ايه هو فن الأتيكيت وايه اهميته؟

فن الأتيكيت او قواعد التعامل مع الناس فى المواقف و الظروف المختلفة .. ديه حاجة مهمة جدا لاى بنت تكون عرفاها لانه التصرف بطريقة كويسة وصح من اساسيات انه البنت تكون شيك وليدى لانه اهتمامك بالجمال الداخلى اللى بيبان فى التصرفات والاخلاق لازم يكون في نفس اهمية اهتمامك بجمالك الخارجى واهتمامك بصحتك ولبسك بالضبط..

ولانه الأتيكيت هو الفن اللى بيعلمنا ازاى نتكلم و نتصرف ونتعامل مع الناس فى اى موقف او ظرف بنات حوا هتعرفك فى المقال ده ايه هو فن الأتيكيت وايه اهميته سواء فى البيت او الشغل او حتى و انتى على السوشال ميديا ..

1- فن الأتيكيت وسط العيلة : 

اول فن من فنون الأتيكيت اللى لازم نتكلم عنه هو فن الأتيكيت فى البيت و بين العيلة خصوصا لو متجوزة و بقيتى جزء من عيلة جديدة فبتحتاجى تبينى طباعك و اخلاقك انها كويسة ، علشان كده من اول الحاجات اللى لازم تعمليها انك تستخمى ” من فضلك ” او ” لو سمحت ” لما تيجى تطلبى حاجه و كمان تتعودى تقولى ” شكرا ”  حتى لو مع الاطفال . و من اهم قواعد الأتيكيت فى العيلة : 

– تحترموا المساحات الشخصية بينكم . 
– تحترموا ممتلكات كل واحد فيكم زى الموبايل او اللابتوب و ماتفتحيهومشمن غير من تستأذنى . 
– متقاطعيش حد و هو بيتكلم و تستنى لمايخلص كلامه .
– وقت الغداء او العشاء لازم متتأخريش او تقعدى على السفرة بعد ما يكونوا الباقيين بدأوا اكل .
– قولى ” من فضلك ” و “شكرا ” .
– متتكلميش فى التليفون او تبعتى رسايل من الموبايل وقت الاكل .
– امضغى الاكل و بقك مقفول و من غير صوت .
– ماتزعقوش لبعض او تتخانقوا .
– بعد ما تأكلى او تشربى حاجه لازم تشيلى الادوات اللى استخدمتيها .
– ضرورى جد تسمعى كلام والدك و والدتك و تناقشيهم بهدوء .

قواعد فن الأتيكيت فى المجتمع : 

الأتيكيت الاجتماعى هو الفن اللى بيعلمنا ازاى نتصرف و احنا بره البيت بين الناس، يعنى لو قاعدة فى مكان عام فى نادى مثلا مع اصحابك او ناس جديدة اول مرة تقابليهم، او لو كنتى ضيفة فى بيت حد من قرايبك او اصحابك او زمايلك فى الشغل، او لو حتى بين جيرانك . القاعدة الاساسية هى انك تعاملى كل الناس حواليكى باحترام علشان تقدرى تكسبى ثقتهم فيكى و يبقوا مهتمين بيكى و يقدروا يقربوا منك ، فبتلاقى نفسك دايرتك الاجتماعية بتوسع و كمان بتتعزمى على المناسبات المختلفة و بتلاقى نفسك بقيتى محبوبة جدا وسط دايرتك من المعارف و الاصدقاء.  والنوع ده من فنون الأتيكيت كمان بيدخل جواه أتيكيت السوشال ميديا و من اهم قواعد الأتيكيت فى المجتمع : 

– دايما لو عندك ميعاد حاولى توصلى فى ميعادك مظبوط من غير تأخير ، لانه التأخي بيخليكى تبانى مهملة و مش مهتمة بالناس اللى مستنيينك. 
– لما تدخلى مع حد فى حوار حاولى تبقى دايما باصة فى عنيهم او انك تعملى eye contact ، علشان تبينى اهتمامك بالموضوع اللى بتتكلموا فيه  و كمان بالشخص اللى بيكلمك . ماتبصيش بعيد الا لو كان فى ضرورة.
– متقاطعيش حد و هو بيتكلم .
– حاولى تبعدى عن النميمة او الـgossip، لانه فى النهاية لما تتكلمى على حد انتى كمان الناس هتتكلم عليكى .
– لو وانتى داخلة اى مكان لاقيتى فى حد مش عارف يفتح الباب لو مثلا معاه او معاها  بيبي او شايل حاجات كتير امسكيله الباب و استنيه لما يدخل. 
– لو اتعزمتى على حفلة فى البيت او حتى حفلة عيد ميلاد حد متعرفيهوش اوى ، او مثلا معزومة على الغداء فى بيت حد لازم تجيبى هدية لصاحبة البيت و يفضل لو حاجه تكونى عملاها بايدك. يعنى لو مثلا معزومة على الغاء ممكن تعملى صنف حلو زى كيك او بسكوت كل الموجودين يقدروا ياكلوا منه .
– لو تعبانة او عندك برد و كنتى متفقه على ميعاد او خروجة يفضل تقولى للناس اللى هيبقوا معاكى و تحاولوا تأجلوا الميعاد او لو مش هتقدرى اعتذرى عن الميعاد بوقت مناسب قبلها .
-لما تبقى فى خروجة مع اصحابك او بتتغدوا سوا بره لازم تدفعى نصيبك من الحساب، و كمان نصيبك من البقشيش. 

و السوشال ميديا كمان بقى ليه قواعد  و فن الأتيكيت و التعامل خاصة بيه علشان تقدرى تبانى صاحبة اخلاق كويسة و عندك ذوق عام قدام الـfriends و الـ followers بتوعك على السوشال ميديا.

و اهم قواعد فن الأتيكيت الخاصة بالسوشال ميديا : 

– ماتحطيش بوست فى اى حاجه ممكن بعدين تندمى انك شاركتيها .
– ماتشاركيش معلومات شخصية كتيرة خاصة بيكى او بعيلتك لانك ماتعرفيش مين اللى ممكن يشوف المعلومات دى ، يعنى مثلا متشاركيش مواعيد سفرك او حاجه مهمة هتحصل خاصة بيكى.
– خدى وقتك فى انك تكتبى posts عن نفسك، لكن كمان من قواعد الذوق انك تردى على كلام الناس الموجهه ليكى و كمان انك تعملى likes و comments ليهم .
– لو حد علق عندك بكلام مش عجبك تجنبي تماما الرد عليه وإنك تخوضي حرب علانية قدام كل معارفك حتي لو عندك ردود قوية.. الافضل إنك تتجنبيه أو تردي رد خاص. 
– لو عملتى كومنت او لايك غلط او حتى بوست قولتى فيه كلام و حسيتى انه مش مناسب لازم تعتذرى و تحاولى ماتعمليش نفس الغلطة تانى .
– استخدمى القواعد دى مع اى موقع من مواقع السوشال ميديا اللى بتستخدميهم.

كمان من اهم قواعد فن الأتيكيت اللى ضرورية جد ولا زم نتكلم عنها هو الأتيكيت فى الشغل و سط زمايلك و المديرين بتوعك ، لانك بتتعاملى معاهم بشكل يومى و التعامل ده مكن يؤثر بشكل كبير جدا على راحتك فى الشغل و طبيعة علاقتك مع زمايلك ، علشان كده اهتمامك بقواعد الأتيكيت فى الشغل هيبين اخلاقك الكويسة و يبينك متعاونة و مجتهدة فى شغلك و انك تقدرى تمثلى المكان اللى بتشتغليه بطريقة كويسة و كمان بيؤثر على سمعتك بشكل ايجابى جدا.

وقواعد فن الأتيكيت الاساسية فى الشغل هى :

– لازم متتأخريش عن شغلك ابدا.

– البسى لبس مناسب للشغل، يعنى لبس الخروجات لازم يكون مختلف عن لبس الشغل اللى لازم تلبسيه لبس فورمال.شوفى ستايلات 2016 سمارت كاجوال للعمل

– ماتقاطعيش اى حوار بيحصل قدام، ولازم تستنى الللى قدامك يخلص كلامه و بعدين تبدأى تتكلمى .

– لو مفيش مكان تانى تاكلى فيه غير مكتبك ، حاولى تتجنى الاكل اللى ريحته قوية .

– بعد ما تستخدمى آلة تصوير الورق او الطابعة او السكانر، لازم تحطى ورق جديد بعد ما تخلصى .

– ماتخديش الفضل فى شغل زمايلك طالما معملتيش فيه حاجه .

– خليكى ودودة وذوق مع الزباين او العملاء و الضيوف اللى بتتعاملى معاهم .

– تجنبى الخناق او انه صوتك يبقى عالى فى الشغل .

– لو حسيتى انه الشخص اللى بتتكلمى معاه غاضب او متنرفز و صوته عالى حاولى تخجى بره الحوار لحد ما يهدأ علشان تتجنبى انه الحوار يتحول لخناقة .

– ماتلمسيش الممتلكات الشخصية لزمايلك زى الموبايلات او اللابتوب الخاص بيهم .

و بكده نكون عرفنا ايه هى قواعد فن الأتيكيت الاساسية اللى ممكن تحتاجيها فى مواقف و فترات مختلفة من يومك ، حاولى تتصرفى على اساسهم و هتلاقى انهم بيفرقوا معاكى جدا فى تعاملاتك و علاقتك بالناس حواليكى و هتلاقي حياتك بتتغير للأحسن شكل ملحوظ جدا :) ..