكن كمان تسبب التهاب وتهيج البشرة وتعملنا مشاكل كتير, عشان كده احنا جايبين النهاردة لكل بنات حوا طرق لعمل مزيلات العرق بمكونات طبيعية وكلها بسيطة ومش مكلفة خالص وفي نفس الوقت ممتازة وفعالة في منع العرق وبتدي ريحة حلوة اوي للجسم.
تعالوا نعرف مع بعض 8 طرق لعمل مزيل العرق بمكونات طبيعية:
1- مزيل عرق الليمون:
المكونات:
– 2 معلقة كبيرة صودا الخبز “كربوناتو”.
– 2 معلقة كبيرة نشا.
– 4 معالق كبيرة زيت جوز الهند.
– 8 نقط من زيت الليمون “من عند العطار”
الطريقة:
هنخلط الكربوناتو والنشا مع بعض كويس ونضيف عليهم زيت جوز الهند وزيت الليمون هنقلب المكونات كلها مع بعض بالمعلقة لحد ما يمتزجوا كويس, ونجيب اي علبة كريم فاضية عندنا نحط فيها الخلطة بتاعتنا ونحطها في التلاجة لمدة نص ساعة بعد كده تقدري تستخدميها عادي جدا بعد الحمام تحطي منها تحت الابطين, ونحتفظ بيها في التلاجة لما نيجي نستخدمها تاني.
2- مزيل عرق زيت جوز الهند واللافندر:
– 1/2 كوباية نشا.
– 1/2 كوباية زيت جوز الهند.
– من 20 – 40 نقطة من زيت شجرة الشاي او زيت اللافندر.
– 20 نقطة من مزيج من زيت النعناع وزيت الليمون وزيت البرتقان ” او اختاروا اي انواع زيوت عطرية مفضلة عندكم”.
الطريقة:
هنسيح زيت جوز الهند ونضيف عليها باقي المكونات ونقلبها كويس مع بعض ونحط الخلطة في اي علبة فاضية ونستخدمها بعد الحمام ناخد كمية صغيرة على الايد وندهنها.
3- اسبراي اللافندر:
المكونات:
– مية ورد.
– معلقة كبيرة من زيت الليمون.
– معلقة صغيرة من ملح البحر.
– 15 نقطة من زيت اللافندر.
– 5 نقط من زيت شجرة الشاي.
– ازازة ببخاخ صغيرة.
الطريقة:
هنخلط الملح مع زيت الليمون وزيت اللافندر وزيت شجرة الشاي ونحطهم في الازازة ونملى باقي الازازة بمية الورد ونرجها كويس عشان نمزج المكونات ونستخدمها عادي بعد الحمام ونرجه كل مره قبل الاستخدام, والمزيل ده ممكن يقعد معاكي 6 شهور.
4- مزيل عرق زيت جوز الهند:
المكونات:
– 1/4 كوباية صودا الخبز “الكربوناتو”.
– 1/4 كوباية نشا.
– من 5 – 6 معالق كبيرة زيت جوز الهند.
الطريقة:
هنخلط المكونات مع بعض ونقلبها لحد ما تمتزج كويس وهتبقى عندنا شبة الكريم, نحطها في اي علبة فاضية ونستخدمها بعد الحمام.
5- مزيل عرق اللافندر والورد:
المكونات:
– 3 معالق كبيرة زيت جوز الهند.
– 3 معالق كبيرة كربوناتو.
– 2 معلقة كبيرة زبدة الشيا.
– 2 معلقة كبيرة نشا.
– وكام نقطة من خليط من زيت اللافندر والورد.
الطريقة:
هنخلط النشا والكربوناتو مع بعض, وبعدين هنسيح زبدة الشيا وزيت جوز الهند في حمام مية سخنة وبعد ما يسيحوا هنضيف عليهم زيت اللافندر وزيت الورد, وبعدين هنضيف النشا والكربوناتو ونقلب الخليط ونمزج المكونات كويس جدا ونحطهم في اي علبة فاضية عندنا ونستخدمه بعد الحمام, وممكن تحتفظي بيه في التلاجة او تسيبيه في الحمام عادي.
6- مزيل عرق زبدة الشيا وفيتامين E:
المكونات:
– 2 معلقة كبيرة زبدة الشيا.
– 2 معلقة كبيرة زيت جوز الهند.
– 5 معالق كبيرة نشا.
– 5 معالق كبيرة شمع العسل.
– 1/2 معلقة صغيرة زيت فيتامين E.
– 1 معلقة كبيرة كربوناتو.
– 20 نقطة من زيت الليمون.
– 10 نقط من زيت النعناع.
الطريقة:
هنخلط زبدة الشيا وزيت جوز الهند وشمع العسل وفيتامين E مع بعض وندوبهم على نار هادية, بعد مايدوب الخليط هنرفعه من على النار ونسيبه يهدى ويبرد شوية لمدة دقيقة وبعدين نضيف عليه النشا والكربوناتو ونقلبهم كلهم مع بعض كويس لحد ما يبقى عندنا خليط كريمي ناعم ونضيف عليه زيت الليمون وزيت النعناع ونقلبهم ونحط الخليط في علبة فاضية ونستخدمه, ممكن نحتفظ بيه في التلاجة.
7- مزيل عرق الفانيليا:
المكونات:
– 1/4 كوباية صودا الخبز.
– 1/4 كوباية نشا.
– 3 معالق كبيرة زيت جوز الهند.
– 1 معلقة كبيرة سكر.
– معلقة كبيرة شمع العسل.
– من 20 – 30 نقطة من زيت الفانيليا “وممكن تختارو اي نوع زيت عطري انتوا تفضلوه”.
الطريقة:
هندوب شمع العسل وبعدين وهو على النار هنضيف عليه زيت جوز الهند وزيت الفانيليا والسكر وصودا الخبز والنشا ونقلبهم مع بعض على نارهادية اوي لحد ما المكونات كلها تدوب وتمتزج مع بعض كويس ونرفعها من على النار ونحطها في اي علبة او برطمان.
8- مزيل عرق زبدة الشيا والكاكاو:
المكونات:
– 1 معلقة كبيرة زيت جوز الهند.
– معلقة كبيرة زبدة الكاكاو.
– 1 معلقة كبيرة زبدة الشيا.
– 2 معلقة ونص كبيرة نشا.
– من 2 – 4 كبسولات فيتامين E.
– من 10 – 25 نقطة من اي نوع زيت عطري تختاروه.
– 10 نقط زيت شجرة الشاي.
– 10 نقط زيت البرتقان.
– 10 نقط زيت الليمون.
– 10 نقط زيت العنبر.
مش لازم نحط الزيوت كلها وكمان ممكن نغير الزيوت ونختار انواع تانية حسب المتوفر وحسب اللي بنحب ريحته اكتر.
الطريقة:
هنحط زبدة الكاكاو وزيت جوز الهند وزبدة الشيا وشمع العسل مع بعض على النار لحد ما يدوبوا وبعدين نرفعهم من على النار ونضيف باقي المكونات ونقلبها كويس مع بعض ونحتفظ بيهم في علبة.
شوفوا كمان وصفات مزيلة للعرق ومعطرة لرائحة الجسم
