اعملي الروج بمكونات طبيعية بنفسك في البيت

بقلمريهام محمود فيمكياج visibility13643

الروج او احمر الشفايف من الخطوات المهمة في مكياجنا عشان نكمل اللوك بتاعنا وندي حياة للمكياج ونظهره, ولكل البنات اللي بيحبوا يجربوا حاجات جديدة ويعملوا كل حاجة بنفسهم بحاجات طبيعية جايبين لهم النهاردة طريقة الروج بمكونات طبيعية تقدري تعمليه بنفسك في البيت بالالوان اللي انتي عايزاها, او ممكن تعمليه زي زبدة الكاكاو من غير لون لو انتي مش بتحبي تحطي الالوان وتستخدميه بس كمرطب للشفايف.

تعالوا نعرف مع بعض ازاي نعمل الروج بمكونات طبيعية:

 المكونات الاساسية:

– معلقة صغيرة شمع العسل.

– معلقة صغيرة من زبدة الشيا او زبدة الكاكاو.

– معلقة صغيرة زيت جوز الهند.

دي المكونات الاساسية للروج لو احنا عايزين نعمله من غير لون

تقدروا تشتروا زبدة الشيا من هنا زبدة الشيا.

المكونات للالوان:

– للون الاحمر: نضيف على المكونات 1/8 معلقة صغيرة بنجر بودر او ممكن ناخد عصير البنجر يعني نبشره ونطلع منه العصير, او نستخدم الوان الطعام نجيب اللون الاحمر, ونضيف اللون واحدة واحدة لحد ما نوصل للدرجة اللي احنا عايزينها.

– للون البني او الدهبي: نضيف من 1/4 لــ 1/2 معلقة صغيرة كاكاو, وشوية صغيرين جدا يعني اقل من ربع معلقة صغيرة قرفة او كركم, وبردوا نحط بالتدريج لحد ما توصلي لدرجة اللون اللي تحبيها.

 وانتوا ممكن بقى تبتكروا الوان بالحاجات الطبيعية او الوان الطعام وتجربوا مع نفس المكونات بس هتغيروا اللون.

– عشان نعمل اللون مات او مطفي: نضيف على اي لون احنا هنعمله 1/4 معلقة صغيرة طين بنتونيت “الطين الجاف” وممكن تشتروا الطين من هنا طين البنتونيت.

والطين استخدامه مش بس للروج لكن ليه فوايد هايلة للبشرة بيفتحها وبينضفها وبيعالج المسام الواسعة وبيعالج حب الشباب واثاره يعني هتجيبوه وتستفادوا منه في اكتر من حاجة.

– عشان ندي ريحة للروج: استخدمي اي نوع زيت عطري تفضليه “اللافندر, او الياسمين, او البرتقان, او النعناع”.

اعملي الروج بمكونات طبيعية بنفسك في البيت
اعملي الروج بمكونات طبيعية بنفسك في البيت

طريقة التحضير:

هندوب شمع العسل وزبدة الشيا او زبدة الكاكاو وزيت جوز الهند على نار هادية وبعدين لما المكونات كلها تدوب كويس مع بعض هنرفعهم من على النار ونضيف اللون اللي اخترناه من المكونات اللي قولناها فوق ونحط  الزيت العطري, ونخلط كل المكونات مع بعض كويس جدا هيبقى عندنا خليط سائل, نصبه في اي علبة صغيرة عندنا ونسيبه لحد ما يبرد ويتجمد تقريبا هياخد نص ساعة, وبعدها تقدري تستخدميه عادي جدا تحطي منه بالفرشة, واحفظيه في مكان بارد يعني درجة حرارة الغرفة عادي ولو حر اوي ممكن تحطيه في التلاجة عشان بس ميسحش.

وكده نبقى خلصنا  الروج بتاعنا بمكونات طبيعية وسهلة جدا, ياللا جربوه وقولوا لنا النتايج والالوان اللي جربتوها.

اعرفي ازاي تطهري احمر الشفايف او الروج بتاعك

إزاي تطهري احمر الشفايف أو الروج بتاعك
إزاي تطهري احمر الشفايف أو الروج بتاعك