افضل 8 طرق لاستخدام مية الورد لجمال البشرة والشعر

بقلمريهام محمود فيبشرة visibility18142

مية الورد من المنتجات اللي ليها فوايد كتير جدا للبشرة والشعر والميزة فيها انها مناسبة لكل انواع البشرة يعني اي حد ممكن يستخدمها, ليها خصائص مطهرة للبشرة ومضادة للجراثيم هتخلى بشرتك دايما نضيفة ونقية, ده غير انها مرطبة للجلد, وفوايد تانية للبشرة والشعر هنعرفها النهاردة من خلال المقال بتاعنا.

تعالوا نعرف افضل الطرق لاستخدام مية الورد لجمال البشرة والشعر:

افضل 8 طرق لاستخدام مية الورد لجمال البشرة والشعر

– فوايدها للبشرة:

1- تونر للبشرة:

مية الورد ممكن تستخدم كمنظف او تونر للبشرة, بعد ما نغسل بشرتنا بالغسول المناسب هنخلط معلقة كبيرة من مية الورد مع كام نقطة عصير ليمون ونمزجهم كويس مع بعض ونمسح بيهم البشرة ونسيبه لما ينشف وبعدين نمسح بشرتنا بمنديل, ده يعتبر افضل تونر للبشرة ومناسب لكل انواع البشرة, بينضف البشرة, وبيزيل اثار المكياج, وبيغذي البشرة بعمق.

2- السيطرة على زيوت البشرة:

مية الورد من افضل الحاجات اللي بتساعد على تقليل الزيوت الزيادة في البشرة الدهنية لانه بيقبض المسام الواسعة وبيقللها, ممكن نخلط طين البشرة “هنلاقيه عند العطار” مع مية الورد لحد ما يكون عندنا عجينة قوامها معقول هنفردها على البشرة ونسيبها لحد ما تنشف تقريبا 20 دقيقة وبعدين هنغسل البشرة, الوصفة دي بتنضف المسام بعمق وبتقلل جدا من دهون البشرة, وممكن تعملي الوصفة كل يوم واكتر من مرة في اليوم وخصوصا للي بشرتهم دهنية اوي ومش مضرة خالص بالعكس مفيدة جداا.

3- علاج البثور وحب الشباب:

تعتبر علاج فعال جدا لعلاج البثور وحب الشباب, هنخلط 2 معلقة كبيرة عصير ليمون مع مية الورد بنفس الكمية ونحط الخليط ده على البشرة ونسيبه لمدة 25 دقيقة وبعدين تغسلي بشرتك بمية دافية, والوصفة دي مش بتعالج البثور والحبوب بس كمان تعتبر وقاية من الحبوب وبتمنع ظهورها مرة تانية.

4- تحسين وتجديد البشرة:

كمان تعتبر من الحاجات الفعالة اوي في تحسين شكل البشرة وتجدديها والتخلص من اي ندبات على البشرة وبتخلي شكلها صحي ومخملي وبتورد الخدود, هنخلط 2 معلقة كبيرة دقيق ابيض مع مية الورد لحد ما تكون عندنا عجينة ناعمة وممكن تضيفي على الخليط كام نقطة عصير ليمون لو بشرتك دهنية, هنفرد الخليط على البشرة ونسيبه 15 دقيقة وبعدين نغسل البشرة, والوصفة دي ممكن نستخدمها على الجسم كله.

5- لتكبير الصدر:

مية الورد من الحاجات اللي بتساعد على تكبير الصدر, الطريقة سهلة جدا انك كل يوم هتضيفي معلقة مية ورد كبيرة على كوباية المية مرتين في اليوم, وتشربيها كل يوم, بعد فترة قصيرة هتلاحظوا التغيير في حجم الصدر, بس ملحوظة لكل البنات ساعات بيبقى في مية ورد مغشوشة في السوق وممكن متجبش نتيجة  مع الكل عشان كده لما تشتروا مية الورد نشوف الازازة مكتوب عليها كلمة غذائي ولو ملقناش الكلمة مكتوبة ممكن نعمل حيلة بسيطة جدا نقدر نعرف منها مية الورد الاصلية من المغشوشة وهي انها هنرج الازازة جامد هيطلع في الازازة من فوق فقاقيع صغيرة لو الفقاقيع دي بتنزل ببطء وبتاخد وقت على ما تختفي يبقى مية الورد دي اصلية ولو اختفت بسرعة تبقى مغشوشة.

مية الورد للبشرة
مية الورد للبشرة

– فوايدها للشعر:

6- علاج جفاف وهيشان الشعر:

مفيدة جدا لعلاج جفاف وهيشان الشعر اللي في كتير مننا بيعانوا منهم وخصوصا في الصيف, هنخلط كميات متساوية من مية الورد وجل صبار الالوفيرا, هنمزجهم مع بعض وندلك بيهم فروة الراس والشعر كويس لمدة دقايق ونسيبه على الشعر نص ساعة وبعدين نغسله عادي بالشامبو والبلسم, وممكن نكرر الوصفة كل يوم او يوم يوم على حسب اختيارنا او احتياج الشعر, الوصفة دي بتغذي الشعر جدا وبترطب الشعر وفروة الراس.

7- لعلاج تلف الشعر:

كلنا شعرنا بيبوظ من كتر استخدام السيشوار والمكوى والحرارة والرطوبة حاجات كتير بتأثر على شعرنا بشكل سلبي, لكن مية الورد تقدر تعالج لنا التلف ده, هنجيب كوباية مية ورد ونضيف عليها كام نقطة زيت زيتون و2 كبسولة فيتامين E هنمزجهم مع بعض كويس ونحطه في ازازة ببخاخ ونرش الشعر كله كويس بالخليط بعد ما نغسله ونسيبه على الشعر عادي, الوصفة دي فعالة جدا في علاج تلف الشعر.

8- للمعان الشعر وتعطيره:

بعد كل مرة نغسل فيها شعرنا نخلي من روتينا على طول اننا نرش الشعر بمية الورد نحطها في ازازة ببخاخ ونرش الشعر كله بعد كل غسيل, ده هيرطب الشعر جدا وهيديه لمعة حلوة اوي, ده غير انه هيخلي ريحته حلوة على طول.

مية الورد للشعر
مية الورد للشعر

شوفي 9 فوايد لزيت الورد للبشرة ووصفات سهلة لاستخدامه

9 فوايد لزيت الورد للبشرة و وصفات سهله لاستخدامه .. اعرفيهم
9 فوايد لزيت الورد للبشرة و وصفات سهله لاستخدامه .. اعرفيهم