تسريحات شعر للعروسة تجنن مناسبة للصيف
اي عروسة بتحلم بليلة الفرح وبتبقى عايزة تطلع بشكل حلو واميرة في ليلة العمر وكل حاجة تطلع بشكل مثالي ومافيهاش اي غلطة من اول تجهيزات الفرح لحد اختيار الفستان طبعا والميك اب ومن الحاجات المهمة اوي اللي بتشغل بال اي عروسة ليلة فرحها هي اختيار تسريحة الشعر بتبقى محتارة تختار اي تسريحة وايه اللي ممكن يليق عليها, عشان كده احنا النهاردة جايبين لكل عرايس بنات حوا اللي فرحهم قريب ولسه محتارين في اختيار تسريحة الشعر مجموعة تسريحات تجنن.
والتسريحات دي مناسبة للصيف بشكل خاص لان اكيد كل موسم بيكون ليه تسريحات مناسبة ليه اكتر يعني التسريحة اللي هتختاريها للشتا مختلفة عن الصيف لان الصيف بيبقى جو مرح وانبساط اكتر بيكون عايز تسريحات تناسب الجو ده مش عايز تسريحات تقليدية او مملة.
ومن اكتر الحاجات المناسبة اوي للصيف هي التسريحات اللي بيكون داخل فيها اكسسوارات بالورد, او تسريحات فيها استايل الضفاير, يعني استايلات للشعر مميزة ومختلفة عن تسريحات الشعر في اي وقت تاني في السنة.
ومجموعة التسريحات اللي معانا النهاردة منوعة وهتناسب اكيد كل اذواق العرايس, يعني في استايل اللي بيكون الشعر فيه كله نازل على الضهر, او رفع جزء من الشعر وجزء لا, او رفع الشعر كله, يعني كل واحدة هتلاقي الاستايل اللي يناسبها واللي تقدر تختاره في ليلة فرحها.