7 اسباب هيخلوكى ماتستغنيش عن اللون الاسود فى دولابك ابدا

آية حسان

في

8275

اللون الاسود مفيش شك انه هو ملك الالوان ومهما اتطورت الموضة او اتغيرت بنلاقي اللون اللون الاسود فارض نفسه ومسيطر ، ده لانه دايما بيدي شياكة واناقة في لبسه وبيناسبك مهما كان سنك او ستايلك سواء كاجوال او كلاسيك او حتى فى السواريه ، علشان كده لو مفيش فى دولابك قطع ملابس سودا كتير، اعرفى معانا فى المقال ده 7 اسباب هيخلوكى ماتستغنيش عن اللون الاسود فى دولابك ابدا ..

7 اسباب هيخلوكى ماتستغنيش عن اللون الاسود فى دولابك ابدا

1- الاسود بيمشى مع كل حاجه :

اللون الاسود هو اللون اللى بيمشي مع كل حاجه و مع اى حاجه ، لانك لما تلبسي قطعة لونها اسود سواء كانت بلوزة او قميص او بنطلون او بلايزر تقدرى تلبسى معاها اى لون تانى وانتى متطمنة و من غير ما تقلقى ان كانت الالوان ماشية مع بعضها ولا لا ، و طبعا اللون الاسود بيمشى جدا مع الالوان الفاتحة زى الاوف وايت, البينك, الأصفر وكل درجات الالوان الـnude و حرفيا اي لون تاني حتي الألوان الغامقة زي النبيتي, الزيتي, الكحلي والرمادي .

2- الاسود بيرّفع :

كتير مننا بيحسوا انه فى الوان معينة من اللبس بتبينهم اتخن او زايدين فى مناطق معينة من جسمهم ، الاسود بيحل المشكلة دى نهائيا لانه بيمشى مع كل الاجسام وبيخليكى تبانى ارفع بشكل عام. كمان للبنات اللي جسمها مليان من مناطق معينة زي منطقة الفخدين مثلا ممكن تحرصي إن يبقي عندك أكتر من بنطلون اسود والبنات المليانة من فوق تحرص إنها تجيب توبات سوده وهكذا.

3- اى حد يقدر يلبس الاسود :

مهما كان لون بشرتك تقدرى تلبسى الاسود و هيطلع شكله حلو عليكى ، لانه على عكس الوان كتيرة زى الاصفر و الاحمر اللى مش بيليقوا على درجات بشرة كتيرة ، بيليقوا علي أي لون بشرة .

4- الاسود بيمشى كاجوال و كلاسيك :

اللوك كاجوال أو كلاسيك أو سواريه محتحاريش ايوه اللون الأسود هيليق .. سواء لبستى فستان سواريه اسود او حتى جينز اسود مع بلايزر كاجوال هتلاقى الاسود ماشى مع كل الستايلات ، و ده لانه ملك الالوان و تقدرى تلبسيه فى اى مناسبة و بأى ستايل .

5- الاسود بيوفر الوقت :

لو يوم صاحية متأخر ومحتارة في اختيار لبسك أنا عن نفسي بواجه الموقف ده كتير, اسهل حاجة بعملها إني اختار توب اسود وببقي جهزت في ثواني , جربي تعملي بالنصيحة ديه وإنتي متأخرة لأن اختيارك للأسود هيبقي دايما موفق ومفيش مجال للاخطاء لانه زي ماقلنا بيليق علي أي حاجة …

6- اللون الأسود مش بس للهدوم :

اللون الاسود مش حلو بس فى الهدوم ، لكن اى حاجه لونها اسود بتبقى حلوة وبتجذب النظر ليها سواء كان مانيكير او شعر اسود غامق او حتى فى العربيات لأن اللون الأسود مع أي لون تاني معاه بيظهره وبيبرزه عشان كده بنحبه في أي حاجة.

7- اللون الاسود اختيار الشخصية الواثقة:

اختيارك للون الأسود في اى حاجه سواء موبايل، او خاتم ، عقد ، لون مانيكيرك او ايا كانت الحاجه اللى لونها اسود هتفرض نفسها و تخلى اللوك بتاعك اليجانت و فارض نفسه وملحوظ وبيدي ايحاء عن ثقتك في نفسك. الاسود بيحلى اى حاجه يدخل فيها و بيديها فخامة و شياكة كبيرة.