تساقط شعر الحواجب .. اعرفي معانا اسبابه وصفات لعلاجه والوقاية منه

كلنا عارفين ان الحواجب مهمة اوي في تحديد الوش واظهار جمال العيون يعني لو الحواجب حلوة ومظبوطة هيطلع شكل الوش كله حلو, لكن المشكلة اللي بيقابلها كتير من البنات هي تساقط شعر الحواجب او الحواجب الخفيفة وده بيأثر اكيد على شكل الوش كله, عشان كده احنا النهاردة هنقول لكل بنات حوا ايه هي اسباب تساقط شعر الحواجب .. وازاي نحل المشكلة دي ونخلي حواجبنا جميلة ومرسومة طبيعي.

– تعالوا نعرف الاول ايه هي اسباب تساقط شعر الحواجب؟

اكيد عشان نعالج المشكلة لازم نعرف الاول اسبابها عشان نقدر نعالجها صح وفي اكتر من سبب لتساقط شعر الحواجب.

1- ازالة شعر الحواجب زيادة عن اللزوم ده واحد من اسباب تساقط شعر الحواجب لان ده بيخليها خفيفة ومع الوقت الشعر مش بيطلع تاني.

2- من الاسباب كمان استخدام مستحضرات التجميل الخاصة برسم الحواجب كتير بيأثر بشكل سلبي على الحواجب, عشان كده لازم نخلي بالنا من الحاجات اللي بنستخدمها ونرسم الحواجب بماركات كويسة, منعملش تاتو او صبغ شعر الحواجب باستمرار لان ده بيضعف الشعر وبيخليه يتساقط.

3- ممكن يكون من اسباب تساقط شعر الحواجب هو نقص فيتامينات لانه زي ما بنقول دايما ان اي حاجة لشعرنا او لبشرتنا ممكن يكون علاجها من جوه الجسم مش بس من بره, عشان كده لازم نحرص اننا نمد جسمنا بكل الفيتامينات اللي لزماه لان ده هينعكس علينا من بره على الشعر والبشرة وهيخلي شكلهم دايما صحي.

4- في اسباب تانية ممكن تكون المشكلة مثلا بسبب علاج معين بتاخديه لاي حاجة عندك, او بسبب مشاكل في الغدة الدرقية, او بسبب مرض الثعلبة اللي بيسبب فراغات في الشعر, او بسبب الشيخوخة لانه مع كبر السن الشعر بيتساقط وبيخف طبيعي.

– نصائح لمنع تساقط شعر الحواجب:

1- حطي مستحضرات التجميل بحذر:

لما تيجي تستخدمي اي حاجة من منتجات الحواجب زي القلم او التاتو, ارسمي حواجبك بالراحة عشان متسببيش اي ضرر لشعر الحواجب ويسبب تكسره وتساقطه, وارسمي بالقلم في اتجاه نمو الشعر عشان تحافظي عليهم.

2- ادهنيهم بزيت دافي:

من الحاجات الفعالة جدا اللي بتحافظ على شعر الحواجب وبتقله هو دهنها بزيت دافي, دفي اي نوع زيت زي زيت الزيتون, او زيت جوز الهند, او زيت الخروع, او زيت اللوز الحلو وادهني بيه الحواجب كويس كل يوم قبل ما تنامي وسيبيه لحد الصبح اغسليه بمية عادية, ده من الحاجات الهايلة اللي بتساعد جدا على نمو شعر الحواجب ومنع تساقطه, ومع الاستمرار هتلاقي نتايج رائعة جدا.

3- عالجي الامراض الجلدية:

الامراض الجلدية من الحاجات اللي ممكن تسبب تساقط شعر الحواجب زي مرض الثعلبة, او مثلا تكون عندك حساسية على البشرة وخصوصا حوالين منطقة العين وبتسبب لك حكة على البشرة ده ممكن يأثر على شعر الحواجب وتكون سبب في تساقطه, عشان كده لو في اي مرض جلدي نحاول نروح عند دكتور متخصص ونعالجه بشكل سريع.

4- سرحي حواجبك:

من الحاجات اللي ممكن تساعد جدا على منه تساقط شعر الحواجب هي انك تسرحيهم كل يوم بفرشة الحواجب ودي هتلاقوها متوفرة في السوق وموجودة, استخدميها كل يوم سرحي بيها الحواجب بالراحة ونضفيهم لانه ده بيساعد على تحفيز نمو الشعر, بس خلي بالك وانتي بتسرحيهم يكون في اتجاه نمو الشعر, الطريقة دي هتخلي شكل الحواجب صحي وتقيلة.

5- اتباع نظام غذائي صحي:

نقص الفيتامينات زي ما قولنا ممكن يأثر بشكل سلبي على شعر الحواجب, عشان كده لازم نحرص اننا ناكل اكل صحي ونمد جسمنا بكل الفيتامينات اللي لزماه, زي فيتامين B3, A, C, E, وحمض الفوليك, والبروتينات, كل العناصر والفيتامينات دي هتساعد على نمو الشعر بشكل صحي وسليم ومنع التساقط وهتكون النتيجة في الاخر حواجب كثيفة وجميلة.

– وصفات طبيعية لعلاج تساقط شعر الحواجب:

1- ادهني الحواجب كل يوم بمية البصل, من الحاجات الفعالة جدا في علاج التساقط وتكثيف شعر الحواجب.

2- ادهني الحواجب بحليب جوز الهند كل يوم.

3- انقعي بذور الحلبة في المية لحد ما تتطرى وتعمل عندك عجينة, حطيها على الحواجب وسيبيها ربع ساعة واغسليها دي كمان من العلاجات الفعالة جدا تعزيز نمو شعر الحواجب.

4- جل الالوفيرا كمان بيساعد على نمو شعر الحواجب وتكثيفها, ادهنيه على حواجبك وسيبيه ربع ساعة وبعدين اغسليه.

شوفي 5 طرق لتتقيل الحواجب