اعملى مناديل إزالة المكياج او الـ wipes فى البيت
مناديل إزالة المكياج مفيش بنت تقريبا بتقدر تستغني عنها لانها بتعتبر الاسرع و الاسهل فى استخدامها خصوصا بعد يوم تعب وبنبقي راجعين علي النوم علي طول ومش قادرين نغسل وشنا بالطريقة الصح زي مادايما بننصح.
لكن مشكلتها انها ممكن تكون بتخلص بسرعة لاننا بنحتاج اكتر من منديل علشان نتأكد اننا شيلنا كل المكياج كويس اوى و نضفنا وشنا تماما ، فممكن يبقى استخدامها مكلف خصوصا لو هنشتري النوع الافضل اللي بتبقي خالية تماما من الكحول والرائحة و دى بيبقى سعرها مكلف شوية لانه المواد الكيمائية اللى بتبقى في المناديل التانية ممكن تسبب الجفاف او الالتهابات لبشرتك مع الاستخدام ..
علشان كده حبينا نقدملك النهدره ازاى تعملى بنفسك مناديل إزالة المكياج او الـ wipes بنفسك فى البيت و بتكلفة بسيطة جدا وكمان تبقى ضامنة انها صحية و مفيش فيها اى مواد ممكن تضر بشرتك و فى خمس دقايق بس ..
اعملى مناديل إزالة المكياج او الـ wipes فى البيت
الحاجات اللى هتحتاجيها :
-15 منديل ورق سميك ” يفضل تستخدمى مناديل الورق الخاصة بالمطبخ علشان بتبقى سميكة وبتستحمل ” .
-كوبايتين مية .
-من 1 لـ 3 ملاعق اكل زيت زيتون ، لو بشرتك دهنية اكتفى بمعلقة واحدة ولو بشرتك جافة استخدمى 4 ملاعق .
-حوالى 10 نقط من زيت اللافندر، او زيت الليمون او اى زيت عطري تحبيه ” اختياري ” .
-برطمان زجاجى بغطاء.
-ملعقة اكل من اى كريم او لوشن مرطب تفضليه .
الطريقة :
1-اقسمى المناديل الورقية نصين ، و بعدين طبقى كل منديل على شكل مربع صغير وحطيهم فوق بعض فى برطمان زجاجى نضيف و ناشف .
2-فى طبق امزجى المياة مع مع زيت الزيتون و اللوشن و الزيت العطرى اللى استخدمتيه و ضربيهم بشوكة مع بعض كويس اوى لحد ما الزيت يمتزج مع باقى المكونات و يختفى خالص .
3- اول ما الخليط كله يمتزج مع بعضه كويس اوى صبيه على المناديل و بعدين اقفلى غطاء البرطمان كويس اوى و رجيه كويس لحد ما كل المناديل تتغطى بالخليط ده و تتبل بيه كويس .
4- لما تحسى انه الخليط ده وصل لكل المناديل ، افتحى الغطاء و صبى كل السائل بره ، او معظمه على قد ما تقدرى و بعدين ارجعي اقفليه كويس تانى . الفكرة كلها انه المناديل تتبل كويس بالخليط ده و بعدين نتخلص من السائل الزيادة علشان المناديل متبقاش بايشة او تدوب .
ازاى تستخدميها ؟
وقت ما تحبى تشلى مكياجك ، ببساطة افتحى البرطمان و خدى منه منديل و ابدأى من منطقة العين ، بس خدى بالك انه المناديل ماتدخلش فى عينيكى ، و استخدمى المناديل بالطريقة المعتادة الطريقة الصحيحة لـ ازالة المكياج بال WIPES ، المناديل دى صالحة للاستخدام لمدة شهر كامل من يوم ما تعمليها . جربى اعمليها و قوليلنا ايه رأيك :)
شوفي كمان 11 غلطة بنعملها فى ازالة المكياج
