20 نصيحة أتيكيت لكل ليدي متفوتيهمش
مفيش بنت فينا ما بيبقاش نفسها انها تتعامل بشياكة و احترام زى ما بنشوف فى المسلسلات و الافلام وفي الحقيقة مع الأميرات زي princess kate مثلا وبنتفرج علي طريقتهم في التعامل مع اللي حواليهم واد إيه بيبقي فيه بساطة وشياكة وبنبقي معجبين جدا بهم..
والحقيقة دى حاجه مش صعبة والموضوع كله فى ايديكى انتى علشان تلاقى الناس من حواليكى سواء فى البيت او فى الشغل او حتى وسط اصحابك و قرايبك بيتعاملوا معاكى بشياكة و احترام كأنك princess بظبط ، لازم انتى كمان تكونى بتحترميهم و بتتعاملى معاهم بشياكة و ذوق علشان تبان اخلاقك الحقيقية الحلوة و يبان جمالك الداخلى اللى مهم زي جمالك الخارجى بالضبط و لانه الفن اللى بيعلمنا ازاى نتكلم و نتعامل مع الناس حوالينا فى المواقف المحتلفة هو فن الاتيكيت، فى المقال ده بنات حوا هتقولك على 20 نصيحة أتيكيت ممكن تغير حياة كل ليدى …
20 نصيحة أتيكيت لكل لادي متفوتيهمش
1- لو انتى قاعدة مع جوزك او خطيبك او حتى زميلك فى الشغل و خدتى بالك انه عارف قواعد الأتيكيت و بيقف لما تيجى تقومى من على الترابيزة من قواعد الأتيكيت انك تقعدى على طول و ماتخليهوش واقف كتير .
2- طبعا قاعدة اساسية انه ماتتكلميش ابدا و فى اكل فى بقك ، و يفضل تشربى بق مياة بعد ما تبلعى الاكل و بعدين تتكلمى .
3- لازم تاخدى بالك من كلامك و الالفاظ اللى بتستخدميها ، الكلمة الحلوة تقدرى بيها تكسبى اى حد .
4- لازم تلبسي علي حسب المناسبة وتعرفى ايه هو اللبس اللى يمشى مع المناسبات المختلفة .. بتفرق قوي!
5- نصيحة أتيكيت مهمة جدا هى انك ماتطلبيش اى حد فى التليفون قبل 9 الصبح و بعد 9 بالليل .
6- لما تقابلى حد جديد بدل ما تقولى ” اهلا ” بس ، يفضل انك تسلمى و تقولى ” اتشرفت بمعرفتك ” او ” فرصة سعيدة ” .
7- وقت العزومة او لو فى اجتماع او بتاكلى مع اصحابك فى النادى مثلا اعملى الموبايل silent .
8- نصيحة أتيكيت مهمة جدا انك لما تطلبى حاجه تقولى ” لو سمحت ” او ” من فضلك ” و كمان تقولى ” شكرا ” .
9- لما تيجيى تجاملى حد او تشكرى حد على حاجه حاولى تكونى تقصدى اللى بتقوليه فعلا و يكون طالع من قلبك.
10- اللى بيخلى أي بنت تبقي ليدى هى اخلاقها ، علشان كده الليدى لازم تساعد الناس من حواليها ، فلو لقيتى حد كبير فى السن مثلا قومى و خليه يقعد مكانك ووفريله أو مساعدة تقدري تقدميها.
11- لو اتعزمتى على حفلة او فرح لازم تقرى الدعوة كويس و لو فيها قواعد معينة فى اللبس او عدد الضيوف لازم تلتزمى بيها .
12- وقت العزايم ماينفعش ابدا تروحى من غير هدية ، الهدية هتبين تقديرك و حبك لصاحبة العزومة .
13- لازم تكون كلمتك واحدة ، يعنى ماتقوليش حاجه الا اذا كنتى تقصديها و لو وعدتى لازم توفى وعدك .
14- لو متفقه على ميعاد مع خطيبك استنيه لما يتصل بيكى و يأكد هو الميعاد ، ماتستعجليش و تتصلى انتى .
15- حطى لنفسك time frame بمعنى انه لازم يبقى معروف عنك انه وقتك منظم و ماينفعش تنزلى تخرجى فى اى وقت ، رتبى خروجاتك على الاقل قبلها بيومين .
16- لو بتقابلى حد لاول مرة علشان تتعرفوا على بعض مثلا حاولى متتقابلوش فى مكان مفضل ليكى او ليه و تكونوا معروفين فيه ، الافضل انكوا تتقابلوا فى مكان جديد و محايد .
17- حاولى ماترجعيش البيت بعد 10 بالليل ، علشان تكونى ليدى لازم تخرجى من البيت و ترجعى فى اوقات مناسبة و مش متأخرة .
18- دايما قدرى اللى الناس من حواليكى بيعملوه علشانك و حاولى دايما تقولى كلمات لطيفة زى شكرا .
19- لو معزومة على الغداء فى مطعم استنى اما اللى عازمك يطلب هو الاول عشان تقدري تحددي الطلبات اللي بيطلبها سعرها حوالي اد ايه وتطلبي حاجات بنفس الاسعار تقريبا ، ولو اصر انك انتى اللى تطلبى الاول حاولى تطلبى حاجات سعرها مناسب و متكونش غالية ، و دايما اعرضى انك انتى اللى تدفعى الحساب او على الاقل تدفعى نصيبك .
20- دايما لما حد يبقى بيتكلم معاكى سواء بيناقشك او بيفضفضلك لازم تبقى مستمعة جيدة و تديله اهتمامك كله و ماينفعش خالص تمسكى تليفونك ، الليدى دايما بتظهر اهتمامها و رغبتها فى المساعدة .
شوفي كمان ايه هو فن الأتيكيت وايه اهميته؟
