5 خطوات هيساعدوكى تشترى هدومك بطريقة ذكية وسهلة

بنات كتيرة جدا من بنات حوا اغلب الوقت كل لما بيبقى عندنا مشوار او خروجه بنقف قدام دولاب الهدوم و بنبقى مش عارفين نلبس ايه و ساعتها بنبقى متضايقين جدا لانه رغم انه قدامنا هدوم كتير الا اننا بنبقى حاسين انهم مش هينفع نلبسهم او مش مناسبين.واوقات كتير لما بنبقي نازلين نشترى هدوم بنقعد نلف وبنبقى محتارين ومش عارفين نشترى ايه او ايه اللى ممكن يناسبنا.

بس مفيش مرة بنسأل نفسنا ليه ده بيحصل ؟ فى المقال ده  بنات حوا هتقولك على 5 خطوات هيساعدوكى تشترى هدومك بطريقة ذكية و سهلة علشان  تقدرى بعد كده تستغلى كل قطعة ملابس عندك و تجددى من شكلك و ستايلك كل يوم ..

5 خطوات هيساعدوكى تشترى هدومك بطريقة ذكية و سهلة ..

دايما اللى بيوقعنا فى غلطة اننا بننزل نشترى هدوم و نبقى حابينها و حابين شكلنا جدا و بنلبسها مرة او اتنين بالكتير وبعدين نرجع نقف قدام الدولاب و نحس انه معندناش حاجه تنفع نلبسها لاننا بنشترى الهدوم لمجرد انها عجبانا ، بس مبنفكرش ان كانت ماشية مع باقى الهدوم اللى عندنا و مناسبة للستايل بتاعنا ولا لا ، علشان كده بننصحك انه مش لمجرد انه البلوزة او البنطلون ده شكلهم حلو وعاجبينك تشتريهم ، لازم كمان تشوفى ان كانت البلوزة او البنطلون دول ماشيين مع باقى قطع الملابس اللى عندك و ممكن تستغليها فى اكتر من طقم ولا لا ، ولازم كمان تشوفى ان كانت مناسبة لستايل لبسك عموما ولا لا .

طيب ايه الحل ؟ 

الحل فى خمس خطوات بسيطة جدا هنعرفهم مع بعض : 

1- اختاري لنفسك style icon: 

اول حاجه لازم تعمليها و هتساعدك تشترى هدومك بطريقة ذكية و سهلة هى انك تحددى ستايل لبسك، و ده اللى بيعملوه الممثلات و المطربات بس هما بيبقى عندهم ستايليست يختارلهم ستايل لبسهم ، ولانه صعب علينا نجيب ستايليست يختارلنا لبسنا و اللوك بتعنا ممكن تختارى فنانة او حد مشهور بتعجبك ستايل لبسها و اللوك بتاعها  و تخليها الـ style icon  بتاعتك و تحاولى تلبسي زيها ، بس لازم كمان تخدى بالك انه يكون جسمها و طولها قريبين من جسمك و طولك . الخطوة دى هتسهل عليكي كتير جدا لانه هتعرفى دايما انتى محتاجة ايه تشتريه و ايه هى القطعة اللى ناقصاكى لانك كل ما بتتابعى الـstyle icon كل ما هتعرفى ايه اللى ممكن تشتريه ، و لما حاجه تعجبك اسالى نفسك ياترى الstyle icon بتاعتك ممكن تشترى او تلبس ده ولا لا ؟

2- اعرفي ستايلك ايه: 

لو انتى مابتحبيش تتابعى الممثلات او الفانانات و مبيعجبكيش ستايل او طريقة لبسهم ، مفيش مشكلة فى حل تانى بسيط شبه الخطوة الاولى و له نفس التأثير. فى الخطوة دى هتفتحى دولابك و تشوفى قطع الملابس الرئيسية بتاعتك زى البلايزر او البنطلونات و الفساتين و ابدأى اوصفى لنفسك ستايل اللبس بتاعك و شوفيه كاجوال، كلاسيك و هكذا ، و بنفس الطريقة لما تيجى تشترى هدومك اسالى نفسك القطعة دى ماشية مع ستايلك ولا لا ؟

3- حددى لنفسك الوان :

فى الخطوة دى لازم تركزى على الوانك المفضلة ، لانك لو من البنات اللى بتحب الالوان و بتحب يبقى عندها الوان كتير فى دولابها الحقيقة انه ده هيعملك مشكلة كبيرة اوى و هيقلل من قدرتك على تظبيط الوانك و انك توفقى قطع على بعضها . علشان كده خبراء الموضة دايما بينصحوا انك تختارى خمس الوان اساسية و 3 الوان فرعية يكونوا هما الالوان اللى بتعتمدى عليهم فى لبسك دايما . ولازم كمان تشوفى و انتى بتحددى لنفسك الالوان ايه هى الالوان اللى بتناسب جسمك و بشرتك اكتر . و بمجرد ما تحددى الوانك هيبقى سهل عليكى جدا انك تدخلى اى محل ملابس و تميزى القطعة اللى تناسبك فورا . لانك بتقدرى تميزى حوالى 80% من القطع و الالوان اللى بعيدة عن الستايل بتاعك و بكده تقدرى تشترى هدومك بطريقة ذكية . اعرفى معانا كمان ازاى تقدرى تختارى الالوان اللى تناسبك بـعجلة الالوان

4- اعرفى القطع اللى بتلبسيها كتير :

زى ما قلنا انه قطع الملابس اللى بتعجبنا او اللى بنحبها مش ضرورى تكون هى نفس القطع اللى بنلبسها كتير او مرتطبة بالستايل بتاعنا ، يعنى انتى ممكن مثلا تكونى بتحبى البلايزر جدا و بتشتريهم كتير لكن يكون معظم لبسك كاجوال و قليل اوى اما تحتاجى تلبسي بلايزر، كده يبقى البلايزر من قطع الملابس اللى لازم تقللى منها و ماتشتريهاش كتير لانه استخدامك ليه قليل .علشان كده لازم تبقى عارفه ايه هى القطع اللى بتحتاجى تلبسيها كتير و تحاولى تتجنبى القطع البعيدة عن ستايلك .

5- خلى بالك من التكرار : 

فكرى معايا كده عندك كام بوليرو او كارديجان اسود ؟ اتنين او تلاتة على الاقل مش كده, دى كمان غلطة بنقع فيها كتير جدا و هى اننا بنشترى نفس القطعة مرتين و تلاتة ، انك تكررى القطع بتاعتك مقبول فى البنطلونات الجينز لو استايلك بيعتمد عليها لكن لو مثلا عندك جزمتين من نفس الشكل او النوع و بتلبسى منهم واحد بس يبقى انتى كده بتضيعى فلوسك . اخر خطوة هى انك تتجنبى تكرار قطع الملابس اللى عندك و تشترى القطع اللى مش موجودة عندك و لما تشتريها هتضيف لستايلك  . و بكده يبقى عرفتى ازاى تقدرى تشترى هدومك بطريقة ذكية فى خمس خطوات بس ، جربيهم و قوليلنا ايه هى النتيجة .

خليكى شيك وغيري ستايلك فى 5 خطوات بس!