أفكار جديدة لمانيكيرك في صيف 2016 .. اتعرفي عليها
وقت الصيف أنا بعتبره احلي وقت في السنة, بيبقي وقت كله fun والبنات فيه بيبقوا متألقين ومعظمنا بيسافر وبننبسط وبنحاول نستمتع بوقتنا علي اد مانقدر ، كمان في الصيف بنحب نجرب أكتر من لوك جديد ومختلف وعلشان اللوك بتاعك يكمل فى الصيف لازم تهتمى بضوافرك لانها جزء اساسي بيكمل اى لوك زيه زي الاكسسوارات و الشنطة او الشوز ، عشان كده بنات حوا النهرده هتقولك على الجديد فى الصيف ده عشان تحولي اللوك بتاعك و تخليه تريندى وشيك جدا، اعرفى معانا موضة مانيكير صيف 2016 بالصور و الخطوات ..
موضة مانيكير صيف 2016 بالصور و الخطوات …
1- مانيكير الـ 3D matt effect :
علشان تبدأى تجهزى ضوافركو تكملى بيها لوك الصيف هتحتاجى الادوات دى علشان تعملى ستايل مانيكير الـ 3D matt effect ، الستايل ده هيبقى مناسب ليكى لو انتى بتفضلى المانيكير المات او المطفى و مابتحبيش المانيكير اللامع .
الادوات اللى هتحتاجيها :
-مانيكير اسود .
-مانيكير بلون مات او مانيكير شفاف .
-مانيكير جليتير فضى .
-فرشاة مانيكير .
الخطوات :
الخطوة الاولى : ابدأى بانك تحطى طبقة من المانيكير الاسود المات على ضوافرك ، و لو مش متوفر او مش هتقدرى تجيبيه ممكن تستخدمى المانيكير الاسود العادى .
الخطوة الثانية : اول ما المانيكير ينشف ، حطى طبقة من المانيكير الشفاف او المطفى علشان تخلى المانيكير بتاعك مات . سيبي الطبقة الثانية تنشف شوية ، الطبقة الثانية دى هى الاساس اللى هنعمل عليه ستايل المانيكير .
الخطوة الثالثة :
فى الخطوة الثالثة هتجيبيى المانيكير الجليتير و تحطى خط واحد فى نص الضافر بالشكل الى فى الصورة او بالشكل اللى تفضليه ، ممكن تستخدمى فرشة المانيكير علشان تساعدك فى الرسم و تخليه اسهل . او لو مش متوفرة ممكن ترسمى بخلة الاسنان لو انتى ايدك ثابتة . بعد ما تخلصى امسحى الجليتر الزيادة باستخدام فرشة المانيكير او لو عندك فرشة مكياج قديمة ، و لما المانيكير ينشف حطى طبقة جديدة من المانيكير الشفاف علشان تحافظى على الجليتير .
2- Glitzy nail polish او مانيكير الجليتر
الستايل التانى اللى هنعرفك عليه النهاردة من موضة مانيكيرصيف 2016 هو الـ Glitzy nail polish او مانيكير الجليتر ..
الادوات اللى هتحتاجيها :
– مانيكير باللون المارون ، او اى لون تفضليه .
-مانيكير جليتير دهبى .
-سفنجة مكياج.
-مانيكير ابيض.
-فرشة مانيكير .
الطريقة :
الخطوة الاولى :
اول حاجه هتعمليها هى انك هتحطى طبقة من المانيكير بلون المارون او اللون اللى تفضليه على كل ضوافرك عدا الـring finger او الصباع اللى بتلبسى فيه الدبلة ، ده هتحطى عليه المانيكير الجليتر الدهبى .
الخطوة الثانية :
باستخدام سفنجة المكياج اعملى لضوافرك لوك جليتري بيلمع على ضافر الصباع الوسطانى و الابهام .
الخطوة الثالثة :
على الخنصر و السبابة و باشتخدام فرشة مانيكير رفيعة او لو مش موجودة ممكن تستبدليها بخلة اسنان ، ارسمى بالمانيكير الابيض خطين بالعرض زى ما باين فى الصورة ، و اما ينشف حطى طبقة من المانيكير الشفاف، خطين او تلاتة كفاية اوى علشان مايبانش المانيكير اوفر او تحسي انه شكله باظ .
و بكده تكونى عرفتى معانا ستايلات موضة مانيكير صيف 2016 ، جربيهم و قوليلنا رأيك .