اعرفي معانا طرق طبيعية لعمل صابون التخسيس وحرق الدهون
دايما بنات حوا بيدوروا على طرق سهلة للتخسيس وحرق دهون الجسم, وخصوصا اللي بيكونوا عايزين يخسسوا مناطق معينة من الجسم مش الجسم كله او اللي بيعانوا من السيلوليت وترهلات البشرة, ومن الحاجات اللي بتساعد جدا على حرق دهون الجسم هو صابون التخسيس, والنهاردة احنا جايبين لكم من خلال المقال ده مجموعة وصفات لعمل صابون التخسيس وحرق دهون الجسم والتخلص من السيلوليت وشد ترهلات الجسم.
وصفات لعمل صابون التخسيس وحرق الدهون:
1- صابونة القهوة والشوفان:
المكونات:
– صابونة جليسرين “من عند العطار”.
– 2 معلقة كبيرة جنزبيل مطحون.
– 2 معلقة كبيرة قهوة.
– معلقة كبيرة دقيق شوفان.
– معلقة كبيرة قرنفل مطحون.
– نص معلقة كبيرة فلفل اسود مطحون.
– فنجان زيت زيتون.
– فنجان مية ورد.
الطريقة:
هنبشر صابونة الجليسرين ونضيف عليها مية الورد وتقلبيهم كويس وتسيبيهم ليلة كاملة لحد ما الصابون يدوب خالص في مية الورد, وبعدين هنضيف باقي المكونات عليهم ونقلبهم كويس مع بعض, هنحط الخليط على النار مع التقليب لحد ما يغلي وبعدين نرفعه من على النار, ونصبه في اي حاجة عندنا ونسيبه لحد ما يتجمد تقريبا هياخد معانا اسبوع لحد ما يتجمد كويس.
بعد كده هنستخدمه هناخد حمام بمية دافية ونفرك الجسم كله بالصابون او المناطق اللي عايزين نخسسها في حركات دائرية لمدة ربع ساعة وبعدين نغسل الجسم بمية عادية, ونستمر على استخدامه لحد ما نوصل للنتيجة المطلوبة, الصابونة مش بتساعد بس على التنحيف كمان بتشد البشرة, بتعالج الخطوط البيضا والحمرا مع الاستمرار في استخدامها, بتوحد لون الجسم, وبتنعم البشرة.
2- صابونة خليط الزيوت:
المكونات:
– 2 صابونة اي نوع من عند العطار.
– 5 ملل زيت النعناع.
– 5 ملل زيت الكافور.
– 5 ملل زيت زيتون.
– 5 ملل زيت الغار.
– 5 ملل زيت حبة البركة.
الطريقة:
هنبشر الصابون ونحطها في اي حاجة على حمام مية ونقلبها لحد ما تدوب وميبقاش فيها اي كتل, بعد ما يدوب هنرفعه من على النار ونضيف عليه مجموعة الزيوت وقلبي الخليط كويس, صبي الخليط في اي علبة بلاستيك او اي حاجة تنفع قالب للصابونة, وسيبيه لحد ما يبرد وينشف.
بعد ما ينشف خالص ويبقى قوالب صابون تقدري تستخدميه تاخدي حمام بمية دافية ودلكي المناطق اللي عايزة تخسسيها في حركات دائرية لمدة ربع ساعة مرتين في اليوم, والنتيجة تظهر خلال اسبوع.
3- صابونة الزيوت الحارقة للدهون:
المكونات:
– صابونة جليسرين مبشورة.
– معلقة كبيرة قرفة مطحونة.
– معلقة كبيرة قرنفل مطحون.
– 9 معالق من خليط الزيوت الحارقة للدهون “عبارة عن كميات متساوية من زيت الزنجبيل, وزيت القرنفل, وزيت القرفة, وزيت البردقوش, وزيت شجرة الشاي الاخضر”.
– 1/2 كوباية مية.
الطريقة:
حطي المية على النار وضيفي عليها خليط الزيوت, سيبيهم على النار لحد ما يغلوا, وبعدين ضيفي عليهم الصابون المبشور وقلبيهم مع بعض كويس لحد ما الصابون يدوب خالص, وبعدين ضيفي عليهم القرفة والقرنفل, صبي الخليط في قوالب وسيبيها لحد ما تنشف هتاخد تقريبا اسبوع.
تستخدم يوميا خدي حمام مية دافية ودلكي المناطق اللي عايزة تخسسيها بالصابون في حركات دائرية لمدة ربع ساعة وبعدين تغسلي جسمك بمية عادية, وممكن بعد ما تغسليه وتنشفي جسمك تدهنيه بخليط الزيوت الحارقة للدهون اللي عملنا منها الصابونة وتدلكيه كويس عشان جسمك يمتصه وتسيبيه عادي لتاني يوم اغسليه والخطوة دي زيادة او اختياري للي عايز نتايج اسرع.
4- كريم الزنجبيل:
المكونات:
– 3 معالق كبيرة نجبيل مبشور.
– 2 معلقة كبيرة خل تفاح.
– معلقة كبيرة مية ورد.
– معلقة كبيرة زيت لوز مر.
– علبة كريم مرطب اي نوع “ممكن جليسوليد”.
الطريقة:
حطي الزنجبيل في كوباية مية على النار وسيبيه يغلى لحد ما يبقى عندك ربع كوباية, وبعدين اطفي عليه وسيبيه لحد ما يبرد, بعد كده صفي المية وخديها ضيفي عليها باقي المكونات وقلبيهم كويس هيبقى عندك خليط كريمي حطيه في اي علبة واحفظية في التلاجة.
دلكي المناطق اللي عايزة تخسسيها بالكريم بحركات دائرية , سيبي الكريم على البشرة لمدة ساعتين والافضل انك تدفي المناطق اللي دهنتيها وبعدين اغسلي الجسم بمية عادية, ادهني الجسم يوميا, وهتلاحظي النتيجة بعد عشر ايام من الاستخدام.
والكريم ده مفيد جدا لدهون البطن والارداف والفخدين, وللتخلص من السيلوليت, وينفع دهانة للصدر بيساعد على رفع وشد الصدر, وكمان بيفتح البشرة وبينعمها.
مشروب اذابة الدهون في 4 ايام بس
