افضل الاكلات المفيدة للبشرة الدهنية والاكلات اللي لازم تتجنبيها

ريهام محمود
ريهام محمود
في
بشرة
7656

البشرة الدهنية من اكتر انواع البشرة اللي بتعاني من مشاكل زي الدهون الزيادة اللي بتسبب لمعان البشرة وبتبينها اسمر من لونها الطبيعي, والرؤوس السودا, والبثور وحب الشباب, عشان كده البشرة الدهنية محتاجة عناية خاصة جدا والعناية دي تبدأ من جوه قبل بره زي ما احنا بنقول دايما الصحة الداخلية بتنعكس بشكل ايجابي على البشرة وبتخليها صحية ومنورة, والنهاردة هنقول لكل بنات حوا اللي بيعانوا من مشاكل البشرة الدهنية ايه الاكلات المفيدة لبشرتهم وتخلي شكلها صحي وايه الاكلات اللي المفروض يتجنبوها لانها بتأثر بشكل سلبي على البشرة الدهنية وبتزود مشاكلها.

ياللا نعرف ايه افضل الاكلات المفيدة للبشرة الدهنية والاكلات اللي لازم نتجنبها:

– افضل الاكلات للبشرة الدهنية:

1- الخيار:

الخيار من الخضار المفيد جدا للبشرة الدهنية لانه 95% تقريبا من الخيار بيتكون من المية, وفي مواد مضادة للاكسدة وبيرطب البشرة وبيحميها من الجفاف, ومنظف للبشرة, مجرد اكله بس هيخلي بشرتك صحية جدا.

2- الالياف:

الالياف مفيدة جدا للبشرة لانها بتزيل السموم من الجسم وبالتالي ده بينعكس على البشرة, ومن الاكلات الغنية بالالياف الشوفان, والخبز الاسمر, والذرة والحمضيات, الحاجات دي غنية بالالياف وبتحسن خلايا البشرة وبتجددها وهتخلي بشرتك صحية ونضيفة.

3- الجريب فروت:

غني جدا بالالياف والمية, وفيتامين C , وبيساعد على ازالة السموم الضارة من الجسم, وبيخلي شكل الجلد صحي, وافضل حاجة عشان تخلي بشرتك تستفاد بيه انه تعمليه عصير من غير سكر وتشربيه.

4- الاحماض الدهنية اوميجا 3:

الاوميجا 3 من الحاجات المعروفة  انها مفيدة جدا للبشرة لان فيها خصائص مضادة للالتهابات وبتخلي الجلد صحي ومنور, والاوميجا 3 هنلاقيها اكتر حاجة في سمك التونة والسلمون, وفول الصويا, والافوكادو, والمكسرات, لو دخلتوا الاوميجا 3 في نظامكم الغذائي على طول هتفرق جدا مع بشرتكم.

5- المية:

المية من اهم الحاجات لصحة البشرة والجلد وخصوصا للبشرة الدهنية تعتبر المية علاج فعال لمشاكلها لانها بتطردالسموم من الجسم, وبتحافظ على رطوبة الجسم, وبتخلي البشرة شكلها صحي ومنورة على طول, عشان كده لازم نشرب كمية مية كتير كل يوم.

افضل الاكلات للبشرة الدهنية
افضل الاكلات للبشرة الدهنية

– اسوأ الاكلات للبشرة الدهنية اللي لازم تتجنبيها:

1- السكر الزيادة:

الاكلات اللي فيها شوكولاتة بنسبة سكر عالية زي العسل, والشوكولاتة الفاتحة من اكتر الحاجات المضرة للبشرة الدهنية وبتزود مشاكلها, لانها بتزود نشاط الهرمونات  وبالتالي ده بيزود نسبة السكر في الدم ونتيجة لده بتزيد الدهون على البشرة اكتر, وهتسبب حب الشباب, عشان كده نحاول نتجنب على قد ما نقدر الاكلات اللي فيها نسبة سكر عالية.

2- منتجات الالبان:

اللبن ومنتجات الالبان بشكل عام بتأثر بشكل سلبي على البشرة الدهنية وممكن تزود حب الشباب والبثور على البشرة, وبتسرع كمان من شيخوخة البشرة, عشان كده نحاول نقلل من استهلاكنا لمنتجات الالبان وممكن ناخد الكالسيوم من الخضروات الورقية اللي لونها اخضر.

3- الدقيق الابيض:

الاكلات اللي معمولة بالدقيق الابيض زي الاطعمة المخبوزة والمكرونة مش صحية للجسم وبالتالي بتأثر على صحة البشرة وبتزود دهون البشرة وبتسبب حب الشباب, عشان كده الافضل نستبدلها بالحبوب الكاملة يعني ناكل الخبز الاسمر اللي معمول من القمح الكامل, والشوفان, والارز البني بدل العادي, لان ده صحي اكتر للجسم والبشرة.

4- اللحوم الدهنية:

اللحوم اللي فيها دهون زي اللحم الضاني, واللحم البقري مضرة جدا للبشرة الدهنية وبتخلي شكلها مش صحي لان فيها نسبة كبيرة من الاحماض المشبعة اللي بتزود دهون البشرة وبتأثر عليها بشكل سلبي وكمان بتزود نسبة الكوليسترول, عشان كده نحاول نتجنب اكل الدهون اللي بتكون في اللحوم, او الجلد اللي في الفراخ.

5- الوجبات الخفيفة المملحة:

الوجبات الخفيفة المملحة زي الشيبسي, والبطاطس المحمرة, والبسكويت المالح طبعا كلها حاجات لذيذة ومش بنقدر نقاومها لكن المشكلة انها مش صحية ومن الاكلات السيئة جدا على صحة البشرة لانها بتحتوي على دهون مهدرجة وصوديوم وده ممكن يسبب التهاب الجلد وبالتالي هي مضرة جدا للبشرة, عشان كده نحاول اننا نتجنبها ومناكلش منها بشكل مستمر او بكميات كبيرة.

اسوأ الاكلات للبشرة الدهنية اللي لازم تتجنبيها
اسوأ الاكلات للبشرة الدهنية اللي لازم تتجنبيها

في النهاية عشان نوصل لبشرة صحية اكيد ده محتاج وقت وصبر بس لازم نمشي على نظام غذائي صحي ومتوازن ونستمر عليه ويبقى ده اسلوب حياتنا على طول, ونتجنب الاكلات اللي غيرصحية وبالطريقة دي نقدر نوصل لبشرة مثالية جدا وصحية ومنورة وخالية من اي عيوب.

اعرفي اكتر عن البشرة الدهنية واحسن مكياج ليها

البشرة الدهنية
البشرة الدهنية

مقالات متعلقه

طريقة عمل ضمادات التنضيف للبشرة الدهنية

طريقة عمل ضمادات التنضيف للبشرة الدهنية

روتين عناية بالبشرة الدهنية من الفاكهة بس

روتين عناية بالبشرة الدهنية من الفاكهة بس

فوايد سيروم فيتامين سي للبشرة الدهنية

فوايد سيروم فيتامين سي للبشرة الدهنية