ايه هى قواعد فن الأتيكيت وقت الأكل

آية حسان
آية حسان
5535

فن وقواعد الأتيكيت موجودة و بتدخل فى كل حاجه حوالينا سواء فى البيت او الشغل ، فى النادى او حتى على النت و السوشال ميديا، و زى ما اتكلمنا قبل كده عن ايه هو فن الأتيكيت و ايه هى اهميته ، بنات حوا فى المقال ده هتعرفك ايه هى قواعد فن الأتيكيت وقت الأكل و ايه هى الحاجات اللى المفروض تعمليها ، و ايه هى الحاجات اللى لازم تجنبيها وقت الاكل علشان تتجنبى الاخطاء و المواقف المحرجة اللى ممكن تقعى فيها ..

قواعد فن الأتيكيت وقت الأكل ..

فى الاول قبل ما نتكلم عن الحجات اللى تعمليها و الحاجات اللى متعمليهاش خلينا نتكلم عن القاعدة الاساسية للأتيكيت وقت الاكل و هى انك ببساطة لازم تتصرفى بذوق ، بمعنى انه لو اتعزمتى على الغداء مثلا لازم تردى على طلب العزومة خلال اسبوع من وقت ما اتعزمتى بالكتير و مش بعد ده سواء كنتى هتقبلى العزومة او ترفضيها ، و لازم اخر ميعاد تردى فيه يبقى على الاقل قبل وقت العزومة بيومين على الاقل.

اختيارك للبس يكون بسيط وشيك فى نفس الوقت ، ولو العزومة فيها dress code معين يبقي لازم تلتزمي بيه .. ولازم كمان متروحيش بدري عن ميعاد العزومة وكمان متتأخرش عن ميعاد العزومة بأكتر من 10 دقايق ماكس . و حاولى تاخدى معاكى هدية مناسبة وممكن كمان تكون حاجة عاملاها بنفسك زى صنف حلو مثلا او ممكن تجيبى ورد او شوكولاتة . 

لو حابة تجيبى معاكى ضيف اضافى لازم تستأذنى صاحبة العزومة الاول ، ولو انتى صاحبة العزومة و الضيف اللى انتى عازماه جاب حد معاه حاولى ماتتوتريش و تبقى ذوق و ترحبى بالضيف و تحتوى الموقف بسرعة .

حاجات لازم تعمليها وقت الاكل : 

1- بمجرد ما تقعدى ، افردى المنديل او ” فوطة السفرة ” و استخدميها علشان تمسحى بقك او ايدك من وقت للتانى و انتى بتاكلى، و بعد ما تخلصى الاكل اتنيها تنية بسيطة و حطيها في مكانها .

2- من اهم قواعد فن الأتيكيت وقت الأكل انك تقدمى الاكل من ناحية اليمين الاول ، يعنى لو انتى صاحبة العزومة و قاعدة على راس السفرة ، قدمى الاكل للى قاعد على اليمين الاول و بعدين كملى تقديم الاكل فى اتجاه عقارب الساعة .

3- امسكى الشوكة و السكينة بحيث تكون ايد السكينة و الشوكة فى ايدك و صباعك على الحرف من فوق .

4- أثناء الاكل وإنتي بتتكلمي وعايزة تاخدي break ممكن تحطى الشوكة او السكينة على جنب الطبق . وبعد ما تخلصى اكل حطيهم جنب بعض فى نص الطبق.

5- لو شبعتى و لسه باقى اكل فى طبقك ، حاولى تجمعى الاكل الباقى فى جنب الطبق.

6- لو اتقدملك اكل مابتحبيهوش حاولى تاكل منه ولو كمية قليلة على قد ما تقدرى ، او على الاقل حاولى تبيني نفسك وكأنك بتاكلى .

7- ممكن تاكلى الحلو بالشوكة أو بالمعلقة. بس استخدمى الشوكة الخاصة بالحلويات ” الشوكة الصغيرة ” لوحدها لو بتاكلى كيك.

8- دايما حاولى فى وسط كلامك تشكرى صاحبة البيت او العزومة على ذوقها و تعبها و استقبالها .

9- بعد ما تروح من العزومة ممكن تبعتى رسالة بتشكري فيها صاحبة البيت .

حاجات ماينفعش تعمليها وقت الاكل: 

1- ماينفعش تبدأى اكل قبل صاحب العزومة .

2- ممنوع تعملى اى صوت وانتى بتاكلى ، زى صوت المضغ او البلع .

3- واحدة من اساسيات فن الأتتيكيت وقت الاكل انك ممنوع تتكلمى و بقك فيه اكل ، استنى لما تبلعى الاول و ممكن كمان تاخدى بق مياة صغير وبعدين تتكلمى .

4- حاولى ماتشبيش او تمدى ايدك على اخرها علشان توصلى لحاجه من الاكل او المشروبات اللى انتى مش طايلاها على الترابيزة ، ببساطة اطلبى من اقرب حد للحاجه دى انه يناولهالك .

5- ما ينفعش تعلقى على اختيارات صاحبة العزومة فى الاكل او المشروبات ، لو عجباكى علقى انها عجباكى ، لو مش عجباكى او حاسه انها ممكن تكون احسن حاولى ماتعلقيش خالص .

6- تنضيف الاسنان او انك تلحسي صوابعك ممنوع تماما على السفرة ، استنى لما تخلصى اكل و تروحى تغسلى ايدك .

7- كمان من قواعد فن الأتيكيت وقت الأكل انك حاولى دايما تفتحى مواضيع مششتركة تقدرى تتكلموا فيها لانه العزومات مش بس علشان الكل ، لكن كمان العزومات فرصة علشان تتقربوا من بعض و تعرفوا بعض اكتر .

شوفي كمان 20 نصيحة أتيكيت لكل ليدي متفوتيهمش

نصيحة أتيكيت
نصيحة أتيكيت

مقالات متعلقه

نصايح و قواعد أتيكيت العلاقات فى الشغل

نصايح و قواعد أتيكيت العلاقات فى الشغل

اهم نصايح فن الأتيكيت في حياتك اليومية والاجتماعية

اهم نصايح فن الأتيكيت في حياتك اليومية والاجتماعية

نصايح و قواعد الأتيكيت فى الجيم

نصايح و قواعد الأتيكيت فى الجيم