طريقة عمل منظف للاكسسوارات والدهب فى البيت بنفسك

مين فينا مش بيحب إن الاكسسوار بتعها يفضل محتفظ برونقه ولمعانه وشكله يبان جديد علي طول؟؟ اكيد كلنا بس مشكلة الاكسسوارات انها دايما مع الوقت لمعتها بتروح من كتر لبسها و تعرضها للهوا و المية و الاتربة من كتر الخروج بيهم واوقات كمان بننسي إننا لبسينهم وما بنقلعهومش وبنفضل لابسينهم واحنا بنعمل الاكل او واحنا بننضف خصوصا الاكسسوارات الدهب زى الخواتم و الحلقان و الدبل وديه بتبقي مشكلة لما بنلاقي إن لونها اطفي ولمعتها اختفت.

فبيبقى الحل اننا نشترى منظف للاكسسوارات يكون آمن فى استخدامه وده ممكن منلاقيهوش بسهوله ، او اننا نضطر نوديهم لمحلات الدهب او الفضة علشان ننضفهم و نلمعهم و يرجع شكلهم حلو و جديد . و لانه المشوار ده كتير جدا بنكسل نعمله فى المقال ده بنات حوا هتقولك ازاى تنضفى اكسسواراتك ايا كان نوعها بنفسك فى البيت و بمكونين اتنين بس من مطبخك بسهولة و من غير اى تعب ، اعرفى معانا ازاى تعملى منظف للاكسسوارات والدهب ..

اعرفى طريقة عمل منظف للاكسسوارات والدهب فى البيت بنفسك..

كل المكونات اللى هتحتاجيها هى : 

-مقدار كوباية من المية السخنة .

-مقدارحوالى  ملعقتين اكل من البيكنج صودا .

وقت التحضير : 

مش هتحتاجى اكتر من دقيقة واحدة بس .

الطريقة : 

1- فى طبق حجمه مناسب حطى المية السخنة و حطى عليها البيكنج صودا و قلبيهم كويس لحد ما البيكنج صودا تدوب كويس فى المية .

2-حطى قطعة الاكسسوار اللى عايزة تنضفيها فى الخليط ده و سيبيها تتنقع شوية ، يعنى حوالى 5 دقايق  او مقدار مناسب من الوقت حسب حالة قطعة الاكسسوار اللى عايزة تنضفيها .

2- بعد مرور فترة من الوقت هتلاحظى انه كل الاتربة  اللى كانت موجودة فى قطعة الاكسسوار بتاعتك نزلت فى المية ، ولو كان لسه باقى بقع او اتربة ممكن تدعكيها باستخدام فرشة اسنان قديمة علشان تتخلصى منها و كمان هتساعدك فى التلميع . و بكده تكونى نضفتى اكسسواراتك من غير اى تكلفة او تعب .

ملاحظة : ممكن كمان تضاعفى كمية المياة و البيكنج صودا بأى كمية انتى عايزاها على حسب حجم و كمية الاكسسوارات اللى محتاجة انك تنضفيها .