اعرفي معانا ازاي تستخدمي العسل والليمون لازالة شعر الوجه ؟
دايما كلنا بنقعد ندور كتير على وسائل لازالة الشعر الوجه من غير الم وخصوصا اللي بشرتهم بتبقى حساسة من استخدام الشمع او الفتلة وبتسبب لهم مشاكل في بشرتهم, عشان كده احنا النهاردة جايبين لكل بنات حوا وصفات باستخدام العسل والليمون لازالة شعر الوجه من غير الم وكمان مع الوقت استخدامها بيقلل ظهور الشعر في الوش.
ووصفات الليمون والعسل فعاليتها زي الشمع اللي بيستخدم في صالونات التجميل لانه بيلزق على الوش ولما بتيجي تشيليه بيطلع معاه الشعر من الجذور, وكمان الوصفات دي مش بتشيل الشعر لكن مفيدة جدا للبشرة لان فيها خصائص مضادة للبكتيريا والالتهابات وبتقلل من احمرار وتهيج البشرة وبترطب البشرة بسبب العسل, والليمون بيساعد على شد البشرة وتقليل المسام الواسعة.
تعالوا نعرف مع بعض ازاي نستخدم العسل والليمون لازالة شعر الوجه ؟
قبل الوصفات الافضل اننا نعمل حمام بخار للبشرة عشان نفتح المسام ونسهل ازالة الشعر, والنتايج مش هتبان من اول مره لكن هتبان مع التكرار هتوصلوا هايلة جدا.
1- وصفة العسل والليمون:
المكونات:
– معلقة كبيرة عصير ليمون.
– 4 معلقة كبيرة عسل نحل.
الطريقة:
هنمزج الليمون والعسل كويس ونفرد الخليط على الوش كله ونسيبه ربع ساعة, وبعدين هنجيب قماشة مبلولة بمية دافية ونشيل بيها الماسك, كرري الوصفة 3 مرات في الاسبوع.
2- وصفة العسل والليمون والشوفان:
المكونات:
– 1/2 معلقة شوفان خشن.
– معلقة كبيرة عصير ليمون.
– معلقة كبيرة عسل نحل.
الطريقة:
هنمزج المكونات مع بعض ونفردها على البشرة ونسيبها 20 دقيقة, وبعدين هنبل صوابعنا بالمية ونبدأ نفرك الماسك بالراحة عكس اتجاه نمو الشعر في حركات دائرية, وبعدين نغسل البشرة بمية دافية, ونكرر الوصفة 3 مرات في الاسبوع, والوصفة دي مفيدة جدا للبشرة لان الشوفان هيساعد على تنضيف البشرة وازالة الخلايا الميتة المتراكمة على البشرة.
3- وصفة العسل والليمون والسكر:
المكونات:
– معلقة كبيرة سكر.
– معلقة صغيرة عصير ليمون.
– معلقة صغيرة عسل نحل.
الطريقة:
هنخلط المكونات مع بعض ونحطهم على نار هادية يغلوا لمدة 3 دقايق, وبعدين هنرفعه من على النار ونسيبه لحد ما يبرد, هنجيب شوية نشا نفردهم على وشنا او على الاماكن اللي عايزين نشيل منها الشعر ونفرد الخليط على البشرة في اتجاه نمو الشعر بعصاية خشب ممكن نستخدم عصاية الايس كريم, هنجيب حتة قماش او الشرايط اللي بيتشال بيها الشمع من الصيدلية ونلزقها على الماسك ونشده بسرعة عكس اتجاه الشعر يعني بالطريقة العادية اللي بنشيل بيها الشعر, وفي الاخر امسحي البشرة بقماشة مبلولة بمية دافية.
4- وصفة العسل والليمون والبطاطس والعدس الاصفر:
المكونات:
– عدس اصفر.
– عصير ثمرة بطاطس.
– معلقة كبيرة عسل نحل.
– 4 معالق كبيرة عصير ليمون.
الطريقة:
هنجيب العدس الاصفر كمية حسب ما احنا محتاجين هننقعه في المية طول الليل عشان يطرى والصبح نطحنه في الخلاط لحد ما يبقى عندنا شبه المعجون كده, وبعدين هنبشر البطاطس ونعصرها نطلع منها العصير ونضيفها على العدس مع العسل وعصير الليمون, نفرد الخليط على البشرة ونسيبه نص ساعة, وبعدها هنبل صوابعنا بالمية ونفرك الماسك من على البشرة في عكس اتجاه نمو الشعر, وبعدين نمسح البشرة بقماشة مبلولة, ونكرر الوصفة 3 مرات في الاسبوع.
ياللا يا بنات جربوا الوصفات دي وشاركونا النتايج :)