8 حاجات غير متوقعة ممكن تأثر على جمال بشرتك !

ريهام محمود
ريهام محمود
في
بشرة
16938

كل بنات حوا بيحرصوا دايما انهم يهتموا ببشرتهم سواء بالماسكات الطبيعية او منتجات العناية بالبشرة, لكن ساعات بنعمل حاجات غلط من غير ما نقصد ممكن تأثر بشكل سلبي على بشرتنا وحاجات منتوقعش انها ممكن تأثر على بشرتنا لكن هي في الحقيقة بيكون ليها تأثير على جمال البشرة, واحنا النهاردة هنقول لكل بنات حوا ايه هي الحاجات دي عشان تحاولوا تتجنبوها على قد ما تقدروا.

8 حاجات غير متوقعة ممكن تأثر على جمال بشرتك:

1- الموبايل:

طبعا كلنا مش بنقدر نستغنى عن استخدام الموبايل يوميا وطول اليوم في ايدينا لكن الموبايل من اكتر الحاجات اللي ممكن تأثر جدا على جمال البشرة لانه بيكون عليه تراب من الجو وبكتيريا ولما بنستخدمه قريب من البشرة طبعا كل الحاجات دي بتتنقل لبشرتنا وبالتالي ممكن تظهر لنا حبوب وبثور, وعشان نحاول نتجنب ضرر الموبايل على البشرة ممكن نستخدم الهاند فري بدل استخدام الموبايل على البشرة على طول عشان الشاشة متلمسش البشرة والبكتيريا متتنقلش ليها ونحافظ عليها صحية.

الموبايل
الموبايل

2- المخدة:

كلنا عارفين ان خلايا البشرة المفروض بتتجدد واحنا نايمين وخلايا الجلد الميتة بتبقى على المخدة وممكن تسد مسام البشرة بتاعتنا, عشان كده لازم نهتم بتنضيف بشرتنا كويس جدا عشان خلايا الجلد الميتة متبقاش على المخدة وتضر بشرتنا, ده غير البكتيريا التانية اللي ممكن تكون على المخدة اللي ممكن تكون في شعرنا وتتنقل لبشرتنا, وعشان نتجنب المشاكل دي لازم نحرص اننا نغير اكياس المخدات باستمرار وننام على مخدات نضيفة يعني على الاقل لازم تتغير مرة في الاسبوع, ولما تيجي تغسلي اكياس المخدات الافضل تغسليهم في مية سخنة جدا عشن تقتل اي بكتيريا فيها.

المخدة
المخدة

3- المية السخنة:

المية السخنة كمان من الحاجات اللي بتأثر على جمال البشرة جدا لانها بتخلي البشرة تفقد الزيوت الطبيعية اللي بتغذيها وبيتلف الطبقات الخارجية للبشرة اللي بتحمي بشرتنا من عوامل الجو الخارجية وبالتالي ده بيسبب جفاف البشرة وبيخليها خشنة وغير صحية, وعشان نتجنب ده نستخدم مية تكون درجة حرارتها مناسبة يعني تكون دافية بس, وكمان ما نطولش في وقت الحمام عشان بشرتنا متنشفش من كتر المية.

المية السخنة
المية السخنة

4- اللبان:

اللبان ممكن يكون من الحاجات المفيدة انه بينضف السنان واللثه بعد الاكل, بينعش النفس وممكن يحل للتخلص من رائحة الفم السيئة, لكن هو ليه تاثير سلبي على البشرة لان الحركات اللي بنستخدمها في ندغ اللبان تكرارها ده ممكن يسبب تجاعيد وخطوط رفيعة حوالين منطقة الفم والشفايف, ومع الوقت هتخلي الجلد يفقد مرونته, عشان كده الافضل اننا ناكل اللبان على فترات مش بشكل دايم يعني منخليهاش عادة عندنا نحاول نتجنبها على قد ما نقدر عشان نحافظ على بشرتنا.

اللبان
اللبان

5- تعبيرات الوجه:

تعبيرات الوجه من اكتر الحاجات المسئولة عن التجاعيد اللي بتحصل حوالين العين والفم ومنطقة الجبين, مع الوقت بتتشكل التجاعيد على البشرة ببطيء وبالتدريج, واكيد احنا مش هنقدر نستغنى عن تعبيرات الوش بس نحاول انها متبقاش زيادة عن اللزوم يعني مثلا وقت الغضب والعصبية بنعمل تعبيرات كتير وبنحرك عضلات الوش بطريقة بتاثر بشكل سلبي على البشرة وبالتالي بتحصل التجاعيد خصوصا في منطقة الجبين وحوالين الفم فده ممكن نتجنبه يعني نحاول على قد ما نقدر نحافظ على تعبيرات وشنا في المعدل الطبيعي ومتبقاش زيادة او بالمعدل اللي ممكن يضر البشرة.

تعبيرات الوجه
تعبيرات الوجه

6- اكل منتجات الالبان كتير:

من الحاجات اللي خبراء البشرة ودكاترة الامراض الجلدية اكدوا انها بتأثر بشكل سلبي على البشرة هو اكل منتجات الالبان بكميات زيادة يوميا , لانها بتسبب زيادة افراز الدهون على البشرة وبالتالي ممكن تسبب ظهور الحبوب والبثور, عشان كده نحاول اننا نقلل من اكل منتجات الالبان زيادة عن اللزوم, واختاري منتجات الالبان قليلة الدسم واللبن الخالي من الدسم لانها اقل ضرر على البشرة.

اكل منتجات الالبان كتير
اكل منتجات الالبان كتير

7- استخدام نفس منتجات العناية بالبشرة:

منتجات العناية بالبشرة مع الوقت بتفقد مفعولها وبتبطل تأثر على البشرة, لما بنستخدم نفس المنتج فترة طويلة او كذا سنة بشرتنا بتاخد عليه وبيبقى مالوش تأثير على البشرة عشان كده لازم كل فترة نجدد المنتجات اللي عندنا ونستخدم حاجات مختلفة, ده غير ان البشرة كل فترة ليها متطلبات مختلفة يعني كل سن ليه المنتجات المناسبة ليه للعناية بالبشرة, وكمان لازم نختار المنتجات المناسبة لنوع بشرتنا لان المنتجات اللي تناسب البشرة الجافة غير الدهنية غير الحساسة كل بشرة وليها اللي يناسبها.

استخدام نفس منتجات العناية بالبشرة
استخدام نفس منتجات العناية بالبشرة

شوفوا من هنا ازاي اعرف نوع بشرتي وازاي اهتم بيها.

8- المبالغة في روتين العناية بالبشرة:

اكيد الاهتمام بالبشرة بشكل يومي مهم جدا, لكن كمان المبالغة في الروتين اليومي في العناية ببشرتنا ممكن يجي بنتيجة عكسية على البشرة, يعني مثلا منستخدمش منتجات العناية بالبشرة بكميات كتير ونقول عشان بشرتنا تستفاد اكتر لان ده ممكن يسد مسام البشرة ويسبب لك حبوب ويخلي البشرة تجف, او نعمل ماسك لبشرتنا ويكون مدتة ربع ساعة نقول لا نسيبه نص ساعة او ساعة عشان بشرتنا بردوا تستفاد اكتر لكن الحقيقة انه بيجي بنتيجة عكسية على البشرة, عشان كده الافضل نستخدم كل حاجة في معدلها الطبيعي لان خبراء البشرة والمتخصصين بيبقوا عاملين تجارب وعارفين الكمية  والمدة المناسبة لكل حاجة بنحطها على بشرتنا, وكمان قبل استخدام اي منتج جديد نقرا التعليمات عليه عشان نستخدمه صح وبشرتنا تستفاد منه.

المبالغة في روتين العناية بالبشرة
المبالغة في روتين العناية بالبشرة

الكمية المناسبة من مستحضرات التجميل اللي بيحتاجها شعرك وبشرتك

الكمية المناسبة من مستحضرات التجميل اللي بيحتاجها شعرك وبشرتك
الكمية المناسبة من مستحضرات التجميل اللي بيحتاجها شعرك وبشرتك

مقالات متعلقه

تحدي اليوم الواحد لتوهج بشرتك قبل الفرح

تحدي اليوم الواحد لتوهج بشرتك قبل الفرح

مكون واحد بس لمنع علامات الشيخوخة

مكون واحد بس لمنع علامات الشيخوخة

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر