خليكى شيك وغيري ستايلك فى 5 خطوات بس!
كتير مننا بيلاحظ انه فى بنات بيبقوا لابسين هدوم بسيطة جدا مفيهاش تفاصيل كتير لكن بيبقى شكلهم شيك و اللوك بتاعهم بيبقى حلو جدا رغم انه بساطته ، و بقينا بنلاحظ ده كتير جدا فى لبس المشاهير وبنلاقى انههم بقوا بيبعدوا عن الالوان المبهرجة و الهدوم المزخرفة و الاكسسوارات الكتير و بيلبسوا هدوم بسيطة جداوبيطلعوا بلوك شيك و trendy جدا من غير ما يبذلوا مجهود، علشان تعرفى ايه هو سرهم و ازاى تطلعى بلوك حلو وستايل شيك من غير ما تضطرى تغيرى ستايل لبسك او تبذلى مجهود كبير، فى المقال ده ” بنات حوا ” هتقولك على الاسرار اللى هتقدرى بيها تعملى ستايل شيك فى 5 خطوات بس ..
اعرفى معانا ازاى تعملى ستايل شيك فى خمس خطوات بس!
1-اتنى رجل البنطلون !
رغم انه ممكن السر ده يبان بسيط جدا و سهل ، لكن الحركة دى بتأثر جدا فى اللوك بتاعك و بتعمل ستايل شيك جدا . واحدة من اسهل الطرق اللى تقدرى بيها تبقى شيك و ستايل هى انك تتى رجل البنطلون الجينز ، و الحلو فى الحركة دى انك تقدرى تنفذيها على الانواع المختلفة للبنطلونات الجينز ، الحلو كمان فى الحركة دى انها بتبين الشوز بتاعك كله و اللى طبعا بيفرق جدا فى اللوك بتاعك و كمان لو بتديكى الفرصة انك تلبسى خلخال او اكسسوار حوالين رجلك و بيبقى شكله حلو جدا .
اعملى التنية المترهلة: التنية دى مابتبقاش واخدة شكل معين و بتليق اوى على البويفريند جينز و بتدى لوك stylish جدا .
اعملى التنية الرفيعة: و دى بتليق على السكينى جينز و بتدى لوك سيكسي و شيك .
اعملى التنية التخينة : و دى بتليق على الجينز اللى رجليه واسعة و يفضل تلبسى معاها كعب عالى علشان تكملى شياكة اللوك .
2- اعرفى ازاى تدخلى التوب فى البنطلون او السكرت!
شكل التوب لما بندخله فى الجيبة او البنطلون بيبقى حلو جدا لكن لازم تعرفى ازاى تدخلى التوب فى البنطلون وامتى تدخلي التوب او البلوزة من قدام بس ، او من وراء بس او تدخليها كلها ..
دخلى التوب كله فى البنطلون او الجيبة : علشان يبان اللوك بتاعك بروفيشنال أكتر والحركة دى بتبقى حلوة اوى على الجيبات الطويلة .
دخلى التوب من قدام بس : الحركة دى بتحدد و سطك و تبينه احلى من غير ما تبين اى عيب او اى منطقة مليانة فيه ، مناسب لاغلبية البلوزات اللى ممكن تلبسيها و الحلو فيها انك ممكن تلبسى حزام كاكسسوار و تبينيه و بيبقى شكله حلو جدا ، كمان هتخلى اللوك بتاعك يبان اليجانت و Trendy.
دخلى طرف واحد من البلوزة او القميص : علشان يبان اللوك بتاعك كاجوال و الطريقة دى بتبقى احلى و مناسبة اكتر مع القمصان و التيشيرتات الواسعة الفضفاضة.
3- ارفعى / اتنى اكمام القميص :
كمان خدعة او طريقة سهلة جدا علشان تبانى شيك من غير اى تعب او مجهود هى انك ببساطة ترفعى او تتنى كم القميص او البلوزة لفوق ، مش بس هتخلى اللوك بتاعك يبان اليجانت جدا و كأنه من غير ما تقصدى او تتعبى لكن كمان الحركة دى بتديكى الفرصة انك تلبسى اى اكسسوارات انتى حاباها فى ايديكى و كمان بتقدرى بيها تحولي اى لبس فورمال انتى لابساه للوك كاجوال لكن برده شيك بمنتهى السهولة ، كل اللى عليكى تعمليه انك تتنى او ترفعى اكمام البلوزة او القميص لفوق !
اتنى الكم لفوق : لو حابة تطلعى بلوك شيك الطريقة دى مناسبة جدا مع القمصان الكلاسيك او التوب اللى الكم فيه بيبقى واسع .
ارفعى الكم لفوق : و الطريقة دى ببساطة هى انك ترفعى الاكمام بتاعت التوب من غير ماتتنيه ، مناسبة جدا لو لابسة بلايزر واى توبكمه طويل.
الاكمام بطبقتين : و نقصد بيها لو لابسة قطعتين بكم فوق بعض ، زى مثلا توب و فوقه بوليرو او بلوزة و فوقها جاكت او بلايزر و هنا ارفعى اكمام القطعة اللى فوق و بعدين ارفعى اكمام التوب اللى تحت بس بحيث تكون اطوالهم مختلفة ، يعنى خلى التوب اللى فوق يبقى مرفوع اكتر من اللى تحت علشان تبينى التنين و يبقى شكلهم حلو و كمان تتجنبى انهم يكلكعوا او يضايقوكى .
4- البسى الشوز الفلات اللي ببوز !
مفيش بنت فينا مابتحبش تلبس شووز كعب و كلنا عارفين ازاى بيبقى شكلهم شيك و بيدونا رقة و انوثة ، لكن الحقيقة انه الشوز اللى بكعب مؤلم جدا و مش مناسب لكل الاوقات يعنى منقدرش نلبسه فى الكلية او فى الشغل ، و لحسن الحظ انه الشوز الفلات بقى تريندى جدا دلوقتى خصوصا الستيل اللي ليه بوز مدبب لانه بيدي نفس اللوك الاليجانت بتاع الجزمة اللي بكعب وبقي يعتبر بديل ليها.. علشان كده لازم تعرفى ازاى تستغلى الشوز الفلات فى انه يضيف للوك بتاعك و يخليكي تعملى ستايل شيك و عصرى و كمان مريح .
البسى الشوز الكلاسيك : الستيل ده من الجزم يليق علي اللوك الكلاسيك و بيبقي مريح و بسيط وانتى رايحة الشغل الصبح او الكلية.
البسى الشوز المطرز او ال stud shoes : الستايل المطرز بستراس او اكسسوار بيكمل اللوك كأنك لبسه اكسسوار بظبط وبيديكي لوك edgy و مختلف ، البسى الـ stud shoes فى خروجات بالليل .
البسى الشوز الملون أو المنقوش : لو لابسة ألوان سادة ممكن تلبسى الشوز المنقوش زى الشوز التايجر مثلا او الـfloral علشان تدى POP للوك بتاعك ، وممكن كمان تلبسى الشوز بلون واحد زى البينك اوالأزرق اوالاصفر اللوك ده هيديكي بهجة ويليق أكتر مع الستايل الكوجوال.
البسى الشوز برباط او الـlace-up shoes : البسى الستايل ده مع السكرت أو لو رافعة رجل البنطلون زى ما قلنا فى اول المقال علشان تبينيه و تملى الفراغ بين تنية البنطلون و رجلك واختاري مابين ألوان النيود أو الألوان الفاقعة, اللوك ده بيبقي اليجانت جدا وينفع صبح مع لبس فورمال أو في خروجة بالليل.
5- حطى روج بلون فاتح :
واحدة من الخطوات اللى هتخليكى تتعملى ستايل شيك من غير اى تعب كمان هى انك تحطى روج بلون فاتح علشان يديكى اطلالة مشرقة ، لما تحطى روج بلون فاتح هينور وشك وهيداري أي علامات تعب أو شحوب وهيغير اللوك بتاعك خالص .استخدمى الروج الفاتح مع مكياج عيون قليل ممكن تكتفى بالكحل و الماسكارا بس علشان وشك يبان طبيعى ويبقى اللوك بتاعك شيك من غير اى مجهود .
شوفى معانا كمان دليلك الكامل ازاي تختاري الوان لبسك وتنسقيه مع بعض
