5 طرق تخلى بيهم هدومك القديمة جديدة وعلى الموضة
كتير مننا بيبقى عندنا هدوم كتيرة ليها فترة كنا بنلبسها كتير وبعدين بنزهق منها أو بنحس إن موضتها قدمت, علشان كده اوقات كتيره بنحس انه عندنا هدوم كتير بس مش لاقيين حاجه نلبسها او مش شايفين حاجة مناسبة ، علشان كده فى المقال ده ” بنات حوا ” هتقولك على طرق و حيل تجدى بيها هدومك القديمة و تخليها stylish وعلى الموضة ، اعرفى معانا اعرفى معانا 5 طرق تخلى بيهم هدومك القديمة جديدة وعلى الموضة …
5 طرق تخلى بيهم هدومك القديمة جديدة
1-استخدمى اللولى ” حبات اللؤلؤ” :
ممكن تستخدمى اللولى فى انك تجددى هدومك بانك تزينى بيه ياقة البلوزة او على الكمين ، اللولى بيدى شكل حلو واليجانت و هيجدد من اللوك بتاعك خالص . تقدرى تلاقى اللولى بسهولة فى محلات الخردوات او مستلزمات الملابس و الخياطة و هتلاقيه كمان متوفر بألوان و احجام مختلفة .
2- استغلى التيشيرت القديم :
لو عندك تيشيرت قديم بتحبيه و بطلتى تلبسيه علشان مبقاش على الموضة ، امسكى مقص و ابدأى جددى فيه . ممكن تشيلى الكمين بتوعه و تخليه تيشيرت كت او ممكن تقصيه من تحت و تربطيه بالشكل الموجود فى الصورة .
3- استخدمى الطباعه :
واحدة من الطرق اللى تقدرى تجددى بيها هدومك القديمة انك تستخدمى الطباعة ، ببساطة هاتى تيشيرت او بلوزة قديمة و على قطعة ورق مقوى او ورق ستينسيل ” موجود فى المكتبات ” و قصيها بالشكل اللى تحبيه و لونيها و ابدأى دوسي بيها على التيشيرت بتاعك .
4- استخدمى سى دى CD!
ايوة انتى قريتى صح ، ممكن تستخدمى CD فى انك تجددى هدومك القديمة ، و يبقى زى اكسسوار ثابت ضيفتيه لملابسك ، قصى سى دى قديم بأحجام و اشكال مختلفة و الزقيه على ياقة القميص او البلوزة بتاعتك و اعملى ستايل جديد و مختلف .
5- زينى بلوزتك بالدبابيس :
ممكن كمان تستخدمى الدبابيس المشبك الفضية او اللى لونها دهبى فى انك تجددى بلوزتك القديمه بالشكل اللى فى صورة او اى شكل تانى تحبيه ، المميز فى الطريقة دى هى انها مش ثابتة يعنى ممكن تشيلى الدبابيس و تعملى بيها شكل مختلف كل مرة .
و بكده تكونى عرفتى 5 طرق تخلى بيهم هدومك القديمة جديدة وعلى الموضة ، جربيهم و قوليلنا ايه رايك.
اهم 9 قطع ملابس في صيف 2016 هيغيروا اللوك بتاعك
